ރިޔާސީ އިންތިޚާބު ކާމިޔާބުކުރުމުގެ އެއްވެސް ފުރުސަތެއް ކުދި ޕާޓީތަކަށް ނެތްކަމަށާ، މިހާރު ފެންނަން އޮތް ހަޤީޤަތަށް ބަލާއިރު ރައީސް އިބްރާހީމް މުޙައްމަދު ޞާލިޙު ނޫން ކެންޑިޑޭޓެއްވެސް އަދި ޗޮއިސްއެއްވެސް ނެތްކަމުގައި ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
މަވޯޓާ ކުރެއްވި ޓްވީޓެއްގައި ވިދާޅުވެފައިވަނީ، ރިޔާސީ އިންތިޚާބު ކާމިޔާބުކުރުމުގެ އެއްވެސް ފުރުސަތެއް އޮތީ މިވަގުތު ދެ ޕާޓީއަކަށް ކަމަށެވެ. އެއީ ވެރިކަންކުރާ މައި ޕާޓީ އެމްޑީޕީއާއި އިދިކޮޅު ޕީޕީއެމްކަމަށް އޭނާ ވިދާޅުވިއެވެ. ކުދި ޕާޓީތަކަށް އެފަދަ ފުރުސަތެއް ނެތްކަން ހިނގައިދިޔަ އިންތިޚާބުތަކުން ފެންނަން އެބައޮތްކަމަށް މަވޯޓާ ވިދާޅުވިއެވެ.
މިއަދުގެ ހަޤީޤަތަށް ބަލާއިރު އެމްޑީޕީގެ ރިޔާސީ ކެންޑިޑޭޓު އިބްރާހީމް މުޙައްމަދު ޞާލިހު ވަނީ ބޮޑުތަކުން ކުރީގައިކަމަށާ، އިދިކޮޅު ޕީޕީއެމްގެ ކެންޑިޑޭޓު ޝަރުޢީ ބަންދެއްގައި ވާއިރު، އިތުރު ކެންޑިޑޭޓަކު އިދިކޮޅުން ނެރުން އަދިވެސް އޮތީ ވާނުވާގައިކަމަށް މަވޯޓާ ވިދާޅުވިއެވެ. އެހެންކަމުން މިވަގުތަށް ބަލާއިރު އޮތް ހަމައެކަނި ޗޮއިސްއަކީ ރައީސް ޞާލިޙުކަމަށް އޭނާ ވިދާޅުވިއެވެ.
Riyaasee inthikhaabu kaamiyaabu kurumuge evves furusath eh othee maigadu dhe party MDP aa PPM in nerey candidatunnah. Kudhi party thakah e furusath neikan hingaa dhiya hurihaa inthikhaabakun fennan eba oi. Miadhu MDP candidate @ibusolih othee boduthanun kureega
— Ibrahim Shareef (@AdduShareef) February 11, 2023
މަވޯޓާ ޝަރީފަކީ އެމްޑީޕީގެ ދެ ފެކްޝަނުގެ ތެރެއިން ރައީސް ޞާލިޙުގެ ފެކްޝަނަށް ނިސްބަތްވާ މަޖިލިސް މެމްބަރެކެވެ. އޭނާ އަންނަނީ އިދިކޮޅު ޕީޕީއެމްއަށާއި، އެމްޑީޕީގެ ނަޝީދު ފެކްޝަނަށް ވަރަށްބޮޑަށް ފާޑުކިޔަމުންނެވެ. އަދި ރައީސް ޞާލިޙަށް ދެވަނަ ދައުރެއް ދޭންޖެހޭކަމަށް އެންމެބޮޑަށް ވަކާލާތުކުރައްވާ ބޭފުޅުންގެތެރޭގައި މަވޯޓާ ހިމެނިވަޑައިގަންނަވައެވެ.
