ދައުލަތުގެ ބޯހިޔާ ވަހިކަމުގެ ސިޔާސަތުގެ ދަށުން ކުރިއަށް ގެންދާ ބިންވެރިޔާ ސްކީމްގެ ދަށުން ދޫކުރާ ގޯއްޗާއި، ގެދޮރުވެރިޔާ ސްކީމްގެ ދަށުން ދޫކުރާ ގޯއްޗާއި ފުލެޓް ލިބޭނެ ކަމަށް ބުނެ، ސްކޭމްތަކެއް ހިންގަމުން ގެންދާތީ އެކަމަށް ސަމާލުވުމަށް ހައުސިން މިނިސްޓްރީން އިލްތިމާސް ކޮށްފިއެވެ.
އެކަމަށް އިލްތިމާށްކޮށް އެ މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، ގޯއްޗާއި ފުލެޓު ދިނުމުގެ އެންމެހައި މަސައްކަތްތައް ކުރިއަށް ގެންދާނީ ދިވެހި ސަރުކާރުގެ ގެޒެޓުގައި ޝާއިއުކޮށް އާންމު ކޮށްފައިވާ އުސޫލުތަކާ އެއްގޮތަށް ކަމަށެވެ.
އެހެންކަމުން ސަރުކާރުގެ ޕްރޮގްރާމެއްގެ ދަށުން ދޫކުރާ ގޯތި ނުވަތަ ފުލެޓު ހޯދުމުގެ ގޮތުން އެއްވެސް ފަރާތަކާ ފައިސާގެ ނުވަތަ އެފަދަ އެހެން އެއްވެސް މުއާމަލާތެއް އެއްވެސް ފަރާތަކުން ނުކުރުމަށް އެ މިނިސްޓްރީން ވަނީ އެދިފައެވެ. އަދި ސަރުކާރުގެ ރަސްމީ އުސޫލު ތަކުގެ ބޭރުން އެއްވެސް މުއާމަލާތެއް ނުހިންގުމަށްވެސް އެ ބަޔާނުގައި މިނިސްޓްރީން ވަނީ އަންގައިފައެވެ.
ސަރުކާރުގެ ގެޒެޓުގައި އާންމުކޮށްފައިވާ އުސޫލެއް ނުވަތަ އިއުލާނެއްގައި ބަޔާންކޮށްފައިވާ ކަންތައްތަކުގެ ބޭރުން ގޯއްޗާއި، ފުލެޓު ހޯދުމަށް އެއްވެސް ފަރާތަކުން އެއްވެސް މުއާމަލާތެއް ކޮށްފިނަމަ ނުވަތަ އެފަދަ މައުލޫމާތެއް ލިބިއްޖެނަމަ ލަސްނުކޮށް ރިޕޯޓު ކުރުމަށްވެސް ވަނީ އެދިފައެވެ.
މިފަދަ މައްސަލަތައް ރިޕޯޓުކުރުމަށް މޯލްޑިވްސް ޕޮލިސް ސާވިސްގެ އެންޓި ސްކޭމް ސެންޓަރުގެ ހޮޓްލައިން ނަންބަރު 125 އަށް ގުޅުމަށްވެސް އެ މިނިސްޓްރީން ވަނީ އިލްތިމާސް ކޮށްފައެވެ.
