މިހާރު އޮތް ރައްޔިތުންގެ މަޖިލީހުން ސަރުކާރުކާރަށް އެއްބާރުލުން ދީފައި ނުވަނީ ކޮންކަމެއްތޯ ރައްޔިތުންގެ މަޖިލީހުގެ ރައީސް މުޙަންމަދު އަސްލަމް، ރައީސުލްޖުމްހޫރިއްޔާ ޑރ. މުހަންމަދު މުއިއްޒަށް ސުވާލެއް ދޫކޮށްލައްވައިފިއެވެ.

މަޖިލީހުގެ ރައީސް އަސްލަމްގެ މި ސުވާލު ރައީސުލްޖުމްހޫރިއްޔާއަށް ދޫކޮށްލެއްވީ، އެމްޑީީގެ މެޖޯރިޓީ އޮވެ، މިހާރުވެސް ސަރުކާރަށް އެއްބާރުލުން ނުދޭ ކަމަށް ރައީސް ވިދާޅުވުމާއި ގުޅިގެންނެވެ.

އަސްލަމް ވިދާޅުވީ މިހާތަނަށް ސަރުކާރުން ބޭނުންވި ގޮތަކަށް ބޭނުން ކަމެއްގައި މަޖިލިސް ތެރެއިން އެއްބާރުލުން ދީފައިވާނެ ކަމަށެވެ. އެގޮތުން މިހާތަނަށް ސަރުކާރުން މަޖިލީހަށް ފޮނުވި ކަންކަމުގެ ތެރެއިން ބަޖެޓް ފާސްކޮށް ދިނުމާއި 22 ވަޒީރަކަށް ރުހުން ދިނުމަށް ފޮނުވުމުން ތިން ވަޒީރެއް ފިޔަވައި ހުރިހާ ވަޒީރުންނަށްވެސް ރުހުން ދީފައިވުން އަސްލަމް ފާހަގަ ކުރެއްވިއެވެ.

އަދި މަޖިލިސް ޗުއްޓީއަށް ނުގޮސް ދިގު ދަންމާލުމަށްފަހު، ސަރުކާރުން ބޭނުންވި ގޮތަށް ހުރިހާ ކަމެއް ކޮށްދީފައިވާނެ ކަމަށް ވިދާޅުވިއެވެ. މީގެއިތުރުން ރައީސް މުއިއްޒު، ރައީސުލްޖުމްހޫރިއްޔާ ކަމުގެ ހުވާ ކުރެއްވުމުގެ ދަރުބާރުގެ އެންމެހާ ކަންކަން ބޭނުންފުޅުވި ގޮތަށް މަޖިލީހުން ރާވައި ކުރިޔަށް ގެންދިޔުންވެސް މަޖިލީހުގެ ރައީސް ފާހަގަ ކުރެއްވިއެވެ.

އަސްލަމް ވިދާޅުވީ ރައްޔިތުންގެ މަޖިލީހަކީ އެއިރެއްގައި އޮންނަ ސަރުކާރަކުން ބޭނުންހާ ގޮތަކަށް ކަންކަން ނިންމައިދޭން އޮންނަ ތަނެއް ނޫން ކަމަށެވެ.