ދިވެހި ރާއްޖޭގެ އަންހެނުން ކުރިއަރުވާށޭ ކިޔައިގެން ހުރިހާ ސިޔާސީ ޕާޓީއަކުންވެސް ދައްކަނީ ފޮނި ވާހަކަ ކަމަށް މެމްބަރު ރޮޒައިނާ އާދަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިޚާބު ތަކުގައި އަންހެނުންނަށް ޚާއްސަ ގޮނޑި ތަކެއް ކަނޑައަޅަން ދަ ޑިމޮކްރެޓްސްގެ ފަރާތުން މަޖިލީހަށް ހުށަހެޅި ބިލު، އެ ޕާޓީގެ ފަރާތުން އަނބުރާ ގެންގޮސްފައި ވަނިކޮށް ރޮޒައިނާ މިއަދު ކުރެއްވި ޓްވީޓެއްގައި ވިދާޅުވީ އަންހެނުން ކުރިއަރުވާށޭ ކިޔައިގެން ހުރިހާ ޕާޓީއަކުންވެސް ދައްކަނީ ފޮނި ވާހަކަ ކަމަށާއި، އަދި ސަރުކާރު ތަކުން، އދ. ގެ މުއާހަދާ ތަކުގައި އަންހެނުން ކުރިއަރުވާށޭ ކިޔައިގެން ސޮއި ކުރަނީވެސް ކަންދައްކަން ކަމަށެވެ.

"ހަގީގަތުގައި ކަމެއް ކުރަން ޖެހުނީމަ އޮންނަނީ ބަހަނާ ދެއްކުން. އެއްވެސް ބަޔަކު ކުރާކަށް ބޭނުމެއްނުވޭ" ރޮޒައިނާ ވިދާޅުވިއެވެ.

ރޮޒައިނާ ވިދާޅުވީ އަންހެނުން ބާރުވެރި ކުރުވުމަށް ކުރީގެ ރައީސް އިބްރާހިމް މުޙަންމަދު ސޯލިހު (އިބޫ) ކުރެއްވި ވަރު ކުރެވުނު ވެރިޔަކުވެސް އަދި ވަޑައިނުގަންނަވާ ކަމަށާއި، "ދެން ދާނީ ހަމަ ފަހަތަށްކަން މިއަދު ވަރަށް ސާފު ވެއްޖެ" ކަމަށެވެ.

ރޮޒައިނާ ވަނީ މަޖިލިސް އިންތިޚާބުގައި މިފަހަރުވެސް ގޮނޑި ކާމިޔާބު ކުރެއްވި އަންހެނުން މަދުވުމުގެ ކަންބޮޑުވުން މީގެކުރިންވެސް ފާޅު ކުރައްވާފައެވެ. އެގޮތުން މަޖިލީހަށް 90 ފިރިހެން ބޭފުޅުން ހޮވުނުއިރު އެންމެ ތިން އަންހެން ބޭފުޅުން ހޮވިގެން ދިޔުމަކީ އިންސާފު ނޫން ކަމަށްވެސް ވިދާޅުވެފައިވެއެވެ. މަޖިލީހުގެ އިތުރުން ކައުންސިލް ތަކުގެ އިންތިޚާބުގައިވެސް އަންހެނުންނަށް ޚާއްސަ ފުރުޞަތެއް ހިމެނުމަށް ރޮޒައިނާ ދަނީ ވަކާލާތު ކުރައްވަމުންނެވެ.