އދ. އިސްވެ އޮވެ ހިންގި މިނިވަން ތަހުގީގީ ރިޕޯޓެއްގައި ބުނެފައިވަނީ، އިސްރާއީލުގެ ކަމާބެހޭ ފަރާތްތަކުން ގަސްތުގައި ފަލަސްތީނުގެ ކުޑަކުދިން މަރަމުންދަނީ ޣައްޒާގައި ހިންގަމުންދާ ނަސްލު ނައްތާލުމުގެ ލާއިންސާނީ އަމަލުތަކުގެ މުހިންމު ބައެއްގެ ގޮތުގައި ކަމަށެވެ.

އދ. ގެ އިންޑިޕެންޑެންޓް އިންޓަނޭޝަނަލް ކޮމިޝަން އޮފް އިންކުއަރީން ނެރުނު މި ރިޕޯޓުގައި ފާހަގަކޮށްފައިވާ ގޮތުގައި، ކުޑަކުދިން ރޭވުންތެރިކަމާއެކު މެރުމާއި، ނުކުޅެދުންތެރިންނަށް ހެދުމާއި، ބަނޑަށް ޖެއްސުމަކީ ފަލަސްތީނުގެ މުޖުތަމައުގެ ބިންގާ މުގުރާލުމަށް އިސްރާއީލުގެ ސަލާމަތީ ބާރުތަކުން ގެންގުޅޭ "ނަސްލު ނައްތާލުމުގެ ނިޔަތް" ހާމަކޮށްދޭ ހެއްކެކެވެ.

މި ރިޕޯޓުގައި ބުނެފައިވާ ގޮތުގައި، 2025 ވަނަ އަހަރުގެ އޮކްޓޫބަރު މަހު އިއުލާނުކުރި 'ސުލްހައިގެ އެއްބަސްވުމަށް' ފަހުވެސް، ބަޑީގެ ހަމަލާތަކާއި، ވައިގެ މަގުން ދޭ ހަމަލާތަކާއި، ޑްރޯންތައް ބޭނުންކޮށްގެން ފަލަސްތީނުގެ ކުޑަކުދިން މެރުމާއި ޒަހަމްކުރުން ހުއްޓުމެއް ނެތި ކުރިއަށްދެއެވެ.

ތަހުގީގީ ޓީމުން ބަޔާންކުރި ގޮތުގައި، މެދުކެނޑުމެއްނެތި ކުރިއަށްދާ އަސްކަރީ އޮޕަރޭޝަންތަކުގެ ސަބަބުން ލިބޭ ނަފްސާނީ ބޮޑެތި ގެއްލުންތަކާއި، މަޖުބޫރުން ރަށްވެހިކަމުން ބޭރުކުރުމާއި، ކުދިން ޔަތީމުވުމުގެ ސަބަބުން ޣައްޒާގެ ކުޑަކުދިންގެ "ޅަފަތުގެ ދައުރު" މުޅިން ނެތިގޮސްފިއެވެ.

ކޮމިޝަނުގެ މުގައްރިރު، ފަނޑިޔާރު ސްރިނިވަސަން މުރާލިދަރު ފާހަގަކުރެއްވި ގޮތުގައި، އެންމެ ޅަ ޖީލަށް އަމާޒުކޮށް ހަމަލާދިނުމަކީ، ފަލަސްތީނުގެ ރައްޔިތުންނަށް ދުނިޔޭގައި ދެމިތިބުމަށާއި އަމިއްލަ މުސްތަގުބަލު ކަނޑައެޅުމަށް އޮތް ފުރުސަތު ނައްތާލުމަށް އިސްރާއީލުން ކުރާ މަސައްކަތެކެވެ.

މި ތަހުގީގުން ދައްކާ ހިސާބުތަކަށް ބަލާއިރު، ނަސްލު ނައްތާލުމުގެ މި އަމަލުތައް ފެށުނު ފުރަތަމަ ދެ އަހަރުގެ ތެރޭގައި އެކަނިވެސް މަދުވެގެން 20,179 ކުޑަކުދިން މަރާލާފައިވާއިރު، 44,000 އަށްވުރެ ގިނަ ކުދިން ވަނީ ޒަހަމްކޮށްލާފައެވެ. މީގެ ސަބަބުން ޣައްޒާގެ ދެން އޮތް ޖީލަކީ ދާއިމީ ނުކުޅެދުންތެރިކަމެއްގައި އުޅެންޖެހޭނެ ބައެއްކަން މިހާރު ވަނީ ޔަގީންވެފައެވެ.

މީގެ އިތުރުން، އިސްރާއީލުން ހިފާފައިވާ ހުޅަނގު އައްސޭރީގައިވެސް، އިސްރާއީލުގެ ވަޒަންވެރިން ކުޑަކުދިންނަށް ދޭ އަނިޔާތައް ވަރަށް ބޮޑަށް އިތުރުވެފައިވާކަން މި ކޮމިޝަނުން ވަނީ ފާހަގަކޮށްފައެވެ. އަދި މި ލާއިންސާނީ އަމަލުތަކުގައި ބައިވެރިވި އިސްރާއީލުގެ އަސްކަރީ ލަޝްކަރުތަކާއި ޔުނިޓުތައްވެސް ވަނީ ދެނެގަނެފައެވެ.

ތަހުގީގު ކުރި ފަރާތްތަކުން ވަނީ، މި ހަނގުރާމަވެރި ޖަރީމާތަކާއި އިންސާނިއްޔަތާ ހިލާފު އަމަލުތަކަށް ޒިންމާވާ ފަރާތްތަކާ މެދު ވަގުތުން ފިޔަވަޅު އެޅުމަށް އދ. ގެ ހުރިހާ މެންބަރު ގައުމުތަކަށް ގޮވާލާފައެވެ.