ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަކީ ހުދުމުހުތާރު ސަރުކާރެއް ކަމަށް ބުނެ އިދިކޮޅު ފަރާތްތަކުން ކުރާ ތުހުމަތުތައް އެ މަނިކުފާނު މިއަދު ވަރުގަދައަށް ދޮގުކުރައްވައިފި އެވެ.
ރައީސް ވިދާޅުވީ އެ މަނިކުފާނުގެ ވެރިކަމަކީ ޑިމޮކްރެސީގެ އެންމެ ފުރިހަމަ މިސާލު ކަމަށާއި، "ހުދުމުހުތާރު" މި ލަފުޒު މި ސަރުކާރާ ގުޅުވަން ހިތަށް އެރުވުމަކީ ވެސް ކުރެވޭނެ ކަމެއް ނޫން ކަމަށެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ރާއްޖޭގައި ޑިމޮކްރެސީގެ ހަމަތައް އެންމެ ފުރިހަމައަށް ހިންގަމުންދަނީ މިވީ ދެ އަހަރެއްހާ ދުވަހުގެ ތެރޭގައި ކަމަށެވެ. އެގޮތުން، އިދިކޮޅު އެމްޑީޕީގެ ޕްރައިމަރީ ބޭއްވުމަށް ސަރުކާރުގެ ސްކޫލްތަކާއި އިދާރާތައް ދޫކޮށް، ފުރިހަމަ އެހީތެރިކަން ދީފައިވާކަން އެ މަނިކުފާނު ފާހަގަކުރެއްވި އެވެ.
އަދި ކުރިން ހަމައެކަނި ކާނިވާ ސަރަހައްދުގައި އެއްވެވޭ ގޮތަށް އޮތް އޮތުން ބަދަލުކޮށް، މިހާރު މާލޭގެ ފަސް ސަރަހައްދެއްގައި އެއްވެވޭނެ ފުރުސަތު ފަހިކޮށްދީފައިވާ ކަމަށް ވެސް ވިދާޅުވި އެވެ.
"ހުދުމުހުތާރު އެ ލަފުޒު ބޭނުންކުރާ ނަމަ ބޭނުން ކުރަން ޖެހޭނީ ކުރީގެ ސަރުކާރުތަކަށް. މި ސަރުކާރާ ދެކޮޅަށް ބޭނުންކުރެވޭނެ، ބޭނުންކުރަން ހިތަށް ވެސް އެރުވޭނެ އެއްޗެއް ނޫން އެއަކީ،" ރައީސް ވިދާޅުވި އެވެ.
މި ސަރުކާރުގެ ޑިމޮކްރެސީގެ މިސާލެއްގެ ގޮތުން ރައީސް ދެއްކެވީ ރައްޔިތުންނާ ގާތުން މަސައްކަތް ކުރެއްވުމެވެ. ހުރިހާ އަވަށަކާއި، ކައުންސިލްތަކާއި، މުއައްސަސާތަކާ ބައްދަލުކުރައްވައި، ރައްޔިތުން ބޭނުންވާ ކަންކަން އަޑުއައްސަވައިގެން އަމަލީ ސިފަ ގެނެސްދެއްވަމުން ގެންދަވާ ކަމަށް އެ މަނިކުފާނު ވިދާޅުވި އެވެ. އަދި ސިޔާސީ ބޭނުމަކަށް އެއްވެސް ލީޑަރަކު ޖަލަށްލާފައި ނުވާނެ ކަމަށް ވެސް ވިދާޅުވި އެވެ.ނަމަވެސް، އިދިކޮޅު ފަރާތްތަކުގެ ކަންބޮޑުވުންތައް މިކަމާ މުޅިން ތަފާތެވެ. އެ ފަރާތްތަކުން ތުހުމަތުކުރާ ގޮތުގައި ސަރުކާރުން ދަނީ ހީލަތްތެރި ރޭވުމެއްގެ ދަށުން ބާރުތައް މުށުތެރެއަށް ލަމުންނެވެ.
އެގޮތުން ފާހަގަކުރާ ބައެއް ކަންކަމަކީ:
- މަޖިލީހުގެ މެޖޯރިޓީ ބޭނުންކޮށްގެން އެންމެ ދުވަހަކުން ގާނޫނުއަސާސީ ބަދަލުކޮށް، މެންބަރުންގެ ގޮނޑި ގެއްލޭ ގޮތް ހެދުން.
- ސުޕްރީމް ކޯޓުގެ ބެންޗަށް ބަދަލުތައް ގެނެސް، ދުސްތޫރީ މައްސަލަތައް ކުރިއަށް ނުގެންގޮސް ހިފެހެއްޓުން.
- ރައީސް އޮފީހުގެ ސިޔާސީ މަގާމެއްގައި ހުންނެވި ބޭފުޅަކު ޕްރޮސެކިއުޓަ ޖެނެރަލްގެ މަގާމަށް އައްޔަންކުރުން.
- ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން މަސައްކަތްކުރުން.
މަޖިލީހުގެ އިސް މަގާމުތަކަށް މެންބަރުން އައްޔަންކުރުމުގައި ވެސް ރައީސް މުއިއްޒު ސީދާ ގޮތުން ގޮތް ނިންމަވާފައިވާ އިރު، ޕީއެންސީގެ މެޖޯރިޓީ އޮންނަ މަޖިލީހުން މިހާރު ކަންކަން ނިންމަމުން ދަނީ ސަރުކާރުން ބޭނުންވާ ގޮތަށް ކަމަށް އިދިކޮޅު ފަރާތްތަކުން ފާހަގަކުރެ އެވެ.
މި ހުރިހާ ތުހުމަތުތަކެއް ހުރި ނަމަވެސް، ރައީސް މުއިއްޒު ބާރުއަޅުއްވަނީ މި ސަރުކާރަކީ ރައްޔިތުންގެ ބައިވެރިވުމާއެކު ހިންގާ، ޑިމޮކްރެސީގެ ފުރިހަމަ މިސާލެއް ކަމަށެވެ.
