ދަރަނީގެ ގޮތުގައި ރާއްޖެއިން ސުކޫކަށް ދައްކަންޖެހޭ ފައިސާ މިވަގުތު ދައްކަން ޖެހުނަސް އެކަން ކުރާވަރަށް ސަރުކާރުގައި ފައިސާ އެބަހުރިކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނިއުސްކޮންފަރެންސްގައި ރައީސް މުއިއްޒު ވިދާޅުވީ، 500 މިލިޔަން ޑޮލަރުގެ ސުކޫކު އަންނަ އޭޕްރީލް މަހުގެ އަށްވަނަ ދުވަހު ދައްކަން ސަރުކާރުން ނިންމާފައިވާ ކަމަށެވެ.
މުއިއްޒު ވިދާޅުވީ ސުކޫކު ދެއްކުމަށްޓަކައި 650 މިލިޔަން ޑޮލަރަށްވުރެ ގިނަ ފައިސާ ރައްކާކޮށްފައިވާކަމަށެވެ. އަދި ރާއްޖޭގެ ގްރޮސް ރިޒާވްގައި 1.27 ބިލިޔަން އެމެރިކާ ޑޮލަރު އެބަހުރި، ކަމަށާއި، މިއީ ރާއްޖޭގެ ތާރީހުގައި ދުވަހަކުވެސް ގްރޮސް ރިޒާވް މައްޗަށް ނުދާ މިންވަރެއް ކަމަށް ރައީސް ވިދާޅުވިއެވެ.
އެގޮތުން ރޭގެ ނިޔަލަށް އެސްޑީއެފްގައި 320 މިލިޔަން ޑޮލަރަށްވުރެ ގިނައިން އެބަހުރި ކަމަށާއި، ޔޫސަބަލް ރިޒާވުގަ 330 މިލިޔަން ޑޮލަރަށްވުރެ ގިނަ ފައިސާ އެބަހުރި ކަމަށްވެސް ވިދާޅުވިއެވެ.
އެހެންކަމުން ޖުމްލަ 650 މިލިޔަން ޑޮލަރަށްވުރެ ގިނަ ފައިސާ ރައްކާކޮށްފައި އެބަހުރި ކަމަށް ވިދާޅުވިއެވެ.
ރައީސް ވިދާޅުވީ މިއަހަރަށް ބޭނުންވާ އިތުރު ފައިސާ ހޯދުމަށްވެސް ގިނަ މަސައްކަތްތަކެއް ކުރެވެމުންދާ ކަމަށާއި، ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމަށެވެ.
