ޖުޑީޗަލް ސާރވިސް ކޮމިޝަން (ޖޭއެސްސީ) އެކުލަވާލަން ބޭނުންވަނީ އެއްވެސް ސިޔާސީ ބޭފުޅެއް ނުހިމެނޭގޮތަށްކަމަށް ޢާންމުން ބުނެފިއެވެ. އާންމުން މިހެން ބުނެފައި މިވަނީ ދިވެހިރާއްޖޭގެ ޝަރުޢީ ދާއިރާ އިޞްލާޙުކުރުމުގެ މަސައްކަތުގެ ތެރެއިން، ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް އިޞްލާޙުކުރުމަށްޓަކައި ސަރުކާރުން ފަށާފައިވާ މަސައްކަތުގައި މިހާތަނަށް ކުރިއަށްގެންދެވުނު މަޝްވަރާއާއި، ކަމާގުޅޭގޮތުން ކުރެވުނު ދިރާސާގެ އަލީގައި "ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް އިޞްލާޙުކުރުން" މި ނަމުގައި އެކުލަވާލާފައިވާ ކަރުދާހުގައެވެ.

ދިވެހިރާއްޖޭގެ ޢަދުލު އިންޞާފުގެ ދާއިރާގެ މިނިވަންކަން ކަށަވަރުކޮށް، އެ ދާއިރާގެ ހިންގުން އިތުރަށް ހަރުދަނާކުރުމަށްޓަކައި ޝަރުޢީ ދާއިރާ އިޞްލާޙުކުރުމަކީ، އިޖުތިމާޢީ ޢަދުލުވެރިކަމުގެ ދާއިރާއިން ސަރުކާރުން ވެފައިވާ އެންމެ މުހިންމު އެއް ވަޢުދެވެ. އެގޮތުން، ޝަރުޢީ ދާއިރާގެ އިޞްލާޙީ މަސައްކަތްތައް 2019 ވަނަ އަހަރު ފަށާފައިވާއިރު، އެ މަސައްކަތް ކުރިއަށް ގެންގޮސްފައިވަނީ ދެ މަރުޙަލާއަކަށް ބަހާލައިގެންނެވެ.

ފުރަތަމަ މަރުޙަލާގައި ކުރިއަށްގެންދިޔައީ، ޢަދުލު އިންޞާފު ޤާއިމުކުރުމުގެ ދާއިރާގެ މިނިވަންކަން ކަށަވަރުކޮށް، ދިވެހިރާއްޖޭގެ ކޯޓުތަކުގެ އިދާރީ ހިންގުން ހަރުދަނާކުރުމަށްޓަކައި، އަދި ފަނޑިޔާރުންގެ ސުލޫކީ ހަމަތަކާގުޅޭ އުސޫލުތަކާއި ފިޔަވަޅުއެޅުމުގެ އިޖުރާއަތު އިތުރަށް ހަރުދަނާކުރުމަށްޓަކައި، ދިވެހިރާއްޖޭގެ ކޯޓުތަކުގެ ޤާނޫނަށާއި، ޖުޑީޝަލް ސަރވިސް ކޮމިޝަންގެ ޤާނޫނަށާއި، ދިވެހިރާއްޖޭގެ ފަނޑިޔާރުންގެ ޤާނޫނަށް އިޞްލާޙު ގެނައުމުގެ މަސައްކަތެވެ. ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް އިޞްލާޙުކުރުމަކީ، ޝަރުޢީ ދާއިރާ ހަރުދަނާކުރުމަށް ކުރެވޭ އިޞްލާޙީ މަސައްކަތުގެ ފަހު މަރުޙަލާގައި ކުރިއަށްގެންދެވޭ މަސައްކަތެކެވެ.

މި ކަރުދާހަކީ ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް އިޞްލާޙުކުރުމަށްޓަކައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް ގެންނަންޖެހޭ އިޞްލާޙުތަކާއި، ކަމާގުޅޭގޮތުން ޖުޑީޝަލް ސަރވިސް ކޮމިޝަންގެ ޤާނޫނަށް ގެންނަންޖެހޭ އިޞްލާޙުތަކާގުޅޭ ބިލުތައް އެކުލަވާލުމުގެ ކުރިން، ކަމާބެހޭ ފަރާތްތަކާއެކު ކުރެވުނު މަޝްވަރާއާއި، ޢާންމުންގެ ޚިޔާލާއި، ކަމުގެ މާހިރުންގެ ލަފަޔާއި، އަދި ބައިނަލްއަޤްވާމީ ހަމަތަކާއި އުސޫލުތަކަށް ރިޢާޔަތްކޮށް އެކުލަވާލާފައިވާ ކަރުދާހެކެވެ.

ޖޭއެސްސީގެ ކަރުދާހުގައި އާންމުންގެ ތެރެއިން 91.3 އިންސައްތަ މީހުން ވަނީ ޖޭއެސްސީ އެކުލެވިފައިވާ ގޮތް ބަދަލުކުރަން ޖެހޭ ކަމަށް ބުނެފައެވެ. އެއީ  ޖޭއެސްސީގެ ބައެއް މެމްބަރުންނަކީ ސިޔާސީ މުއައްސަސާތަކުގެ އެންމެ އިސްވެރިންނަށް ވުމުގެ ސަބަބުން އެކޮމިޝަނުގެ މަސައްކަތްތަކަށް ސިޔާސީ ނުފޫޒު އޮތުމުގެ ފުރުސަތު ބޮޑުވުމާއި،  ޖޭއެސްސީގައި ރައްޔިތުންގެ މަޖިލީހާއި ސަރުކާރުގެ ދައުރު ބޮޑުވުމާއި، ފަނޑިޔާރުން ބިރުވެރިކަމެއްގައި ތިބުމުންކަމަށް ބުނެފައިވެއެވެ.

ޢާންމުން ވަނީ ރައްޔިތުންގެ މަޖިލީހުގެ ރައީސްއާއި ބަންޑާރަ ނައިބު ޖޭއެސްސީގައި ތިބުމާއިވެސް ދެކޮޅު ހަދާފައެވެ.

މީގެ އިތުރުން ސުޕީރިއަރ ކޯޓުތަކުންވެސް ވަނީ މަޖިލީހުގެ ދައުރު ޖޭއެސްީގައި ކުޑަކުރުމަށް ހުށައަޅާފައެވެ. އަދި މިނިވަން މުއައްސަސާތަކުގެ ވެރިންވެސް ތިބުމާއި ދެކޮޅު ހަދާފައިވެއެވެ.