ރޭ ދަންވަރު ގއ. އަތޮޅުގެ ބައެއް ރަށްތަކުގެ ބިންގަނޑަށް އައި ލޮޅުމުގެ ސަބަބުން އެއް ވެސް ނުރައްކަލެއް ކުރިމަތި ނުވާނެކަމުގައި މޫސުމާބެހޭ އިދާރާއިން ބުނެފިއެވެ.
އެ އިދާރާއިން އާންމު ކޮށްފައިވާ ސްޓޭޓްމަންޓެއްގައި ބުނެފައިވަނީ ރޭ ދަންވަރު ގއ. އޮތޮޅުގެ ބައެއް ރަށްތަކުގެ ބިންގަޑަށް ލޮޅުމެއް އައިކަމުގެ ރިޕޯޓުތައް ލިބިފައިވާ ކަމުގައެވެ. މިގޮތުން ބެލި ބެލުމުގައި ގދ. ކާޑެއްދޫގައި ގާއިމް ކޮށްފައިވާ ބިންހެލުން ރެކޯޑު ކުރާ މީޓަރަށް ރާއްޖޭ ގަޑިން ރޭ ދަންވަރު 0011 ހާއިރު ލޮޅުމެއްގެ އަސަރު ކޮށްފައިވާކަމަށް ރެކޯޑު ކުރެވިފައި ވާކަމަށްވެސް މޫސުމާބެހޭ އިދާރާއިން ބުނެފައި ވެއެވެ.
އެއިދާރާއިން ބުނެފައިވަނީ މީގެ ސަބަބުން ނުރައްކަލެއް ކުރިމަތިވެދާނެ ކަމަށް ލަފާ ނުކުރެވޭ ކަމުގައެވެ.
ގއ. ވިލިގިން ޚަބަރު އޮންލައިންއާއި ވާހަކަ ދެއްކި ބައެއް މީހުން ބުނި ގޮތުގައި ބިންހެލުން އައި ވަގުތު ބިންހެލުމުގެ އަސަރު އެރަށު ގިނަބަޔަށް އިހުސާސް ވެފައި ވެއެވެ. އަދި ބައެއް މީހުން ބިންހެލުން އައިކަމަށް ފޭސްބުކް ސްޓޭޓަސްގައި ލިޔެފައި ވެއެވެ.
ރާއްޖެއަކީ އާންމު ގޮތެއްގައި ބިންހެލުން އަންނަ ސަރަހައްދަކަށް ނުވިނަމަވެސް، ދުނިޔޭގައި ގިނައިން ބިންހެލުން އަންނަ ސަރަހައްދެއް ކަމުގައި އިންޑޮނޭޝިއާ ސުމަޓްރާއަށް އަންނަ ބިންހެލުންތަކުގެ އަސަރު ރާއްޖެއަށް ކޮށްފައިވެއެވެ.
މިގޮތުން އިންޑޮނޭޝިއާގެ ސުމަޓްރާ އަށް 2004 ވަނަ އަހަރު އައި ބިންހެލުމާ ގުޅިގެން، އައި ސުނާމީގައި ރާއްޖެއަށްވެސް ބޮޑެތި ގެއްލުންތަކެއްވެ ގިނަބަ ބައެއްގެ ފުރާނަ ގެއްލިފައި ވެއެވެ.
