ސާބިތު އެއްވެސް ހެއްކެއް ނެތި މީހުންގެ ބޮލުގައި ބޮޑެތި ތުމަތު އަޅުވައި ޢާންމުންނަށް ދޫކޮށްލުމަކީ މުއައްސަސާތަކުގެ އެއްވެސް ފެންވަރެއް ނެތްކަން ހާމަވާކަމެއްކަމަށް ވިދާޅުވެ ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ޙުސައިން މުޙައްމަދު ފާޑުވިދާޅުވެއްޖެއެވެ.
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލަން ރައީސް އުފައްދަވާފައިވާ ރިޔާސީ ކޮމިޝަނުން އެންމެފަހުން ބޭއްވި ނޫސްވެރިންގެ ބައްދަލުވުމުގައި އެކޮމިޝަނުގެ މެމްބަރު މިސްބާޙު އައްބާސް ވަނީ ކުރީގެ ރައީސް ޔާމީންގެ އިސްތަށިފުޅުގައި ބޮޑު ތުހުމަތު އެޅޭ މޭރުމަކުން ވާހަކަފުޅުދައްކަވާފައެވެ. ގެއްލުވާލާފައިވާ ނޫސްވެރިޔާ އަޙްމަދު ރިޟުވާންގެ މައްސަލާގައި ނެރުނު ރިޕޯޓާ ގުޅިގެން ބޭއްވި މި ބައްދަލުވުމުގައި މިސްބާޙުވަނީ ރިޟުވާން މަރާލުމުގައި ބައިވެރިވި މީހަކު ރާއްޖެއިން ބޭރަށް ފުރުވުމުގައި ރައީސް ޔާމީން އެހީތެރިވިކަމަށް ދޭހަވާގޮތަށް ވާހަކަދައްކަވާފައެވެ. ހެއްކަށް ވިދާޅުވެފައިވަނީ އެމީހާ ޔާމީނާ ބައްދަލުކުރުމެވެ.
Mi report akee v bodah siyacy koffaivaa report eh kan saafu vejje, hekinethi mivaruge vaahakathah siyacy koh public ah dhookullumakee mu’assasaathakuge ehves fenvareh neh kamuge dhaleeleh. pic.twitter.com/HKXiM4Qi53
— Hussain Mohamed Latheef (@HucenSembe) December 15, 2022
މިކަމާ ގުޅިގެން ކުރެއްވި ޓްވީޓެއްގައި ޙުސައިން ވިދާޅުވެފައިވަނީ، މަރުކޮމިޝަނުގެ ރިޕޯޓަކީ ވަރަށްބޮޑަށް ސިޔާސީކޮށްފައިވާ ރިޕޯޓެއްކަން ސާފުވެއްޖެކަމަށެވެ. ހެއްކި ނެތި މިވަރުގެ ބޮޑެތި ވާހަކަތައް ޢާންމުންނަށް ދޫކޮށްލުމަކީ މުއައްސަސާތަކުގެ ފެންވަރެއް ނެތްކަން ހާމަކޮށްދޭ ދަތީލެއްކަމަށްވެސް ޙުސައިން ވިދާޅުވެފައިވެއެވެ.
ރިޟުވާން ގެއްލުނު މައްސަލާގައި މަރުކޮމިޝަނުން ނެރުނު ރިޕޯޓުވަނީ ސިއްރުކޮށްފައެވެ. އެހެންނަމަވެސް އެރިޕޯޓު ރައީސުލްޖުމްހޫރިއްޔާއަށް އަރުވުމަށްފަހު ކޮމިޝަނުން ވަނީ ނޫސްވެރިންގެ ބައްދަލުވުމެއް ބާއްވާފައެވެ.
