މި ޔަންމާގެ މަދަނީ ލީޑަރު އަންސަންގ ސޫކީގެ މައްޗަށް އިތުރު 3 މައްސަލައެއް ސާބިތުވެ، އެގައުމުގެ އަސްކަރީ ކޯޓަކުން އޭނާ އިތުރު 4 އަހަރަށް ޖަލަށް ލާން ހުކުމް ކޮށްފިއެވެ.

ނޯބެލް ސުލްހައިގެ އިނާމް ލިބިވަޑައިގެންފައިވާ، އުމުރުން 76 އަހަރުގެ، މިޔަންމާގެ އިދިކޮޅު ލީޑަރު އަންގސަން ސޫކީ މަގާމުން ދުރުކޮށްފައިވަނީ މިޔަންމާގެ އަސްކަރިއްޔާއިން މީގެ އަހަރެއްހާ ދުވަސް ކުރިން، ފާއިތުވި އަހަރުގެ ފެބްރުއަރީމަހު ގެނައި ބަޢާވާތެއްގައެވެ. އެއަށްފަހު އޭނާ ހައްޔަރުކޮށް، އަސްކަރީ ސަރުކާރުންވަނީ އޭނާގެ މައްޗަށް ގިނަ ދައުވާތަކެއް ކޮށްފައެވެ.

މިޔަންމާގެ އަސްކަރީ ކޯޓުން މިއަދު އޭނާގެ މައްޗަށް އިއްވި ހުކުމްތަކުގެ ތެރޭގައި، ލައިސަންސް ނެތި ވޯކޯ ޓޯކީ ގެންގުޅުމުގެ ކުށުގައި 2 އަހަރަށް ޖަލަށް ލާން ކުރި ހުކުމްގެ އިތުރުން ކޯވިޑާއި ދެކޮޅަށް އަޅާފައިވާ ފިޔަވަޅުތަކާއި ޚިލާފްވެގެން އިތުރު ދެއަހަރަށް ޖަލަށް ލާން ހުކުމް ކުރުންވެސް ހިމެނޭ ކަމަށް ސޫކީގެ ގާނުނީ ވަކީލުންގެ ޓީމުން މައުލުމާތު ދީފައި ވެއެވެ.

އަންގ ސަންގ ސޫކީގެ ޝަރީއަތްތައް ކުރިތަށް ދަނީ، ސިއްރު އަޑު އެހުންތަކެއް ގޮތުގައެވެ. އަދި އަސްކަރީ ސަރުކާރުން އޭނާގެ މައްޗަށް އުފުލާފައިވާ ދައުވާތަކުގެ ހުރިހާ ހުކުމްތަކެއް އެއްކޮށްލުމުން، އޭނާގެ މައްޗަށް 100 އަހަރަށްވުރެ ދިގު މުއްދަތުގެ ޖަލުހުމްތައް އަންނާނެއެވެ. އަދި އޭނާގެ މައްޗަށް ކުރެވޭ ދައުވާތަކާއި ގުޅޭގޮތުން ވާހަކަ ނުދެއްކުމަށް ފާއިތުވެދިޔަ އޮކްޓޯބަރުމަހު އަސްކަރީ ސަރުކާރުންވަނީ އޭނާގެ ގާނޫނީ ވަކީލުންނަށް އަމުރު ކޮށްފައެވެ.

ފާއިތުވެދިޔަ މަހުވެސް، އަސްކަރީ ކޯޓުންވަނީ، ކޯވިޑް19 އާއި ދެކޮޅަށް އަޅާފައިވާ ފިޔަވަޅުތަކާ އޭނާ ޚިލާފް ވުމާއި ގުޅިގެން ކުރި ދައުވާތަކަށް، ސޫކީގެ މައްޗަށް 4 އަހަރުގެ ޖަލު ހުކުމެއް އިއްވާފައެވެ.

މިޔަންމާގައި މިހާރު އޮތް އަސްކަރީ ސަރުކާރުން އޭނާގެ މައްޗަށް އުފުލާފައިވާ އިތުރު ދައުވާތަކުގެ ތެރޭގައި ކޮރަޕްޝަނާއި ފަސާދައާއި، ދައުލަތުގެ ސިއްރުތަކާ ބެހޭ ގާނޫނާ ޚިލާފުވުމާއި، އަދި ޓެލެކޮމް ގާނޫނާ ޚިލާފު ވުމުގެ ދައުވާވެސް ހިމެނެއެވެ.

މި ހުރިހާ ދައުވާތަކެއްގެ ހުކުމް އެއްކޮށްލުމުން، އަންގ ސަންގ ސޫލީ ގަރުނަކަށްވުރެ ދިގު މުއްދަތެއް ޖަލުގައި ހޭދަ ކުރަން ޖެހޭނެއެވެ. މި ހުރިހާ ދައުވާތަކަށްވެސް ސޫކީ އިންކާރު ކުރައްވައެވެ. ސޫކީއާއި ދެކޮޅަށް އުފުލާފައިވާ ދައުވާތަކުގެ ތެރޭގައި، ކޮރަޕްޝަނާއި ގުޅުންހުރި ދައުވާތައްވެސް ހިމެނޭ އިރު، އިތުރު ދެދައުވާއެއް، ސޫކީގެ ސަރުކާރުގައި ވަޒީރުކަން ކުރެއްވި މިން ތޫއާއި ދެކޮޅަށްވެސް އަސްކަރީ ސަރުކާރުން ވަނީ އުފުލާފައެވެ.

މިޔަންމާގެ ޔަންގޮން ކޯޓުގައި، ސޫކީގެ މައްޗަށްވަނީ، މިޔަންމާގެ އޮފިޝަލް ސީކްރެޓް ގާނޫނާއި ޚިލާފުވުމުގެ ދައުވާވެސް ކޮށްފައެވެ. މި ދައުވާ ސާބިތު ވެއްޖެނަމަ އެނާގެ މައްޗަށް 14 އަހަރުދުވަހުގެ ޖަލު ހުކުމެއް އަންނާނެއެވެ. އަންސަންގ ސޫކީގެ ގާނޫނީ ވަކީލުންގެ ޓީމުންވަނީ މިހުރިހާ ދައުވާތަކަށްވެސް އިންކާރު ކޮށްފައެވެ.

ސޫކީގެ ދަރިންނާއި އަދި އަވަހާރަވެފައިވާ ފިރިކަލުންނަކީ، ގައުމުން ބޭރުގެ ރައްޔުތުކަން އޮންނަ ބަޔަކަށް ވާތީ އޭނާއަށް އެގައުމުގެ ރައީސްކަމަށް ވާދު ކުރުމުގެ ފުރުސަތުވަނީ ގެއްލިފައެވެ. ބަޢާވާތަކުން ވެރިކަން ބަދަލު ކޮށްލުމުގެ ކުރިން އޭނާވަނީ މިޔަންމާގެ ސްޓޭޓް ކައުންސިލަރުކަން އަދާ ކުރައްވާފައެވެ.