އެމްޑީޕީގެ އެތެރޭގެ ޕްރައިމެރީގައި އިދިކޮޅު ޕީޕީއެމްއަށް އެއްޗެހި ގޮވަންޏާ، އެކަމަށް ރައްދު ދެއްވާނެކަމަށް ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
2018ވަނަ އަހަރުގެ ރިޔާސީ އިންތިޚާބުގައި ރައީސް ޔާމީންގެ ރަނިންމޭޓަކަށް ނުކުންނެވި ޑރ.ޝަހީމަކީ ޕީޕީއެމްގެ އެޑްވައިޒަރެކެވެ. އެޕާޓީގެ މުހިންމު ޚާއްސަ ބައްދަލުވުންތަކުގައި މިހާރުވެސް ޑރ.ޝަހީމް ބައިވެރިވެވަޑައިގަންނަވައެވެ. މިހާރު ކުރިއަށްދާ އެމްޑީޕީގެ ރިޔާސީ ޕްރައިމެރީ ކެމްޕެއިންގައި ވާދަކުރައްވާ ރައީސް އިބްރާހީމް މުޙައްމަދު ޞާލިޙްގެ ކެމްޕެއިން ޖަލްސާތަކުގައި އިދިކޮޅު ޕީޕީއެމްއަށާއި ރައީސް ޔާމީނަށް ވަރަށްބޮޑަށް ފާޑިކުޔައެވެ. އެގޮތުން ރައީސް ޔާމީނާއި ޕީޕީއެމްއަށް އެންމެބޮޑަށް ފާޑުކިޔަމުންދާ ބޭފުޅުންގެތެރޭގައި ޚާރިޖީ ވަޒީރު ޢަބްދުﷲ ޝާހިދު ފާހަގަކޮށްލެވެއެވެ.
ޢަބްދުﷲ ޝާހިދު ޓެގްކުރައްވައި ޑރ.ޝަހީމް ކުރެއްވި ޓްވީޓެއްގައި ވިދާޅުވެފައިވަނީ ޕީޕީއެމް އަކީ ކޮންމެ ދިމާއަކުން ބިނާކުރަނިވި ޚިދުމަތްތަކެއް ޤައުމަށް ކޮށްދީފައިވާ ޕާޓީއެއްކަމަށެވެ. އަދި ރައީސް ޔާމީންގެ ވެރިކަމުގައި ޤާއިމުކުރި ބޮޑެތި ބިޔަ މަޝްރޫޢުތައް އެހުރީ ފެންނަންކަމަށާ، ޝާހިދުމެން އެތެރޭގެ ޕްރައިމަރީގައި ޕީޕީއެމަށް އެއްޗެހި ގޮވަންޏާ ރައްދު ދެވޭނެ ވާހަކަ ދަންނަވާކަމަށް ޑރ.ޝަހީމް ވިދާޅުވެފައިވެއެވެ.
ޕީޕީއެމް އަކީ ކޮންމެ ދިމާއަކުން ބިނާކުރަނިވި ޚިދުމަތްތަކެއް ޤައުމަށް ކޮށްދީފައިވާ ޕާޓީއެއް. ރޔ.ގެ ވެރިކަމުގައި ޤާއިމުކުރި ބޮޑެތި ބިޔަ މަޝްރޫޢުތައް އެހުރީ ފެންނަން. ޝާހިދުމެން އެތެރޭގެ ޕްރައިމަރީގައި ޕީޕީއެމަށް އެއްޗެހި ގޮވަންޏާ ރައްދު ދެވޭނެ ވާހަކަ ދަންނަވަން.@abdulla_shahid
— Mohamed Shaheem Ali Saeed (@Mohamedshaheem1) January 23, 2023
އެމްޑީޕީގެ ޕްރައިމެރީގައި ރައީސް ޞާލިޙް ރަށްރަށް ވަޑައިގަތުމުން އިދިކޮޅު ޕީޕީއެމްގެ ސަޕޯޓަރުން އަންނަނީ މުޒާހަރާކޮށް އެމަނިކުފާނުގެ އިސްތިއުފާއަށް ގޮވަމުންނެވެ. ބައެއް ރަށްރަށުގައި މިކަންކަން ހުއްޓުވަން ފުލުހުން ކުރާ މަސައްކަތާއެކު ހަމަނުޖެހުން އުފެދި ބައެއް މީހުން ހައްޔަރުވެސް ކުރެއެވެ. އަދި މާލޭގައިވެސް އިދިކޮޅުން އަންނަނީ ކޮންމެ ރެއަކު ސިލްސިލާ މުޒާހަރާތައް ބާއްވާމުންނެވެ.
