ކޮންމެ އަހަރެއް ފެށުމުގެ ކުރިން ފަނޑިޔާރުން ޗުއްޓީ ނަގާނެ ގޮތުގެ ޕްލޭނެއް އެކުލަވާލުމަށް ފަހު ޖުޑީޝަލް ސާވިސް ކޮމިޝަން (ޖޭއެސްސީ) އަށް ފޮނުވަންޖެހޭ ގޮތަށް ކަނޑައަޅައިފިއެވެ.
ޖޭއެސްސީން ނެރުނު ސާކިއުލާއެއްގައިވަނީ، ކޯޓުތަކުގެ ޚިދުމަތްތަކަށް ބުރޫ އެރިޔަ ނުދިނުމަށް ކޮންމެ އަހަރެއް ވެސް ފެށުމުގެ ކުރިން ފަނޑިޔާރުން ޗުއްޓީ ނަގާނެ ގޮތުގެ ޕްލޭނެއް އެކުލަވާލަން ޖެހޭނެކަމަށެވެ. އެހެންކަމުން ހުރިހާ ފަނޑިޔާރުންގެ އަންނަ އަހަރުގެ ޗުއްޓީ ޕްލޭން އަންނަ މަސް ނިމުމުގެ ކުރިން ފޮނުވަން ޖޭއެސްސީން ވަނީ ފަނޑިޔާރުންނަށް އަންގާފައެވެ. އަދި ޗުއްޓީ ޕްލޭން ކުރުމުގައި އެއް ދުވަސްވަރެއްގައި ހުރިހާ ފަނޑިޔާރުން ޗުއްޓީއަށް ނުދާނެހެން ޕްލޭންތައް ރޭވުމަށް ވެސް އަންގާފައިވެއެވެ.
މީގެ އިތުރުން ޗުއްޓީ ޕްލޭން ދުރާލާ އެކުލަވާލިނަމަވެސް، ކޮންމެހެން ނަގަންޖެހޭ ޗުއްޓީތައް އިސް ފަނޑިޔާރުންގެ ހުއްދައާ އެކު ނެގުމުގެ ފުރުސަތު އޮންނާނެކަމަށްވެސް ޖޭއެސްސީގެ ސާރކިއުލާގައިވެއެވެ.
