ފިލިޕީންސްގައި، ކޯވިޑަށް ޕޮޒިޓިވް ވާމީހުންގެ އަދަދު އިންތިހާއަށް މަތިވެ، އޮކިމްރޯން ވޭރިއެންޓުގެ ސަބަބުން އެގައުމުގައި ކޮންޓްރޯލުން ނެއްޓެމުންދާ ކޯވިޑް ހާލަތު ކޮންޓްރޯލް ކުރުމަށްޓަކާ، ވެކްސިން ނުޖަހާ، ގެއިން ބޭރަށް ނިކުމެ އުޅޭ މީހުން ޖަލަށް ލުމަށް ފިލިޕީންސްގެ ރައީސް ރޮޑްރިގޯ ޑުޓާޓޭ އަމުރު ކޮށްފިއެވެ.
މިހަފްތާގެ ހުކުރު ދުވަހު ފިލިޕީންސްއިން ޕޮޒިޓިވްވީ މީހުން އަދަދުތަކާ އެކީ، އެގައުމުގައި ޖެހިޖެހިގެން 3 ވަނަ ދުވަހު ވަނީ ރެކޯޑް އަދަދަކަށް މީހުން ކޯވިޑަށް ޕޮޒިޓިވް ވެފައެވެ.
ކޯވިޑް ކާރިސާ ފެށުނުފަހުން ފިލިޕީންސްގައި މިހާތަނަށް 3 މިލިއަން މީހުންވަނީ މި ބައްޔަށް ޕޮޒިޓިވް ވެފައެވެ. އަދި މި ޖުނައަރީމަހުގެ 1ވަނަ ދުވަހު އެންމެ 3,617 މީހުން ކޯވިޑަށް ޕޮޒިޓިވް ވި ނަމަވެސް، އެންމެ ފަހުން ފިލިޕީންސްގައި ނެގުނު 70,049 ސާމްޕަލްގެ ތެރެއިން 21,819 ސާމަޕަލްވަނީ ކޯވިޑަށް ޕޮޒިޓިވް ވެފައެވެ.
މިގޮތުން، ފިލިޕީންސްގައި ކޯވިޑަށް ޕޮޒިޓިވްވާ މީހުންގެ ރޭޓް %40 އަށްވުރެ މައްޗަށް އަރާފައި ވާއިރު، މިއީ ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވާ 5 އިންސައްތައިގެ ޕޮޒިޓިވިޓީ ރޭޓަށްވުރެ އެތައް ގުނައެއް މަތީ އަދަދެއްކަން ސިއްޙީ މާހިރުންވަނީ ފާހަގަ ކޮށްފައެވެ.
ފިލިީންސްގައި މިހާރު 77,369 މީހުން ކޯވިޑަށް ފަރުވާ ހޯދަމުން ދާއިރު، މިއީ ފާއިތުވި އޮކްޓޯބަރުމަހުގެ 17ވަނަ ދުވަހަށްފަހު، އެގައުމުގައި ކޯވިޑަށް ފަރުވާ ހޯދަމުންދާ މީހުންގެ ނިސްބަތް އެންމެ މައްޗަށް ދިޔަ ފަހަރެވެ. އަދި އެއާއެކު، ކޯވިޑް19 އަށް ޕޮޒިޓިވްވެ މަރުވެފައިވާ 129 މީހުންނާއެކު، މިބަލީގައި މަރުވެފައިވާ މީހުންގެ އަދަދުވަނީ 51,871 އަށް އަރާފައެވެ.
ފިލިޕީންސްގައި އެންމެ ގިނަ އަދަދަކަށް މީހުން ކޯވިޑަށް ޕޮޒިޓިވް ވެފައިވަނީ ވެރިރަށް މެނީލާއިންނާއި މެނީލާގެ ކައިރި ސަރަހައްދު ތަކުންނެވެ.
ސިއްޙީ މާހިރުން އިންޒާރު ދީފައިވާ ގޮތުގައި ކުރިޔަށް އޮތް މުއްދަތުގައި ފިލިޕީންސްގައި ކޯވިޑަށް ޕޮޒިޓިވް ވަމުންދާ މީހުންގެ އަދަދު ދާނީ މަތިވަމުންނެވެ. އަދި މިއަދަދު ޕީކަށް އަރާނީ މިމަސް ނިމޭހާތަނުގައި ކަމަށްވެސް ސިއްޙީ ތަޖުރިބާ ކާރުން ދަނީ ބުނަމުންނެވެ.
