ރާއްޖެއަށް ޑްރަގު އެތެރެކުރި މީހަކު ހައްޔަރުނުކޮށް ދޫކޮށްލުމަކީ ބަލައިގަނެވޭނެކަމެއް ނޫންކަމަށް މަޝްހޫރު ދީނީ ޢިލްމުވެރިޔާ ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޑރ.ޝަހީމް މިހެން ވިދާޅުވީ މިމަހުގެ 7ވަނަ ދުވަހު 2.6 ކިލޯގެ މަސްތުވާތަކެތި، އަގުގެގޮތުން ބަލާނަމަ 6.5 މިލިޔަން ރުފިޔާގެ މަސްތުވާތަކެތި އެތެރެކުރި މީހަކު ހައްޔަރުނުކޮށް އަނބުރާ ފޮނުވާލި މައްސަލާގައި ކުރެއްވި ޓްވީޓެއްގައެވެ. ޑރ.ޝަހީމް ވިދާޅުވީ ދައުލަތުގެ ހައިބަތު ނަގަހައްޓައި ޤާނޫނު ހިންގަން ޖެހޭކަމަށެވެ. ޑްރަގު އެތެރެކުރާ ފަރާތް ދޫކޮށްލުމަކީ އެފަދަ ޢަމަލުތައް ހިންގާ ފަރާތްތަކަށް ދެވޭނެ ހިތްވަރަކަށް ވާނެކަމަށާ، ވީމާ މިކަމުގައި ދެވަނަ ވިސްނުމަކަށް ދާންޖެހޭކަމަށް ޑރ. ޝަހީމް ވިދާޅުވިއެވެ.
ރާއްޖެއަށް ޑްރަގް އެތެރެކުރި ފަރާތް ހައްޔަރުނުކޮށް ދޫކޮށްލުމަކީ ބަލައިގަނެވޭނެކަމެއްނޫން. ދައުލަތުގެ ހައިބަތު ނަގަހައްޓައި ޤާނޫނު ހިންގަންޖެހޭ. ޑްރަގް އެތެރެކުރާ ފަރާތްތައް ދޫކޮށްލުމަކީ އެފަދަ ޢަމަލު ހިންގާ ފަރާތްތަކަށް ދެވޭނެ ހިއްވަރަކަށްވާނެ. ވީމާ ދެވަނަ ވިސްނުމަކަށް ދާންޖެހޭ.
— Mohamed Shaheem Ali Saeed (@Mohamedshaheem1) February 9, 2023
މިމަހުގެ 7ވަނަ ދުވަހު ރާއްޖެއަށް ޑްރަގު އެތެރެކުރި ޙާދިސާއާ ގުޅިގެން މޯލްޑިވްސް ކަސްޓަމްސްއިން ވިދާޅުވެފައިވަނީ ގަތަރުގެ ދޯހާއިން ރާއްޖެ އައި ބްރެޒިލް މީހެއްގެ އަތުން 2.6 ކިލޯގެ ކޮކެއިން އަތުލައިގެންފައިވާ ކަމަށެވެ. އުމުރުން 23 އަހަރުގެ އެ އަންހެންމީހާއާ މެދު ޝައްކު އުފުދިގެން އޭނާގެ ލަގެޖު ބަލާ ފާސްކުރިއިރު އޭގައި ގިނަ އަދަދެއްގެ މަސްތުވާތަކެތި ރައްކާ ކޮށްފައިހުރި ކަމަށް ކަސްޓަމްސްއިން ވިދާޅުވެފައިވެއެވެ.
އަދި ތަންފީޒީ އިދާރާތަކުގެ މަޝްވަރާއާއެކު، ޑްރަގު އެތެރެކުރި މީހާ ރާއްޖެއެތެރެވިޔަ ނުދީ އަނބުރާ ފޮނުވާލާފައިވާ ކަމަށްވެސް ކަސްޓަމްސްއިން ވަނީ ވިދާޅުވެފައެވެ.
