ޖަޕާނަށް ބާރުގަދަ ބިންހެލުމެއް އައިސް، އެގައުމުގެ ފުކުޝީމާ ޕްރީފެކްޗަރއަށް ސުނާމީގެ އިންޒާރު އާންމު ކޮށްފިއެވެ. ރެކްޓަރ މިންގަޑުން 7.3 މެގްނިޓިއުޑުގެ ބާރުމިނުގައި ޖަޕާނުގެ ދެކުނުގައި އޮންނަ ފުކުށީމާ ސަރަހައްދައް އައި މި ބިންހެލުމުގެ އަސަރު ޖަޕާނުގެ ވެރިރަށް ޓޯކިޔޯއަށްވެސް ވަނީ ކޮށްފައެވެ. އަދި ޓޯކިޔޯގެ ބައެއް ސަރަހައްދުތަކުން ކަރަންޓި ކެނޑިފައިވެސް ވެއެވެ.
މިރޭ ޖަޕާން ގަޑިން 23:40 ގައި އައި ބާރުގަދަ ބިންހެލުން އައިސްފައިވާ ފުކުށީމާ ޕްރީފެކްޗަރއަކީ 2011 ވަނަ އަހަރު ޖަޕާންގެ "ގްރޭޓް އީސްޓަރން ޖަޕާން އާރތުކުއޭކު" އައި ސިޓީއެވެ. މި ބިންލެމަށްފަހު އައި ސުނާމީގައި، ޖަޕާންގެ ފުކުޝީމާގެ ނިއުކުލިއަރ ޕަވަރ ޕްލާންޓަށް ގޮވާ، ހިނގި ކާރިސާގައި 20،000 މީހުން މަރުވެފައި ވެއެވެ.
މިރޭ ޖަޕާނަށް އައި ބިންހެލުމަށްފަހު، ޖަޕާނުގެ ބޮޑުވަޒީރިގެ އޮފީހުން މިހާރުވަނީ އެމެޖެންސީ ސެންޓަރއެއް ގާއިމް ކޮށްފައެވެ. އަދި ޖަޕާނުގެ ޓޮކިއާ ނިއުކުލިއަރ ޕްލާންޓު އޮޕަރޭޓްކުރާ ފަރާތުން ބުނެފައިވަނީ، ބިންހެލުމުގެ ސަބަބުން އެ ނިއުކުލިއަރ ޕްލާންޓުގެ އޮޕަރޭޝަންތަކަށް އެއްވެސް އަސަރެއް ކޮށްފައި ނުވާކަމުގައެވެ.
މި ބިންހެލުމާއި ގުޅިގެން ޖަޕާންގެ މޫސުމާބެހޭ އޭޖެންސީން ބުނެފައިވަނީ، 1 މީޓަރުގެ ސުނާމީއެއް، ޕެސިފިކް ކަނޑުގެ އައްސޭރީގައި އޮންނަ ފުކުޝީމާ ޕްރީފެކްޗަރއަށް އައުމަކީ އެކަށީގެންވާ ކަމެއްކަމަށާއި، އެހެންކަމުން އުސް ހިސާބުތަކަށް މީހުން ބަދަލުވުމަށްވެސް ވަނީ އިރުޝާދު ދީފައެވެ.
