ފަލަސްތީނުގެ ހަމާސް ޖަމާއަތުން ވެރިކަން ކުރަމުންދާ ގާޒާއިން އިސްރާއީލަށް ދީފައިވާ ރޮކެޓް ހަމަލާތަކުގެ ބަދަލުގައި ގާޒާއަށް މިސައިލް ހަމަލާ ދީފައިވާ ކަމުގައި އިސްރާއީލުގެ އަސްކަރިއްޔާއިން ބުނެފިއެވެ.
"އިސްރާއީލަށް ދީފައިވާ ރޮކެޓް ހަމަލާތަކުގެ ބަދަލުގައި ކުޑަ އިރުކޮޅެއް ކުރިން އިސްރާއީލުގެ އަސްކަރިއްޔާއިން ވަނީ ހަމާސް ޓެރަރިސްޓް ޖަމާއަތުގެ ގާޒާ ސްޓްރިޕްގެ އެތަކެއް މަގާމްތަކަކަށް ހަމަލާ ދީފަ،" އިސްރާއީލްގެ އަސްކަރިއްޔާއިން ނެރެފައިވާ ބަޔާނެއްގައި ބުނެފައި ވެއެވެ.
އިސްރާއީލުން ބުނެފައިވާ ގޮތުގައި މިހަލާތަކަކީ ދެކުނު އިސްރާއީލުގެ މީހުން އުޅޭ ސަރަހައްދަކަށް ހަމާސްއިން ފޮނުވާލާފައިވާ ރޮކެޓް ހަމަލާތަކުގެ ބަދަލު ހިފުމުގެ ގޮތުން ދީފައިވާ ހަމަލާތަކެކެވެ. އިސްރާއީލުން ބުނެފައިވާ ގޮތުގައި އެގައުމުގެ މިސައިލް ޑިފެންސް ސިސްޓަމުން ވަނީ މި ރޮކެޓްތައް ވައްޓާލާފައެވެ.
އިސްރާއީލުންވަނީ، "ހަމާސްގެ ހަތިޔާރު އުފައްދާ ކާރުޚާނާއަކަށާއި، އަދި އޭގެ އިތުރު 3 އަސްކަރީ މަގާމަގަށް ހަމަލާ ދީފަ،" ބަޔާނުގައި ވެއެވެ.
އިސްރާއީލުން މިދިން ހަމަލާތަކާއެކު ގާޒާގެ މަލަމަތިން ވަރުގަދަ އަލިފާން ގަޑުތައް ފެނިގެން ގޮސްފައިވާއިރު، ގާޒާގެ ޖައްވަށް ކަޅު ދުން އަރަމުންދާ މަންޒަރުވެސް ވަނީ ފެނިފައެވެ.
މިއަހަރުގެ އެޕްރިލްމަހުވެސް އިސްރާއީލުންވަނީ 2.3 މިލިއަން މީހުން ދިރިއުޅެމުން އަންނަ ގާޒާ ސްޓްރިޕްއަށް މިސައިލް ހަމަލާ ދީފައެވެ. މިހަމަލާތަައް އައިސްފައިވަނީ، އިސްރާއީލުން ހިފާފައިވާ އިރުމަތީ ޖެރޫސެލަމްގެ އަލް މަގްސިދުލް އަގްސާގައި ފަލަސްތީނު ރައްޔިތުންނާއި އިސްރާއީލު ސިފައިންނާ ދެމެދު ބޮޑެތި ހަމަނުޖެހުންތަކެއް ހިގިތާ މަހެއްހާ ދުވަސް ފަހުންނެވެ.
2007 ވަނަ އަހަރުން ފެށިގެން އިސްރާއީލުންވަނީ ގާސާ ސްޓްރިޕް ހިސޯރު ކޮށްފައެވެ.
