ރާއްޖެއިން ނައްތާލާފައިވާ ބައްޔެއް ކަމަށްވާ ހިމަބިހި އައްޑޫއިން ފެނިގެން ފިޔަވަޅު އަޅަމުންދާ ކަމުގައި ހެޗްޕީއޭއިން ބުނެފިއެވެ. އެޗްޕީއޭއިން ނެރުނު ބަޔާނެއްގައި ބުނެފައިވަނީ މިއަދު އައްޑޫ އިން މީސްލްސް (ހިމަބިހި)އަށް ކުޑަކުއްޖަކު ވަނީ ޕޮޒިޓިވް ވެފައި ކަމުގައެވެ. އަދި އިތުރު އެއް ކޭސް ދެނެގަނެވި ސާމްޕަލް ނަގައި ޓެސްޓް ހެދުމުގެ މަސައްކަތް މިހާރު ކުރިޔަށްދާ ކަމުގައިވެސް އެޗްޕީއޭއިން ބުނެފައި ވެއެވެ.
އެޗްޕީއޭއިން އިތުރަށް ބުނެފައިވަނީ އިންފެކްޝަސް ޕީރިއަޑް ފަހަނަ އަޅާފައިވާތީ ދެކުދިންގެ ފަރާތުން އިތުރަށް ބަލި ފެތުރުމުގެ ފުރުސަތެއް ނެތް ކަމުގައެވެ.
އެޗްޕީއޭގެ ބަޔާނުގައި ބުނެފައިވަނީ، ހިމަބިއްސަކީ ރާއްޖެއިން ނައްތާލާފައިވާ ބައްޔަކަށްވާތީ، މިބަލީގެ އެންމެ ކޭސްއެއް ފެނުނު ކަމުގައިވިނަމަވެސް ބެލެވޭނީ އައުޓު ބްރޭކެއް ކަމުގައެވެ. އެހެންކަމުން މިހާލަތުގައި އަމަލުކުރަންޖެހޭ އުސޫލުގެ ދަށުން، ކޮންޓެކްޓުން ދެނެގަތުމާއި، ބަލިޖެހެން މެދުވެރިވީ ސަބަބު ދެނެގަތުމުގެ މަސައްކަތް އެޗްޕީއޭގެ ލަފާގެމަތިން އައްޑޫ އިކުއެޓޯރިއަލް ހޮސްޕިޓަލުން ކުރިޔަށް ގެންދާކަމުގައި ބަޔާނުގައި ބުނެފައިވެއެވެ.
އަދި ވެކްސިން ދޭންޖެހޭ ފަރާތްތަކަށް ވަރަށް އަވަހަށް ވެކްސިން ދޭން ފަށާނެކަމަށްވެސް އެޗްޕީއޭއިން ބުނެފައި ވެއެވެ.
ހިމަބިހީގެ މައިގަނޑު އަލާމާތްތަކަކީ:
- ހުން އައުން
- ހަމުގައި ރަތް ބިހިތަކެއް ނެގުން ކެއްސުން، އަރިދަފުސް ފޭބުން އަދި ލޯ ރަތްވުން ފަދަ އަލާމާތްތައް ވެސް ބައެއް މީހުންގެ ފަރާތުން ފެނުން އެކަށީގެންވޭ
މިފަދަ އެއްވެސް އަލާމާތެއް ފެނިއްޖެ ނަމަ ސިއްހީ ޚިދުމަތްތެރިއެއްގެ ލަފާ ހޯދުމަށް އެޗްޕީއޭއިންވަނީ އިލްތިމާސް ކޮށްފައެވެ.
