އެމެރިކާގެ ރައީސް ޑޮނަލްޑް ޓްރަމްޕް، ގަތަރު ސަރުކާރުން ހަދިޔާކުރި 400 މިލިއަން ޑޮލަރުގެ އަގުބޮޑު ބޯޓުގައި އެމަނިކުފާނުގެ ފުރަތަމަ ރަސްމީ ދަތުރުފުޅު ކުރައްވައިފިއެވެ. "އެއާ ފޯސް ވަން" ގެ ގޮތުގައި ބޭނުންކުރަން ފެށި މި ބޯޓުގައި ކުރެއްވި ފުރަތަމަ ދަތުރުފުޅުގައި ޓްރަމްޕް ވަޑައިގެންނެވީ ނޯތު ޑަކޯޓާއަށެވެ. ނަމަވެސް، ބޭރު ގައުމަކުން ދިން މިފަދަ އަގުބޮޑު ހަދިޔާއެއް ރައީސަކު ބޭނުންކުރެއްވުމާ ގުޅިގެން އުފެދިފައިވާ އަޚްލާގީ އަދި ގައުމީ ސަލާމަތާ ބެހޭ ބަހުސްތައް ވައިގެ ތެރޭގައި އަދިވެސް ދަނީ ދައުރުވަމުންނެވެ.

މީގެ ކުރިން އެއާ ފޯސް ވަން ބޯޓުތަކުގައި ހުންނަ ސާދާ މަޑު ނޫކުލަ އަށް މިފަހަރު ވަނީ ބޮޑު ބަދަލެއް އައިސްފައެވެ. ޓްރަމްޕްގެ އަމިއްލަ މަތިންދާބޯޓާ ދާދި އެއްގޮތް ކުލަތަކެއް ޖައްސާފައިވާ މި އާ ބޯއިންގް 74-8i ބޯޓުގެ ބޭރުގައި ފެންނަން ހުރީ ގަދަ ނޫކުލަ، ރަތްކުލަ، އަދި ހުދުކުލައިގެ އިތުރުން ރަންކުލަ ހިމެނޭ ރީތި ފަރުމާއެކެވެ.

ޖޮއިންޓް ބޭސް އެންޑްރޫސްއިން ބޯޓަށް އަރާވަޑައިގަތުމުގެ ކުރިން ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، މިއީ މިހާތަނަށް އުފެއްދި އެންމެ ފުރިހަމަ ވިޔަފާރީގެ ބޯޓަށް ވެދާނެ ކަމަށާއި، މި ދަތުރުފުޅާ މެދު ނުހަނު އުފާކުރައްވާ ކަމަށެވެ. "މި ބޯޓު އެމީހުން (ގަތަރުން) ވަނީ ރައީސަކަށް އެންމެ އެކަށީގެންވާ ގޮތަށް ތައްޔާރުކޮށްދީފައި. އޭގެ މާނައަކީ ސަލާމަތީ ކަންކަމާއި އެކި ކަހަލަ ޒަމާނީ ވަސީލަތްތައް މީގައި ފުރިހަމަ ކުރެވިފައިވާ ކަމޭ،" ޓްރަމްޕް ވިދާޅުވިއެވެ.

މި ބޯޓުގެ އެތެރޭގެ ފަރުމާގައި ޓްރަމްޕް ގަޔާވެވަޑައިގަންނަވާ ފަދަ ލަގްޒަރީ ސިފަތައް ހިމެނެއެވެ. އޭގެ ތެރޭގައި އަގުބޮޑު ކާޕެޓްތަކާއި، ލެދަރު ގޮނޑިތަކާއި، ލަކުޑިން ޖަރީކޮށްފައިވާ ފާރުތަކުގެ އިތުރުން، ސީޓް ބެލްޓްތަކުގައި ރައީސުލްޖުމްހޫރިއްޔާގެ ރަސްމީ ސީލް ޖަހާފައިވެއެވެ. ވައިޓް ހައުސްގެ އޮފިޝަލުން ސޯޝަލް މީޑިއާގައި ހިއްސާކުރި ފޮޓޯތަކުން ބޯޓުގެ ބޮޑެތި ކޮންފަރެންސް މޭޒުތަކާއި އަރާމު ސޯފާތައް ފެނިގެންދެއެވެ.

މި ބޯޓަކީ އެމެރިކާގެ ޓެކްސް ދައްކާ މީހުންގެ އަތުން " ވަރަށް ކުޑަ ޚަރަދެއް" ހިނގި އެއްޗެއް ކަމަށް ވިދާޅުވެ ޓްރަމްޕް ވަނީ ބޭރު ގައުމެއްގެ ހަދިޔާ ގަބޫލުކުރި ކުރުން ދިފާއުކުރައްވާފައެވެ. އެމަނިކުފާނު ވިދާޅުވީ ކުރިން ބޭނުންކުރި ބޯޓަށް 35 އަހަރަށްވުރެ ގިނަ ދުވަސްވެފައިވުމުން، އެއީ އެމެރިކާ ފަދަ ގައުމަކަށް އެކަށީގެންވާ ބޯޓެއް ނޫން ކަމަށެވެ.

ނަމަވެސް، ވޮޝިންގްޓަންގެ ސިޔާސީ މައިދާނުގައި މިކަމުގެ ކަންބޮޑުވުންތައް އަދިވެސް އޮތީ އިންތިހާއަށެވެ. ފާޑުކިޔާ ފަރާތްތަކުން ބުނާ ގޮތުގައި، މެދުއިރުމަތީގެ ބާރަކުން އެމެރިކާގެ ރައީސަށް މިފަދަ އަގުބޮޑު ހަދިޔާއެއް ދިނުމަކީ ނުފޫޒު ފޯރުވުމުގެ ފުރުސަތު އޮތް އަދި ގައުމީ ސަލާމަތަށް ނުރައްކާވެދާނެ ކަމެކެވެ. މީގެ އިތުރުން، ބޯޓުގެ ސަލާމަތީ ކަންކަން ވަރުގަދަކުރުމަށް އެމެރިކާގެ އެއާ ފޯސްއިން ގާތްގަނޑަކަށް 400 މިލިއަން ޑޮލަރު ޚަރަދުކޮށްފައިވާ ކަމަށް ރިޕޯޓުތައް ބުނެއެވެ.

މި ބޯޓަކީ ބޯއިންގް ކުންފުނިން އުފައްދާ އެމެރިކާގެ ރަސްމީ އާ "އެއާ ފޯސް ވަން" ފްލީޓް ލިބެންދެން ބޭނުންކުރާ ވަގުތީ ބޯޓެކެވެ. އާ ބޯޓުތައް ލިބޭނެ ކަމަށް މިހާރު ލަފާކުރެވެނީ 2028 ވަނަ އަހަރުއެވެ.