ރަޝިއާއިން ޔޫކްރެއިންއަށް އަސްކަރީ ހަމަލާދީ، ރަޝިއާ ސިފައިން އެގައުމަށް އަރާނެކަމުގެ ބިރު އިންތިހާއަށް ބޮޑުވެފައި ވަނިކޮށް، ޔޫކްރެއިންގައި ތިބި އެމެރިކާގެ ޑިޕްލޮމޭޓުންނާއި އަދި އެމެރިކާގެ ރައްޔިތުން ޔޫކްރެއިން ދޫކޮށް ދިއުމަށް އެމެރާއިން އިލްތިމާސް ކޮށްފިއެވެ.
ރަޝިއާގެ ރައީސް ލާޑިމިރު ޕުޓިންގެ އަމުރަށް ރަޝިއާ ސިފައިން ޔޫކްރެއިން އަރާނެކަމަށް އެމެރިކާއިން ބުނަމުންދާ ދިއުމާގުޅިގެން ބައިނަލް އަގުވާމީ މުޖުތަމައުގައިވަނީ އިންތިހާއަށް ކަންބޮޑުވުން އުފެދިފައެވެ.
އެހެންނަމަވެސް، ރަޝިއާގެ އެއް ލައްކައަށްވުރެ ގިނަ ސިފައިން ބަރު ހަތިޔާރާއެކު ޔޫކްރެއިންގެ ބޯޑަރުކައިރިއަށް ރަޝިއާ ސަރުކާރުން ޖަމާ ކޮށްފައިވިނަމަވެސް ރަޝިއާ ސަރުކާރުން ބުނަމުން ދަނީ، ޔޫކްރެއިންއަށް އަސްކަރީ ހަމަލާ ދިނުމުގެ އެއްވެސް ޝައުގުވެރުކަމެއް އެގައުމުން ނުގެން ގުޅޭ ކަމަށެވެ.
އެހެންނަމަވެސް ޔޫރަޕްގެ ގިނަ ގައުމުތަކުންނާއި އަދި އެމެރިކާއިންވެސް، ޖާސޫސީ މައުލޫމާތުތަކާ ހަވާލާދީ ބުނަމުންދަނީ، ރަޝިއާގެ ރައީސް ޕުޓިން ކޮންމެ ވަގުތެއްގައިވެސް އެގައުމުގެ ސިފައިން ޔޫކްރެއިންއަށް ހަމަލާ ދިނުމުގެ އަމުރު ނެރުއްވަފާނެ ކަމުގައެވެ.
"ރަޝިއާގެ އަސްކަރީ ހަމަލާއެއްގެ ނުރައްކާ އިންތިހާއަށް އޮތުމާއި ގުޅިގެން، އެމެރިކާއިން ވަޒީފާ ދީފައިތިބި މުވައްޒަފުން އެމީހުންގެ އަމިއްލަ އިޚްތިޔާރުގައި ފުރައިގެން ދިއުމާއި އަދި ކިޔިވްގައި ހުރި އެމެރިކާ އެމްބަސީގެ މުވައްޒަފުންގެ އާއިލީ މެމްބަރުންވެސް ފުރައިގެން ދިއުމަށް ވަނީ އެންގިފައި،" ސްޓޭޓް ޑިޕާޓްމަންޓުން ނެރުނު މެމޯއެއްގައި ބުނެފައި ވެއެވެ.
މި ހަފްތާގެ އާދީއްތަ ދުވަހު ނެރުނު މި އަމުރަށްފަހު ސްޓޭޓް ޑިޕާޓްމަންޓުގެ ސީނިއަރ އޮފިޝަލުންވެސް ވަނީ ސްޓޭޓް ޑިޕާޓްމަންޓުގެ މި އެންގުން ތަކުރާރުކޮށް ޔޫކްރެއިންގައި ތިބި އެމެރިކާގެ ރައްޔިތުންނަށް އިންޒާރު ދީފައެވެ.
"ރަޝިއާއިން ޔޫކްރެއިންއަށް ދޭ ކޮންމެ ހަމަލާއެއްގެ ސަބަބުން، އެގައުމުގައި ކޮންސިއުލާ ޚިދުމަތްތައް ފޯރު ކޮށްދިނުމަށާއި، އަދި އޭގެ އިތުރުން އެމެރިކާ ރައްޔިތުން އެގައުމު ދޫކޮށް ދިއުމަށް އެމްބަސީން ފޯރުކޮށްދޭން ޖެހޭ ޚިދުމަތްތައް ފޯރުކޮށް ދިނުމުގައި ބޮޑެތި ގޮންޖެހުންތަކާއ ކުރިވާނެ،" ސްޓޭޓް ޑިޕާޓްމަންޓުގެ އޮފިޝަލުން މީޑިއާތަކަށް މައުލޫމާތު ދީފައި ވެއެވެ.
އެމެރިކާއިން ބުނަމުން ދަނީ، ރަޝިއާއިން ޔޫކްރެއިންއަށް އަސްކަރީ ހަމަލާދީ އަސްކަރީ ކުރިމަތިލުމެއް ފެށިގެންދިޔަ ނުދިނުމަށްޓަކާ ޑިޕްލޮމެޓިކް ހައްލެއް ހޯދުމަށް ގިނަ ގިނަގުނަ މަސައްކަތްތަކެއް ކުރެވެމުން ދާކަމުގައެވެ.
ރަޝިއާއިން ޔޫކުރެއިންއަށް އަރާ އެގައުމު ހިފުމަށް ރައްޔާރުވަމުންދާ ކަމުގެ ކަންބޮޑުވުން އިންތިހާއަށް މައްޗަށް ގޮސްފައި ވަނިކޮށް، ބައިޑްންގެ ސަރުކާރުންވަނީ އަސްކަރީ އެހީގެ ގޮތުގައި ޔޫކުރެއިންއަށް 200 މިލިއަން ޑޮލަރުގެ އެހީ ފޯރުކޮށް ދީފައެވެ.
ޔޫކުރެއިންގެ ބޯޑަރު ކަރިއަށް ރަޝިއާގެ އެތައް ހާސް ސިފައިންނެއް ޖަމާކުރަމުން ދިއުމާ ގުޅިގެން، ރަޝިއާއިން ޔޫކުރެއިންއަށް އެރުމަށް ރާވަމުންދާ ކަމުގެ ކަންބޮޑުވުން ހުޅަގުގެ ގައުމުތަކުގެ މެދުގައިވަނީ އުފެދިގެން ގޮސްފައެވެ. އަދި އެމެރިކާއިންވަނީ، ރަޝިއާއިން ޔޫކްރެއިންއަށް އަރައިފިނަމަ، ހީވެސް ނުކުރާވަރުގެ ވަރުގަދަ ދަތިކުރުމުގެ ފިޔަވަޅު އެގައުމާ ދެކޮޅަށް އަޅާނެކަމުގެ އިންޒާރު ދީފައެވެ.
އެހެންނަމަވެސް ޔޫކްރެއިންއަށް ހަމަލާދިނުމަށް ރަޝިއާއިން ތައްޔާރުވަމުން ދާކަމަށް ކުރެވެމުންދާ ތުހުމަތުތައް އެގައުމުންވަނީ ދޮގު ކޮށްފައެވެ. އަދި ރަޝިއާއިން ބުނެފައިވަނީ، ޔޫކްރެއިން ބޯޑަރު ކައިރީގައި ކުރިޔަށްދަނީ އެގައުމުގެ އަސްކަރީ ތަމްރީންތައް ކަމަށާއި، އެގައުމުގެ ފަސްގަޑުގެ ކޮންމެ ހިސާބަކަށްވެސް ސިފައިން ޖަމާކުރުމުގެ ހައްގު އެގައުމަށް އޮތް ކަމުގައެވެ.
