މިހާރު އޮތް 20 ވަނަ ރައްޔިތުންގެ މަޖިލިހުގެ މެމްބަރުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ)ގައި އިންނަވާ މެންބަރެއްގެ ގޮތުގައި މާފުށީ ދާއިރާގެ މެންބަރު ހުސައިން ރިޒާ އައްޔަން ކުރުމަށް ރައްޔިތުންގެ މަޖިލީހުން ދެންމެ ފާސްކޮށްފިއެވެ.

ޤާނޫނު އަސާސީ އާއި ޖުޑީޝަލް ސާވިސް ކޮމިޝަން (ޖޭއެސްސީ)ގެ ޤާނޫނުގައި ވާގޮތުގެ މަތިން އެ ކޮމިޝަނަށް ރައްޔިތުންގެ މަޖިލީހުގެ މެންބަރުންގެ ތެރެއިން މެންބަރަކު ކަނޑައެޅުމަށް މަޖިލީހުގެ މިއަދުގެ ޖަލްސާގައި ހުޅުވައިލި ފުރުސަތުގައި އެ ކޮމިޝަންގެ މެންބަރެއްގެ ގޮތުގައި ރިޒާގެ ނަން މަޖިލިހަށް ހުށަހެޅުއްވީ މަނަދޫ ދާއިރާގެ މެންބަރު ހުސްނީ މުބާރަކުއެވެ. ތާއީދު ކުރެއްވީ މާފަންނު ދެކުނު ދާއިރާގެ މެންބަރު އަބުދުﷲ ރިފައުއެވެ.

ރިޒާގެ ނަމަށް މަޖިލިސް ޖަލްސާގައި ވޯޓަށް އެއްސެވުމުން، އެވަގުތު ޖަލްސާގައި ތިއްބެވި 89 މެންބަރުންގެ ތެރެއިން 83 މެންބަރުން ވަނީ ރިޒާ އެމަގާމަށް އައްޔަން ކުރަން ފެންނަ ކަމަށް ވޯޓޫ ދެއްވައިފައެވެ. އެކަމަށް ބޭނުން ވަނީ މަޖިލީހުގެ 42 މެންބަރުންގެ ވޯޓެވެ.

ހުސައިން ރިޒާ އަކީ ނިމިދިޔަ 19 ވަނަ ރައްޔިތުންގެ މަޖިލިހުގައި ގުރައިދޫ ދާއިރާ ތަމްސީލް ކުރެއްވި އިބްރާހިމް ރިޒާގެ ކޮއްކޮއެވެ. އޭނާއަކީ ޤާނޫނީ ދާއިރާއިން ތައުލީމު ހާސިލް ކުރައްވައި، ޝަރީއާއިން މާސްޓާސް ހާސިލް ކުރައްވާފައިވާ ބޭފުޅެކެވެ. އޭނާ ވަނީ ކްރިމިނަލް ކޯޓުގެ ރެޖިސްޓްރާގެ މަގާމުވެސް ފުރުއްވައިފައެވެ.

ދިހަ މެންބަރުން ހިމެނޭ ޖޭއެސްސީގައި މިހާރު ތިއްބެވީ ކޮމިޝަންގެ ނައިބު ރައީސްގެ ގޮތުގައި ހުންނެވި ހައިކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިޚާބު ކޮށްފައިވާ ފަނޑިޔާރު މުހައްމަދު ނިޔާޒާއި، އުއްތަމަ ފަނޑިޔާރު ފިޔަވައި، ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން، އެކޯޓުން އިންތިޚާބު ކޮށްފައިވާ ފަނޑިޔާރު ހުސްނުއްސުއޫދާއި، ދަށު ކޯޓު ތަކުގެ ފަނޑިޔާރުންގެ ތެރެއިން އެ ކޯޓު ތަކުން އިންތިޚާބު ކޮށްފައިވާ ފަނޑިޔާރު އަލީ ޝަރީފާއި، އާންމުންގެ ތެރެއިން ރައްޔިތުންގެ މަޖިލީހުން ކަނޑައެޅި މެންބަރު ޑޮކްޓަރ އާމިނަތު އުއްމުކުލްސުމްއެވެ.

އޭގެ އިތުރުން ސިވިލް ސާވިސް ކޮމިޝަނުގެ ރައީސް މުހައްމަދު ނާޒިހު އާއި ބަންޑާރަ ނައިބު އަހުމަދު އުޝާމާއި ރައީސުލްޖުމްހޫރިއްޔާގެ މެންބަރު މުހައްމަދު ސަމީރު އާއި ޤާނޫނީ ވަކީލުންގެ ތެރެއިން އިންތިޚާބު ކޮށްފައިވާ މެންބަރެއްގެ ގޮތުގައި އަލީ އަބްދުއްލަތީފްވެސް ޖޭއެސްސީގަައި ހިމެނިވަޑައިގަންނަވައެވެ.

އެ ކޮމިޝަންގައި ދެން މެންބަރު ތިއްބަވާނީ ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން އައްޔަންކުރާ މެންބަރަކާއި، ރައްޔިތުންގެ މަޖިލީހުގެ ރައީސްއެވެ. އެގޮތުގެ މަތިން މަޖިލީހުގެ މެންބަރުންގެ ތެރެއިން ޖޭއެސްސީއަށް ކަނޑައަޅާ މެންބަރެއްގެ ގޮތުގައި ރިޒާގެ ނަން މިއަދު ފާސް ކުރިއިރު، ދެން ހިމެނިވަޑައިގަންނަވާނީ މަޖިލީހުގެ ރައީސް އަބްދުއްރަހީމް އަބްދުﷲ އެވެ.

އެންމެ ފަހުން ރައްޔިތުންގެ މަޖިލިހުން ޖޭއެސްސީ އަށް ކަނޑައަޅާފައި ހުންނެވީ ތުޅާދޫ ދާއިރާގެ މެމްބަރު ހިސާން ހުސައިނެވެ. އެއީ ޖޭއެސްސީގެ ރައީސްއެވެ. ނަމަވެސް 19 ވަނަ މަޖިލީހުގެ ދައިރު ނިމުމުން ހިސާންގެ މެންބަރު ކަމުގެ މުއްދަތު ވަނީ ހަމަވެފައެވެ.