އެމްޑީޕީގެ އެއްވެސް މެންބަރަކަށް ނޭނގި އެހެން ޕާޓީ އަކަށް ވައްދާފައިވާނަމަ ފޯމް ފުރިހަމަ ކޮށް އިލެކްޝަންސް ކަމިޝަނަށް ހުށައެޅުމުން އެކަން ބަލާ އެމެންބަރަކު އެމްޑީޕީއަށް ރުޖޫއަ ކޮށްދޭނެކަމަށް އެޕާޓީން ބުނެފިއެވެ.
އެމްޑީޕީގެ ސެކްރެޓޭރިއަޓުން ކޮށްފައިވާ ޓްވީޓެއްގައިވަނީ މިކަމަށްޓަކައި ފޯމު ފުރުމަށް ލިންކެއް ޝެއަރކޮށްފައެވެ. ނޭނގި ޕާޓީން އުނިވެފައިވާނަމަ ނުވަތަ އެހެން ޕާޓީއެއްގެ ދަފުތަރުގައި ހިމެނިފައި އޮތްނަމަ ފުރިހަމަކުރަން ޖެހެނީ ސިޔާސީ ޕާޓީތަކުގެ ދަފްތަރަށް ޝަކުވާ ހުށަހަޅާ ފޯމެވެ. މިއީ އިލެކްޝަންސް ކޮމިޝަނުގެ ފޯމެކެވެ. މި ފޯމު ފުރިހަމަކުރުމަށްފަހު އެކޮމިޝަނަށް މައްސަލަ ހުށަހެޅުމުން އެކަމެއް ހިނގާފައި އޮތްގޮތް ބެލުމަށްފަހު ރަނގަޅުކުރާނެކަމަށް އެމްޑީޕީން ބުނެއެވެ.
އެމްޑީޕީގެ އެއްވެސް މެންބަރަކަށް ނޭނގި އެހެން ޕާޓީ އަކަށް ވައްދާފައިވާނަމަ ތިރީގައިމިވާ ލިންކްގައިވާ ފޯމް ފުރިހަމަ ކޮށް އިލެކްޝަންސް ކަމިޝަނަށް ހުށައެޅުމުން އެކަން ބަލާ އެމެންބަރަކު އެމްޑީޕީ އަށް ރުޖޫއަ ކޮށްދޭނެhttps://t.co/4e7GsGoPBV
— MDP Secretariat (@MDPSecretariat) December 21, 2022
ސިޔާސީ ޕާޓީތަކުގެ ރަޖިސްޓްރީގައި ތިބޭ މީހުން ނޭނގި އެމީހުންތިބި ޕާޓީން އުނިވުމާއި ސޮއިނުކުރާ ޕާޓީތަކުގެ ދަފްތަރުގައި ހިމެނުމުގެ މައްސަލައަކީ އަބަދުވެސް އަޑުއިވޭ ވާހަކައެކެވެ. ބޮޑެތި ޕާޓީތަކުން މިކަމުގެ ޝަކުވާ ކުރެއެވެ. ޚާއްސަކޮށް ޕާޓީތަކުގެ އެތެރޭގެ އިންތިޚާބުތަކުގެ ދުވަސްވަރު މިޝަކުވާގެ އަޑުގަދައެވެ.
ވެރިކަންކުރާ މައި ޕާޓީ، އެމްޑީޕީގެ މެންބަރުންގެ ދަފްތަރު ގަޑުބަޑުކޮށްފައިވާކަމަށް އެމްޑީޕީގެ ރައީސް މުޙައްމަދު ނަޝީދާއި ނަޝީދަށް ތާޢީދުކުރާ މީހުން އަންނަނީ ބުނަމުންނެވެ. ނަޝީދު މިހެން ވިދާޅުވީ އެމްޑީޕީގެ ރިޔާސީ ޕްރައިމަރީގައި ވާދަކުރުމުގެ ފުރުޞަތު އެޕާޓިން ހުޅުވާލުމާއެކުއެވެ. މިމަހުގެ 24ގެ ކުރިން ޕްރައިމަރީގައި ވާދަކުރަން ނަން ހުށައެޅުމަށް އެދިފައިވާއިރު، 500 މެންބަރުންގެ ސޮއި ބޭނުންވާނެއެވެ.
އެހެންނަމަވެސް އެމްޑީޕީން ނެރުނު ބަޔާނުގައި ބުނެފައިވަނީ އެމްޑީޕީގެ އަސާސީ ގަވާއިދާއި ގައުމީ މަޖިލީހުގެ ނިންމުމާ އެއްގޮތްވާގޮތުގެ މަތިން, ދަފްތަރު ސައްހަކޮށް, ބެލެހެއްޓެމުން ދަނިކޮށް އެ ދަފްތަރާ މެދު ސުވާލު އުފެދޭ ގޮތަށް ޕާޓީގެ ރައީސް, ރައީސް މުހައްމަދު ނަޝީދު ވިދާޅުވެފައިވާތީ ހިތާމަކުރަމަށެވެ.
އެޕާޓީން ބުނެފައިވަނީ ދިވެހި ރައްޔިތުންގެ ޑިމޮކްރެޓިކް ޕާޓީގެ އެންމެ އަގުހުރި ރައުސުލްމާލަކީ ޕާޓީގެ އާއްމު މެމްބަރުންކަމަށެވެ. ޑިމޮކްރެޓިކް ނިޒާމުގެ ތެރޭގައި އިންތިޒާމުވެ ސުލްހަވެރި ސިޔާސީ ހަރަކާތް ހިންގުމާ އެކު ޕާޓީގެ އަސާސްތަކަށް ތާއީދުކުރާ ކޮންމެ ދިވެހި ރައްޔިތަކު ޕާޓީގެ މެމްބަރަކަށް ވުމަކީ އަބަދުވެސް އެ ޕާޓީން މަރުހަބާ ކިޔާނެ ކަމެއްކަމަށް ވަނީ ބުނެފައެވެ.
އެއާއެކު ޕާޓީގެ އަސާސީ ގަވާއިދާއި ގާނޫނީ ނިޒާމުގެ ތެރޭގައި ސިޔާސީ ޕާޓީތަކުގެ ގާނޫނުގައި ބުނާ ހަމަތަކާއި އުސޫލްތަކާ އެއްގޮތަށް ޕާޓީ ހިންގުމާއި މެމްބަޝިޕް ކަންތައް ބެލެހެއްޓުމަކީ ޕާޓީން އިސްކަންދޭ ކަމެއްކަމަށެވެ. އެމްޑީޕީއަކީ އަބަދުވެސް ޕާޓީގެ އެތެރޭގެ އިންތިހާބުތައް އާއްމު މެމްބަރުންގެ ނުހަނު ބޮޑު ބައިވެރިވުމާ އެކު ކުރިއަށް ގެންދާ ޕާޓީއެއްކަމަށާއި، މި އިންތިހާބުތަކުގައި ވޯޓުގެ ހައްގު ލިބެން ޖެހޭނީ ހަމައެކަނި ޕާޓީއަށް ނިސްބަތްވާ މެމްބަރުންނަށް ކަމަށް ވަނީ ބުނެފައެވެ.
އެމްޑީޕީން ބުނެފައިވަނީ މިއީ ޕާޓީގެ ސިޔާސަތުތައް ކުރިއެރުވުމަށް ހުރަހަކަށް ވާނެތީ އެމްޑީޕީގެ އަސާސީ ގަވާއިދާއި ގައުމީ މަޖިލީހުގެ ނިންމުންތަކާ އެއްގޮތްވާ ގޮތުގެ މަތިން ޕާޓީގެ ދަފްތަރު ސައްހަކުރަން ނިންމުމަކީ އެމްޑީޕީގެ ގައުމީ މަޖިލީހުގެ ނިންމުމެއްކަމަށް ވަނީ ބުނެފައެވެ.
އެމްޑީޕީގެ އަސާސީ ގަވާއިދުގެ 19 ވަނަ މާއްދާގެ (ހ) ގައި ޕާޓީގެ މެމްބަރުކަން ބާތިލުވާނީ ޕާޓީގެ މެމްބަރަކު އެމްޑީޕީ ފިޔަވައި އެހެން ސިޔާސީ ޕާޓީއެއްގައި ބައިވެރިވުން އަދި އެހެން ސިޔާސީ ޕާޓީއެއްގައި ހަރަކާތްތެރިވުމުންނެވެ. އަދި ސިޔާސީ ޕާޓީތަކުގެ ގާނޫނުގެ 9 ވަނަ މާއްދާގެ (ނ) ގައި ވަނީ “އެއްވެސް މީހަކަށް އެއްފަހަރާ އެއް ސިޔާސީ ޕާޓީއަށް ވުރެ ގިނަ ސިޔާސީ ޕާޓީގެ މެމްބަރަކަށް ނުހުރެވޭނެ” ކަމަށެވެ.
އެމްޑީޕީގެ ގައުމީ މަޖިލީހަށް 29 މޭ 2022 ގައި ހުށަހެޅި ފާސްކުރެވުނު ގަރާރުގައި އޮތީ "މިވަގުތު އެމްޑީޕީއިން ބަލަހައްޓަމުން ގެންދާ ދަފްތަރުގައި ހިމެނޭ އިލެކްޝަންސް ކޮމިޝަންގެ އެމްޑީޕީގެ ރަސްމީ ދަފްތަރުގައި ހިމެނޭ 54,599 މެމްބަރުންނަކީ އެމްޑީޕީގެ ރަސްމީ ދަފްތަރުކަމަށް ބަލައި, ދެން ތިބި 39,911 މީހުންނަށް އެމްޑީޕީގެ މެމްބަރުކަން ސައްހަކުރުމަށް ތިން މަސް ދިނުމަށާއި, މީގެ ތެރެއިން އިލެކްޝަންސް ކޮމިޝަންގައި އެހެން ޕާޓީއެއްގެ ރަޖިސްޓްރީގައިވާ މީހުން އެމްޑީޕީ އިން ވަކިކުރުމަށާއި, އެމްޑީޕީގެ އެއްވެސް މަގާމެއްގައި ހުރި މެމްބަރަކު ނަމަ އެއްމަސް ދުވަސްތެރޭގައި މެމްބަރޝިޕް ސައްހަ ކުރުމަށެވެ". މި ނިންމުމާ އެއްގޮތަށްވާ ގޮތުގެ މަތިން މިއަދާ ހަމައަށް ވެސް އެ މެމްބަރުން ޕާޓީގެ ދަފްތަރުގައި ރަޖިސްޓްރީވުމުގެ ފުރުސަތު އޮތީ ހުޅުވިފައެވެ.
ނިމިދިޔަ ޗެއަރޕާސަން އިންތިހާބުގައި ވާދަކުރެއްވި ދެ ކެންޑިޑޭޓުން ވެސް ކެމްޕެއިންގައި ޕާޓީގެ ދަފްތަރު ސައްހަކުރަންޖެހޭކަމަށް ވިދާޅުވެފައިވާކަމަށް މިބަޔާނުގައި ބުނެފައިވެއެވެ.
އެމްޑީޕީގެ ރިޔާސީ ޕްރައިމަރީގައި ވޯޓުލުމުގެ ފުރުސަތު ލިބެން ޖެހޭނީ ޕާޓީގެ ސައްހަ މެމްބަރުންނަށް ކަމަށްވާ އިރު ގައުމީ މަޖިލީހުގެ ނިންމުމާ އެއްގޮތްވާ ގޮތުގެ މަތިން ދަފްތަރު މިހާރު އޮތީ ސައްހަ ކުރެވި ޕާޓީއަށް ވަންނަން އެދޭ އެންމެހާ ދިވެހި ރައްޔިތުންނަށް ފުރުސަތު ހުޅުވިފައިވާކަމަށް އެޕާޓީން ވަނީ ބުނެފައެވެ.
