ކުރީގެ ރައީސް އަބްދުﷲ ޔާމީނަށް ވެރިކަމުގައި ހުންނެވި ދުވަސްވަރުވެސް ނުކިޔާ ވަރުގެ ހޫނު މަރުހަބާއެއް އައްޑޫ ސިޓީން މިފަހަރު ކިޔައިފިއެވެ.
ޔާމީނާއި ޕީއެންއެފްގެ އިސް ބޭފުޅުން މިއަދު ހަވީރު އައްޑުއަށް ވަޑައިގެންނެވުމުން، އެ ބޭފުޅުންނަށް މަރުހަބާ ދެންނެވުމަށް ގިނަ އަދަދެއްގެ ބަޔަކު އައްޑޫ އިންޓަނޭޝަނަލް އެއާޕޯޓު ސަރަހައްދަށް ވަނީ ޖަމާވެފައެވެ. އެ ސަރަހައްދަށް އެއްވެފައި ތިބި މީހުންނާއި ސަލާމްކޮށް ފޮޓޯ ނެގުމުގައި ޔާމީން ވަގުތުކޮޅެއް ހޭދަކުރައްވާފައިވެއެވެ.
ޔާމީންގެ މި ދަތުރުގައި ޕީއެންއެފްގެ ޖަލްސާތަކެއް އައްޑޫގައި ބާއްވަން ހަމަޖެހިފައިވާއިރު، އެ ޕާޓީގެ އޮފީސްތަކެއްވެސް ބައެއް އަވަށްތަކުގައި ހުޅުވަން ހަމަޖެހިފައިވެއެވެ.
ޔާމީން މި މަހުގެ 9 އާ ހަމައަށް އައްޑުއަށް ކުރައްވާ ދަތުރުގައި، އައްޑޫ ސިޓީގެ އަވަށްތަކަށާއި ވަކިން އޮންނަ ހުޅުދޫ އާއި މީދުއަށްވެސް ޒިޔާރަތްކުރައްވާނެއެވެ. މި ދަތުރުގައި އެންމެ ބޮޑު އިސްކަމެއް ދޭނީ ޕީއެންއެފަށް މެންބަރުން އިތުރު ކުރުމަށެވެ.
