ޖުމުހުރީ ޕާޓީގެ ލީޑަރު ގާސިމް އިބުރާހިމްގެ އެޑްވައިޒަރުކަމަށް ހަމަޖެއްސެވި، ކޮންޓްރޯލަރ އޮފް އިމިގްރޭޝަންގެ މަގާމުގައި ހުންނެވި މުހައްމަދު ހުސެއިން އަބުދުލް ޢަނީ (ހަނަފީ)، އެޑްވައިޒަރުކަށް އައްޔަން ކުރިތާ 24 ގަޑިއިރު ނުވަނީ ޖޭޕީން ވަކިވެއްޖެއެވެ.

އޭނާ ޖޭޕީން ވަކިވާން، އެޕާޓީގެ ލީޑަރަށް ފޮނުއްވި ސިޓީގައި ވިދާޅުވެފައިވަނީ ޖޭޕީގެ ވިސްނުން މިހާރު ހުރީ ގައުމަށް އެންމެ ފައިދާ ހުރި ގޮތަށްކަމަށް އޭނާ އަށް ގަބޫލު ނުކުރެއްވޭތީ ޕާޓީން އިސްތިއުފާ ދެއްވީ ކަމުގައެވެ.

ހަނަފީ ޖުމުހޫރީ ޕާޓީން އިސްތިއުފާ ދީފައިވާއިރު، އޭނާވަނީ ފާއިތުވި އެޕާޓީގެ ގައުމީ ކޮންގްރެސްގައި އެޕާޓީގެ ޑެޕިއުޓީ ލީޑަރުކަމަށް ވާދަކުރައްވާފައެވެ. އެހެންނަމަވެސް އެއިންތިޚާބު އޭނާއަށް ކާމިޔާބު ކުރެއްވިފައެއް ނުވެއެވެ.

ޖޭޕީން ރިޔާސީ އިންތިޚާބުގައި ވާދަކުރުމަށް ނިންމުމާއި ގުޅިގެން އެޕާޓީގެ ސްލޮޓުގައި ތިބި ޖޭޕީގެ އިސްބޭފުޅުން މަގާމުން އިސްތިއުފާދިނުމަށް އެމްޑީޕީގެ އެކްޓިވިސްޓުން ވަނީ ޑިމާންޑްކުރަން ފަށާފައެވެ. އެހެންނަމަވެސް ރައީސް ސާލިހުގެ ކެބިނެޓުގައި ތިއްބެވި އެއްވެސް ވަޒީރަކު އަދި މިހާތަނަށް މަގާމުން ވަކިކޮށްފައި ނުވާއިރު، ޖޭޕީގެ ސްލޮޓުގައި ފިޝަރީޒް މިނިސްޓަރުކަމުގައި ހުންނެވި ޑރ. ހުސެއިން ރަޝީދު ހަސަންވަނީ މަގާމުން އިސްތިއުފާ ނުދެއްވާނެކަމަށް ވިދާޅުވެފައެވެ.

އެހެންނަމަވެސް ޖުމުހޫރީ ޕާޓީން ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް އެޕާޓީގެ ކައުންސިލުން ނިންމާއެކު، ރައީސް އޮފީހުގެ މިނިސްޓަރު ކަމުގައި ހުންނެވި އެޕާޓީގެ ކުރީގެ ސެކެޓްރީ ޖެނެރަލް އަހުމަދު ސަމީރުވެސް ވަނީ ޖޭޕީން ވަކިވެފައެވެ.

ޖުމުހޫރީ ޕާޓީންވަނީ ކުރިޔަށް އޮތް ރިޔާސީ އިންތިޚާބަށް އެޕާޓީގެ ޓިކެޓުގައި ވާދަކުރުމަށް ފުރުސަތު ހުޅުވާލާފައެވެ. އެ މުއްދަތު ހަމަވާނީ މިމަހުގެ 30ގެ ނިޔަލަށެވެ.