މި އަހަރުގެ ދިރާސީ އާ އަހަރުގެ ކިޔެވުން މިއަދު ފެށިގެން ދިޔައިރު، ކިޔަވައިދިނުމާބެހޭ އެންމެ އިސް މުވައްސަސާ ކަމަށްވާ އެޑިޔުކޭޝަން މިނިސްޓްރީ ތައްޔާރު ވެފައި ނެތް ކަމަށާއި، އެކަމުގެ ޝަކުވާތައް ގިނަ ކަމަށް އެމްޑީޕީ އިން ބުނެފިއެވެ.
ދިރާސީ އަހަރުގެ ތަހުނިޔާ ދަރިވަރުންނާއި، މުދައްރިސުންނާއި، ބެލެނިވެރިންނަށް ކިޔުމުގެ ގޮތުން އެމްޑީޕީ އިން މިއަދު ނެރުނު ބަޔާނެއްގައި ބުނީ މިނިސްޓްރީން ތައްޔާރު ވެވިފައި ނެތުމުން އެކަން ފޮރުވަން ވެގެން އެކަމުގެ ބަހަނާއެއްގެ ގޮތުން ދަރިވަރުން ކިޔަވަން އޮތް ވަގުތުވެސް ކުރުގަޅުވާލާފައިވާ ކަމަށެވެ. ގިނަ ބެލެނިވެރިން ދަނީ ސްކޫލް ހުޅުވުނުއިރުވެސް ދަރިވަރުންގެ ފޮތްތައް ނުލިބޭ ކަމުގެ ޝަކުވާ ކުރަމުންކަން އެމްޑީޕީގެ ބަޔާނުގައި ވަނީ ފާހަގަ ކޮށްފައެވެ.
އަދި ސްކޫލް ތަކަށް ބޭނުންވާ މުދައްރިސުން ހަމަނުވުމުގެ ޝަކުވާ ޕްރިންސިޕަލުންނާއި ޓީޗަރުންވެސް ކުރަމުންދާ ކަމަށާއި، އެކަމާ ނުރުހިގެން ސޯޝަލް މީޑިޔާގައި ޚިޔާލެއް ފާޅުކޮށްފިނަމަ، އެމީހަކާމެދު ފިޔަވަޅު އަޅާނެ ކަމުގެ އިންޒާރު ދެމުންދާ ކަމުގެ ޝަކުވާ ލިބިފައިވާ ކަމަށްވެސް އެމްޑީޕީ އިން ވަނީ ބުނެފައެވެ.
އެމްޑީޕީ އިން ބުނީ ދިރާސީ ކަލަންޑަރަށްވެސް އެއްވެސް ކަހަލަ ރޭވުންތެރި ކަމެއް ނެތި ގެންނަމުންދާ ބަދަލުގެ ސަބަބުން ދަރިވަރުންގެ ފިލާވަޅު ތަކުން ބޮޑު ބައެއް ގެއްލި، އުނގެނުމުގެ ތަރުތިއްބަޔަތުން ވަރަށް ބޮޑެތި ގެއްލުން ދަރިވަރުންނަށް ލިބެމުންދާ ކަމަށެވެ. ކުއްލި ކުއްލިއަށް ނިންމާ ނިންމުން ތަކުގެ ސަބަބުންނާއި، ބަހާނާއަަކަށް ވިއްސާރަ ހެދުމަށްފަހު، ދަރިވަރުން ފުރަތަމަ ހަފްތާގައި ކިޔަވަން އޮތް ވަގުތުކޮޅުވެސް ކުރުކޮށްލުމުން ދަރިވަރުންނަސް ގެއްލޭ ބައިތައް އިތުރުވަމުންދާނެ ކަމަށް ބުނެފައިވެއެވެ.
އެހެންކަމުން އާ ދިރާސީ އަހަރު އެޑިޔުކޭޝަން މިނިސްޓްރީން ހަރުދަނާ ނިންމުންތަކެއް ނިންމުމަށްވެސް އެމްޑީޕީން ވަނީ ގޮވާލާފައެވެ.
