ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ފިޔަވައި ރާއްޖޭގައި ދެންތިއްބެވި ސިޔާސީ ހުރިހާ ލީޑަރުން ކުރިއަށް އޮތް ރިޔާސީ އިންތިޚާބުގައި ރައީސް ޔާމީންގެ ފަހަތަށްއެރުމަށް ޕީއެންސީގެ ނައިބް ރައީސް އިބްރާހިމް ޝުޖާ ގޮވާލައިފިއެވެ.
ޖުމްހޫރީ ޕާޓީން ރިޔާސީ އިންތިޚާބުގައި ޕީޕީއެމްއާއިއެކު ކޯލިޝަން ހެދުމަށް ފޮނުވާފައިވާ ދައުވަތާއިއެކު އެޕާޓީގެ އިސްބޭފުޅުން ގެންދަވަނީ އެބޭފުޅުންގެ ޝުއޫރުތައް ފާޅު ކުރައްވަމުންނެވެ. ހުޅުމާލެ ދާއިރާގެ ކައުންސިލަރު އިބްރާހިމް ޝުޖާ ވިދާޅުވީ ރައީސް ޔާމީންގެ ޓީމުން 5 އަހަރު މަގުމަތީ ގައި ރައީސް ޔާމީންއަށް ދެމުންދާ އަނިޔާ އާއި ރައްޔިތުންނަށް ލިބެމުންދާ ގެއްލުމުގެ ވާހަކަ ދެއްކުމުގަ ކެނޑިނޭޅި ދަނީ މަސައްކަތް ކުރަމުންކަމަށެވެ.
ޤައުމުގެ މިނިވަން ކަމާއި އިސްތިޤްލާލް ގެއްލިގެން އެވާހަކަ ދެއްކުމުގަ! ކޮވިޑުން ކުރި ވައްކަމާއި ރާއްޖޭގެ މަސްކަނޑު ވިއްކާލި ވާހަކަ ދެއްކުމުގަ. ރައީސް ސޯލިހާއި އޭނަގެ ކޯލިޝަން ބައިވެރިން މިހުރިހާ ކަމެއް ދިމާވި އިރު އޭނާ އަށް އެހީތެރިކަން ދިނުމުގައި އަވަދި ނެތި! ބަދަލު ހޯދާމީހުން ބަދަލު ހޯދުމުގަ! ފަޅު ހޯދާމީހުން ފަޅު ހޯދުމުގަ! ޤައުމު އެދިގޮވަމުން ދިޔައީ މަމިއޮއްގެން ހަނާވަނިއްޔޭ! އެއަޑު އެއްސެވީ ރައީސް ޔާމިނާއި އެމަނިކުފާނުގެ ލީޑަރުންނާއި ސަޕޯޓަރުން.
– ޝުޖާ ވިދާޅުވިއެވެ.
އޭނާ ވިދާޅުވީ ވެރިކަން ހޯދުމުގެ ދަހި ވެތިކަމުގައި މިއަދު ކުއްލިއަކަށް ހުރިހާ ސިޔާސީ ލީޑަރުންނަށް ރައީސް ޔާމީން ފެނި ރައީސް ޔާމީން އެބޭފުޅުންގެ ފަހަތަށް އެރުމަށް އެދެމުންދާކަމަށެވެ. ނަމަވެސް ރައީސް ޔާމީނަކީ މިހާރުވެސް ރާއްޖޭގެ އެއްލައްކަ ސަޕޯޓަރުންގެ ތާއީދު އޮތް ވެރިއަކަށް ވާއިރު އެމަނިކުފާނު އެއްވެސް ބޭފުޅެއްގެ ފަހަތަށް އަރަން ނުޖެހޭކަމަށެވެ.
ރައީސް ޔާމީންގެ 100،000އަށް ވުރެ ގިނަ ސަޕޯޓަރުން މިރާއްޖޭގައި އެބަތިއްބެވި. އެމަނިކުފާނުގެ ޕާޓީގައި 60،000 އަށް ވުރެ ގިނަ މެމްބަރުން އެބަ ތިއްބެވި. އެހުރިހާ ފަރާތްތަކެއްގެ އެދުމާއި އާދޭހަކީ ޤައުމު މިހާލުގައި ޖެއްސި ލީޑަރުންގެ "ފަހަތަށް ނޭރުމަށް. އަޅުގަނޑުމެން އެރައްޔިތުންގެ އެދުން ބޮލާލައި ނުޖަހާނަށް. ރައީސް ސޯލިހުގެ ކިބައިން މިޤައުމު ސަލާމަތް ކުރަން އެދޭނަމަ ރައީސް ސޯލިހު ފިޔަވާ ހުރިހާ ސިޔާސީ ލީޑަރުން ޕީ.ޕީ.އެމްގެ ރިޔާސީ ކެނޑިޑޭޓް ރައީސް ޔާމިނާއެކު ކުރިއަށް ދިއުމަށް ވަޑައިގަންނަވާ. މުޅި ޕާޓީގެ ހުރިހާ ދޮރުތަކެއް ވަނީ ހުޅުވާލެވިފަ.
– ޝުޖާ ވިދާޅުވިއެވެ.
މި އަހަރުގެ ރިޔާސީ އިންތިހާބަށް ކޯލިޝަން ހެދުމުގެ މަޝްވަރާ ކުރުމުގެ ދައުވަތު ޕީޕީއެމަށް ދެއްވަން ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް ނިންމެވިޔަސް އެކަން ގަބޫލު ކުރެވެން ނެތް ކަަމަށާއި އެހެން ޕާޓީތަކުން އަންނަން ޖެހޭނީ ޕީޕީއެމްގެ ފަހަތަށް ކަމަށް އެޕާޓީން ވަނީ ބުނެފައެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ޖޭޕީގެ ޓިކެޓްގައި ނުކުމެވަޑައިގަންނަވަން ގާސިމް ނިންމެވިއިރު، އޭނާގެ ފަހަތުގައި މިހާރު ހުންނެވީ ކުރީގެ ރައީސް މުހައްމަދު ނަޝީދާއި އެ މަނިކުފާނުގެ "ފިކުރެއްގެ ދިރުން" ޓީމެވެ. އެ ޓީމުން ގާސިމާއި ޖޭޕީގެ އެކި ބޭފުޅުންނާ އެކި ފަހަރު މަތިން ބައްދަލުކުރައްވައި ވަނީ މަޝްވަރާތައް ބާއްވައިފައެވެ.
