ޕޯޗުގަލް ގައުމީ ޓީމުގެ ކޯޗު ހޯޖް ހެސޫސްއާ ދެމެދު އުފެދުނު ހިޔާލުތަފާތުވުންތަކާ ގުޅިގެން ކުރިއަށް އޮތް ބައިނަލްއަގުވާމީ މެޗުތަކަށް ނަގާ ސްކޮޑުން ފުރުސަތު ނުލިބުމުން، އެ ގައުމުގެ ކެޕްޓަން އަދި ތާރީހު ދުށް އެންމެ ކާމިޔާބު އެއް ކުޅުންތެރިޔާ ކްރިސްޓިއާނޯ ރޮނާލްޑޯ ގައުމީ ޓީމަށް ކުޅުން ހުއްޓާލިކަން އިއުލާންކޮށްފި އެވެ.
ރޮނާލްޑޯ އާއި ކޯޗާ ދެމެދު މައްސަލަ ގޯސްވީ ވޭތުވެދިޔަ ސެޕްޓެމްބަރު އަދި އޮކްޓޯބަރު މަހުގެ ބައިނަލްއަގުވާމީ ބްރޭކްގައި ނޯވޭއާ ދެކޮޅަށް ކުޅުނު މެޗުގައި އޭނާ ބެންޗުގައި ބޭންދުމުންނެވެ. އެ ނިންމުމާ މެދު ހިތްހަމަނުޖެހި، ރޮނާލްޑޯ ވަނީ ޓީމުގެ ކޭމްޕް ދޫކޮށް ގޮސްފަ އެވެ. ފަހުން އެ އަމަލަށް މައާފަށް އެދުނު ނަމަވެސް، ކޯޗު ހެސޫސް އޭނާއަށް ވީ ވައުދާ ހިލާފުވި ކަމަށް ބުނެ ރޮނާލްޑޯ ވަނީ ތުހުމަތުތަކެއް ކޮށްފަ އެވެ. އެ މައްސަލައިގައި ޕޯޗުގަލްގެ ފުޓްބޯޅަ ފެޑެރޭޝަނުން އޭނާއަށް 30 ދުވަހުގެ ސަސްޕެންޝަނެއް ދިން ނަމަވެސް، މިދިޔަ މަހުގެ ނިޔަލަށް އެ އަދަބު ވަނީ ހަމަވެފަ އެވެ.
ސަސްޕެންޝަން ހަމަވުމުން މި މަހުގެ ވިންޑޯއަށް ރޮނާލްޑޯ އަލުން ނަގާނެ ކަމަށް ބެލެވުނު ނަމަވެސް، ވޭތުވެދިޔަ ސީޒަނުގައި އަލް ނަސްރުގައި ވެސް އޭނާއަށް އިރުޝާދު ދިން ކޯޗު ހެސޫސް ވަނީ އޭނާ ބާކީކުރަން ނިންމައިފަ އެވެ. ޔޫއެފާ ނޭޝަންސް ލީގުގައި ޑެންމާކާއި ވޭލްސްއާ ދެކޮޅަށް ކުޅޭ މެޗުތަކަށް ޕޯޗުގަލްގެ ސްކޮޑު މާދަމާ އިއުލާންކުރަން ހަމަޖެހިފައިވާއިރު، ސްކޮޑުގައި އޭނާ ނުހިމެނޭކަން ކަށަވަރުވުމާ އެކު، ވޭތުވެދިޔަ 23 އަހަރު ގައުމީ ޓީމަށް ހިދުމަތްކުރި ތަރި ވަނީ ރިޓަޔާމަންޓް އިއުލާންކޮށްފަ އެވެ.
ޕޯޗުގަލްގެ ތާރީހުގައި ވެސް އެންމެ ގިނަ މެޗު ކުޅެ އެންމެ ގިނަ ލަނޑު ޖަހައިދިން ކުޅުންތެރިޔާގެ ޝަރަފު އޮތް އުމުރުން 41 އަހަރުގެ ރޮނާލްޑޯ ބުނީ، މިއީ އޭނާގެ ހަޔާތުގައި ނިންމި އެންމެ އުނދަގޫ އެއް ނިންމުން ކަމަށެވެ.
"ޕޯޗުގަލްގެ އެންމެހާ ރައްޔިތުންގެ ހައްގެއް ކަމަށްވާ ގައުމީ ޓީމު، އެ ޓީމުގެ ހަތް ނަންބަރު ޖޯޒީ އަނބުރާ ހަވާލުކުރާނެ ދުވަސް މިއަދު މިވަނީ އައިސްފައި. މިއީ އެއްގޮތަކަށް ވެސް ފަސޭހަ ނިންމުމެއް ނޫން. ސަބަބަކީ ބައެއް ނިންމުންތަކަކީ ހަމައެކަނި ސިކުނޑިން ނިންމޭނެ ނިންމުންތަކެއް ނޫން، އޭގައި ހިތުގެ ގުޅުން ވެސް ހިމެނޭ،" ސޯޝަލް މީޑިއާގައި ހިއްސާކުރި މެސެޖުގައި ރޮނާލްޑޯ ބުންޏެވެ.
ރޮނާލްޑޯ ވަނީ ޕޯޗުގަލްގެ ގައުމީ ޓީމާ އެކު ފާހަގަކޮށްލެވޭ ބޮޑެތި ކާމިޔާބީތަކެއް ހާސިލުކޮށްފަ އެވެ. އެގޮތުން ޒުވާން ކުޅުންތެރިއެއްގެ ގޮތުގައި ފެނިގެންދިޔަ 2004 ވަނަ އަހަރުގެ ޔޫރޯގެ ފައިނަލަށް އެ ގައުމު ގެންގޮސްދިނުމުގައި މުހިންމު ދައުރެއް އަދާކުރިއިރު، 2016 ގެ ޔޫރޯ މުބާރާތުގެ ތަށި އެ ގައުމުން އުފުލައިލީ އޭނާގެ ކެޕްޓަންކަމުގެ ދަށުންނެވެ. މީގެ އިތުރުން 2019 ވަނަ އަހަރުގެ ޔޫއެފާ ނޭޝަންސް ލީގުގެ އަލަތު ތައްޓާއި، މިދިޔަ އަހަރުގެ އެ މުބާރާތުގެ ތަށި ޕޯޗުގަލް އިން ހޯދުމުގައި ވެސް ރޮނާލްޑޯގެ ބޮޑު ހިއްސާއެއް އޮތެވެ.
"އޮގަސްޓް 2003 ގައި ފެށުނު އަދި އަހަރެންގެ ހަޔާތް މުޅިން ބަދަލުކޮށްލި ދަތުރުގެ ނިމުން މިއަދު މިއައީ. ގޯލުތަކާއި ތަށިތަކާއި އަދި ރެކޯޑުތައް މުސްކުޅިވެ ބަދަލުވި ނަމަވެސް، މީހުންގެ ހިތްތަކުން ލިބުނު ޖާގައަކީ ކިތަންމެ ދުވަހެއް ވިޔަސް ފޫހިކަމެއް ނެތި ހަނދާން ހުންނާނެ އެއްޗެއް. އަހަރެންގެ ގޯލަކުން ނަމަވެސް އުފަލެއް ލިބި، ގައުމާ މެދު ފަހުރުވެރި ވެވުނުނަމަ އަހަރެންގެ މި މަސައްކަތުގެ އަގު ލިބުނީ،" ގައުމީ ޓީމުގެ ދިގު ކެރިއަރު ނިންމައިލަމުން ރޮނާލްޑޯ ބުންޏެވެ.
