ކޯވިޑް19ގެ އާ ވެރިއެންޓް އޮމިކްރޮންއަށް އަމާޒުކޮށް ކޯވިޑްގެ އާ ވެކްސިނެއް އީޖާދުކުރުމަށް އޮކްސްފޯޑު ޔުނިވަރސިޓީއާއެކު މަސައްކަތް ކުރަމުންދާކަން އެސްޓްރާޒެނެކާ ކުންފުނިން ހާމަ ކޮށްފިއެވެ.
އޮކްސްފޯޑް ޔުނިވަރސިޓިގެ ސައިންޓިސްޓުން ހާމަ ކޮށްފައިވާ ގޮތުގައި، ކޯވިޑް19ގެ މިހާރުގެ ވެކްސިން އިތުރަށް ފުރިހަމަކޮށް، އަލަށް އުފައްދާ މިވެކްސިންއިން ކުރިޔަށް އަންނަ ވޭރިއެންޓްތަކުން ރައްކާތެރިކަން ފޯރުކޮށްދިނުމުގެ އިތުރުން މި ވެކްސިންއިން ރައްކާތެރިކަން އަވަހަށް ފޯރު ކޮށްދޭނެއެވެ.
ފާއިތުވެދިޔަ ނޮވެމްބަރު މަހުން ދެނުކު އެފްރިކާއިން ފެނިފައިވާ ކޯވިޑް19ގެ އޮމިކްރޮން ވޭރިއެންޓް ހަލުއިކަމާއެކު ދުނިޔޭގެ އެކި ކަންކޮޅުތަކުގައި ފެތުރެމުން ދާއިރު، ފްރާންސްގައި ދުވާލަކަށް ކޯވިޑަށް ޕޮޒިޓިވްވާ މީހުންގެ އަދަދު ދާދި އަވަހަށް 100،000 އަށް އަރައިގެން ދާނެކަމަށް އެގައުމުގެ ހެލްތު މިނިސްޓަރ އޮލިވަރ ވެރަންވަނީ ވިދާޅުވެފައެވެ. އޭނާ އިތުރަށް ވިދާޅުވި ގޮތުގައި، އެގައުމުގައި އެންމެ ބާރަށް ފެތުރެމުންދާ ވޭރިއެންޓަކީ އޮމިކްރޮން ވޭރިއެންޓް ކަމުގައި ޖެނުއަރީމަހު ކުރީކޮޅު ވެގެންދާނެ ކަމުގައެވެ.
އޮމިކްރޮން ވޭރިއެންޓާ ދެކޮޅަށް ދުނިޔޭގެ އެކި ގައުމުތަކުން ފިޔަވަޅު އަޅަމުންދާއިރު، ސިންގަޕޯއިން ކުރިޔަށް ގެންދާ ކަރަންޓީން ފްރީ ޓްރަވެލް ސްކީމުގެ ދަށުން އިތުރަށް ޓިކެޓް ވިއްކުން ބުރާސަފަތު ދުވަހުންފެށިގެން ކުރިޔަށް އޮތް 4 ހަފްތާއަށް މެދުކަޑާލުމަށް ވަނީ ހަމަޖެހިފައެވެ.
ކޯވިޑް 19 ފެތުރެމުންދިޔަ ނަމަވެސް، ކުރިސްމަސް ލޮކްޑައުނަކަށް ދިއުމަށް ނިންމާފައި ނުވާކަން އޮސްޓްރޭލިއާއިންވަނީ ހާމަ ކޮށްފައެވެ. އެހެންނަމަވެސް، އެގައުމުގެ ވީހާ ގިނަ އަދަދެއްގެ ރައްޔިތުންނަށް ވެކްސިން ޖަހުމަށް އިތުރަށް ބާރުއެޅުމަށް އެގައުމުގެ ސަރުކާރުން ވަނީ ނިންމާފައެވެ.
އެސްޓްރާޒެނެކާއާއި އޮކްސްފޯޑު ގުޅިގެން އޮމިކްރޮންއަށް ވެކްސިނެއް އުފެއްދުމުގެ މަސައްކަތް ފަށާފައިވާއިރު، ތުރުކީއިން ކޯވިޑް19އަށް އުފެއްދި ޓާރކޯވެކް ވެކްސިން އެގައުމުގައި ބޭނުން ކުރުމުގެ އެމަރޖެންސީ ހުއްދަ އެގައުމުގެ ސިއްޙީ އިދާރާތަކުން މިއަދުވަނީ ދީފައެވެ. އަދި އަންނަ ހަފަތާ ބަންދުން ފެށިގެން މިވެކްސިން ތުރުކީގައި ބޭނުން ކުރަން ފަށާނެކަމަށް އެގައުމުގެ ހެލްތުމިނިސްޓަރު ވަނީ ވިދާޅުވެފައެވެ.
