ރާއްޖެއަށް މަސްތުވާތަކެތި އެތެރެވިޔަ ނުދިނުމަށް ކުރަމުން އަންނަ މަސައްކަތް ތަކުގެ ދަށުން މި އަރުގެ މާޗް 1 ފެށިގެން މެއި މަހުގެ 2 ދުވަހާއި ހަމައަށް މަގުމަތީ އަގު 35 މިލިޔަން ރުފިޔާގެ މަސްތުވާތަކެތި އަތުލައިގެންފައިވާ ކަމަށް މޯލްޑިވްސް ކަސްޓަމްސް ސާވިސްއިން ބުނެފިއެވެ.
އެކަމާބެހޭ މައުލޫމާތު މީޑިޔާއަށް ހިއްސާ ކުރުމަށް މިއަދު ބޭއްވި ނިއުސް ކޮންފަރެންސްގައި ޑިޕިއުޓީ ކޮމިޝަނާރ އޮފް ކަސްޓަމްސް އިބްރާހިމް މަފާޒު ވިދާޅުވީ އެ މުއްދަތުގައި ރާއްޖެއަށް މަސްތުވާތަކެތި އެތެރެވިޔަ ނުދިނުމަށް ކަސްޓަމްސްއިން ހިންގި އޮޕަރޭޝަންގައި އެބާވަތުގެ 12 މައްސަލަައެއް ހޯދައި 22 ކިލޯއަށް ވުރެންގިނަ މަސްތުވާތަކެތި އަތުލައިގެންފައިވާ ކަމަށެވެ.
މަފާޒު ވިދާޅުވީ ރާއްޖެއަށް މަސްތުވާތަކެތި އެތެރެވިޔަ ނުދިނުމަށް އާއްމު ރައްޔިތުންގެ އެހީތެރިކަން ބޭނުންވާ ކަމަށެވެ.
އެގޮތުން ރާއްޖެއިން ބޭރުން އަންނައިރު ނުދަންނަ މީހުން ހަވާލުކުރާ ލަގެޖްފަދަ ތަކެއްޗާއި ހަވާލު ނުވުމާއި، ދަންމީހުން ދޭ އެއްޗެއްސާއި ހަވާލުވާއިރުވެސް، ތިމާ އެތަނުގައި ހުރެގެން އެތަކެތި ޕެކް ކުރުމަށް ސަމާލުވުމަށް އޭނާ ވިދާޅުވިއެވެ.
އޭގެއިތުރުން އެކި މީހުންގެ ނަމުގައި ޕޯސްޓް ތަކެތި އަންނައިރު، އެމީހަކު އޯޑަރު ނުކުރާ އެއްޗެއް އެމީހެއްގެ ނަމުގައި އައިސްފިނަމަ އެފަދަ ތަކެއްޗާ ހަވާލު ނުވުމަށްވެސް އޭނާ އެދި ވަޑައިގެންނެވިއެވެ. އޭނާ ވިދާޅުވީ އެފަދަ އެއްވެސް ކަމެއްގައި ޝައްކު ތަކެއް އުޅޭނަމަ، ކަސްޓަމްސްގެ ހޮޓްލައި 1416 އަށް ގުޅުމަށް އިލްތިމާސް ކުރައްވާ ކަމަށެވެ.
