ލިޔުނީ: ޝިފްނާ ވަހީދު
ދުޅަހެޔޮ ސިއްޙަތުގެ ތެރޭގައި ހިމެނޭ ނަފްސާނީ ދުޅަހެޔޮކަމަކީ އަހަރެމެންގެ މުޖުތަމަޢުގައި ގިނަ ފަހަރަށް ފަރުވާކުޑަ ކުރެވޭ ކަމެކެވެ.
އެއީ އަހަރެމެންގެ ޖަޒުބާތީ، ނަފްސާނީ، އަދި އިޖުތިމާއީ ކަންކަމުގެ މައްޗަށް، އަހަރެމެންގެ ވިސްނުމާއި، އިހުސާސްތަކާއި، އަމަލުތަކާއި އެއްފަދަ ކަމެކެވެ. އަދި ހާސްވުމާއި ދިރިއުޅުމުގައި ދިމާވާ މައްސަލަތައް ޙައްލުކުރުމާއި، އެހެން މީހުންނާ ގުޅުން ބަދަހިކުރުމާއި، އަމިއްލަ އިޚްތިޔާރުތަކާއި ނިންމާ ނިންމުންތަކާއި ގުޅިފައިވާ ކަމެކެވެ. ގިނަ މުޖުތަމަޢުތަކެކޭ އެއްފަދައިން، ދިވެހިރާއްޖޭގައިވެސް ނަފްސާނީ ދުޅަހެޔޮކަމުގެ މުހިންމުކަން ދެނެގަތުން އިތުރުވަމުންދާކަން ފާހަގަކޮށްލެވެއެވެ.
ނަމަވެސް ނަފްސާނީ ކަންތައްތަކާއި ދޭތެރޭ ދެކޭގޮތް ނުވަތަ އެކަމުގައި ހޭލުންތެރިކަން އަދިވެސް އިތުރުކުރަން ޖެހެއެވެ. ނަފްސާނީ މައްސަލަ ތަކަކީ ބަލިކަށިކަމުގެ ނިޝާނެއް ނުވަތަ އަޚްލާޤީ އުނިކަމެއް ނޫންކަން ހަނދާން ބެހެއްޓުމަކީ ކޮންމެހެން ކުރަންޖެހޭ ކަމެކެވެ. އެއީ އުމުރާއި، ޖިންސާއި، އިޖުތިމާޢީ ޙާލަތަށް ބެލުމެއްނެތި، ކޮންމެ މީހަކަށްވެސް އަސަރުކޮށްފާނެ ސިއްޙީ މައްސަލަތަކެކެވެ.
ނަފްސާނީ ސިއްހަތަށް އެކި ކަންތައްތަކުގެ އަސަރު ފޯރާފާނެ ކަމަށާއި އޭގެތެރޭގައި ޖެނެޓިކްސް ފަދަ ބަޔޮލޮޖިކަލް ކަންތައްތަކާއި، ޓްރޮމާ ނުވަތަ އަނިޔާ ފަދަ ދިރިއުޅުމުގެ ތަޖުރިބާތަކާއި، ނަފްސާނީ ސިއްހަތުގެ މައްސަލަތަކުގެ އާއިލީ ތާރީޚު ހިމެނެއެވެ. ނަފްސާނީ ސިއްހަތުގެ އާންމު މައްސަލަތަކުގެ ތެރޭގައި ޑިޕްރެޝަން، ހާސްކަން، ބައިޕޯލާ ޑިސްއޯޑަރ، ސްކިޒޯފްރެނިއާ، އަދި ޕޯސްޓް ޓްރޮމެޓިކް ސްޓްރެސް ޑިސްއޯޑަރ ހިމެނެއެވެ.
ނަފްސާނީ ދުޅަހެޔޮކަން މުޖުތަމަޢުގައި އަށަގަންނުވަން އަދި އެކަން ހޭލުންތެރިކޮށް ކުރިއެރުވުމަށް މިކަމަށް ތާއީދުކުރާ އަދި ވިސްނުންތެރި މުޖުތަމައެއް އުފެއްދުން ވަރަށް މުހިއްމެވެ. އެއީ ފެންވަރު ރަނގަޅު ނަފްސާނީ ސިއްހަތުގެ ހިދުމަތްތައް ފޯރުކޮށްދިނުމާއި ނަފްސާނީ ސިއްހީ މައްސަލަތަކާ ކުރިމަތިލާން ޖެހޭ މީހުންނަށް ބޭނުންވާ ފަރުވާއާއި އެހީތެރިކަން ލިބޭނެ ގޮތް ހެދުމަށެވެ.
އަހަރެމެން ހަނދާން ކުރަންޖެހޭނީ، އޯގާތެރިކަމާއި، ވިސްނުންތެރިކަމާއެކު، އެހެން މީހުންގެ އިހުސާސް ތަކަށް އަޅާލައި، އިސްލާމްދީނުގެ އުނގަންނައިދިނުންތަކެވެ. އަހަރެމެން މަސައްކަތް ކުރަންވީ ނަފްސާނީ ސިއްހަތުގެ މައްސަލަތަކާއި ކުރިމަތިލާން ޖެހިފައިވާ މީހުންނަށް އެހީތެރިވެ ދިނުމަށާއި، ނަފްސާނީ ސިއްހަތަށް އިސްކަންދޭ މުޖުތަމަޢެއް އުފެއްދުމަށް މަސައްކަތް ކުރުމެވެ.
