މަސްތަކެއް ވަންދެން އިސްރާއީލާއި އެމެރިކާގެ ޖާސޫސީ އިދާރާތަކުން ސީ.އައި.އޭ ހިމެނޭހެން ދިޔައީ އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީއަށް ފާރަލަމުންނެވެ. އެއީ އޭނާއަށް ހަމަލާދިނުމަށް އެންމެ އެކަށީގެންވާ ވަގުތެއް ހޯދުމަށެވެ. މިކަމާ ބެހޭ މަޢުލޫމާތު އެނގޭ ފަސް މަސްދަރަކުން ސީ.އެން.އެން އަށް ކިޔައިދީފައިވާ ގޮތުގައި، ޖާސޫސީ އިދާރާތަކުން ދިޔައީ ޚާމަނާއީގެ ދިރިއުޅުމުގެ އާދަކާދަތަކަށް ފާރަލަމުންނެވެ. އޭގެ ތެރޭގައި އޭނާ ދިރިއުޅޭ ތަންތަނާއި، ބައްދަލުކުރާ މީހުންނާއި، މުއާސަލާތު ކުރާ ގޮތްތަކުގެ އިތުރުން، ހަމަލާއެއް އަތުވެދާނެ ކަމުގެ ބިރު އޮތް ހާލަތެއްގައި އޭނާ ރައްކާތެރިކަން ހޯދާނެ ތަންތަންވެސް ހިމެނެއެވެ. މީގެ އިތުރުން، އީރާނުގެ ސިޔާސީ އަދި އަސްކަރީ އިސް ވެރިންނަށްވެސް ދިޔައީ ފާރަލަމުންނެވެ. މި ވެރިންނަކީ ގާތްގަނޑަކަށް ސާޅީހަކަށް އަހަރު ވަންދެން ގައުމުގެ އެންމެ މަތީ ވެރިޔާގެ މަގާމުގައި ހުންނެވި ޚާމަނާއީއާ އެއްތަނަކުން ވަރަށް ނާދިރު ހާލަތެއްގައި ނޫނީ ބައްދަލުވާ ބައެއް ނޫނެވެ.
ވޭތުވެދިޔަ މަދު ދުވަސްކޮޅުގެ ތެރޭގައި، އެ ފުރުސަތު އެފަރާތްތަކަށް ލިބުނެވެ. ޚާމަނާއީ ހިމެނޭހެން އީރާނުގެ މަތީ ފަންތީގެ އޮފިޝަލުން ހޮނިހިރު ދުވަހުގެ ހެނދުނު ތެހެރާންގެ ކޮމްޕައުންޑެއްގެ ތެރޭގައި ހުރި ތަފާތު ތަންތަނުގައި ބައްދަލުކުރަން ނިންމިއެވެ. އެއީ އާޔަތުﷲ ގެ އޮފީސްތަކާއި، އީރާނުގެ ރިޔާސީ އޮފީހާއި، ގައުމީ ސަލާމަތާ ބެހޭ އިދާރާ ހުންނަ ސަރަހައްދެވެ. އިސްރާއީލުގެ މަސްދަރަކުން ސީއެންއެންއަށް ގޮތުގައި، އާންމުކޮށް ވަރަށް ބޮޑަށް ސަލާމަތީ ފިޔަވަޅުތައް ވަރުގަދަކުރައްވާ ޚާމަނާއީއަށް، ރޭގަނޑަށްވުރެ ދުވާލުގެ ވަގުތުތަކުގައި ނުރައްކާ ކުޑަކަމަށް ގަބޫލުކުރެވުނެވެ. އެހެންކަމުން އެ ވަގުތު އޭނާގެ ސަލާމަތީ ކަންކަމަށް ދެއްވާ ސަމާލުކަން ކުޑައެވެ.
އެމެރިކާ އަދި އިސްރާއީލުގެ ބައެއް އޮފިޝަލުން ގަބޫލުކުރި ގޮތުގައި، މިއީ ދޫކޮށްލެވޭ ވަރަށްވުރެ ރަނގަޅު ފުރުސަތެކެވެ.
މިކަމާ ބެހޭ މަޢުލޫމާތު އެނގޭ ތިން މީހަކު ސީއެންއެންއަށް ބުނި ގޮތުގައި، ކުރިން ރޭގަނޑުގެ އަނދިރީގައި ދޭން ރޭވި ހަމަލާ، ދުވާލުގެ ވަގުތަށް ބަދަލުކުރިއެވެ. އިސްރާއީލުގެ އަސްކަރިއްޔާގެ ޗީފް އޮފް ސްޓާފް އީޔަލް ޒާމިރު، އެ ގައުމުގެ ވައިގެ ސިފައިންނަށް ފޮނުއްވި ނޯޓެއްގައި މި ހަމަލާގެ މުހިންމުކަން ބަޔާންކުރެއްވިއެވެ.
"ހޮނިހިރު ދުވަހުގެ ފަތިހު 'އޮޕަރޭޝަން ރޯރިންގ ލަޔަން' ފެށޭނެއެވެ. ކަނޑައެޅިފައިވާ އަމާޒުތަކަށް ހަމަލާދިނުމުގެ ހުއްދަ ތިޔަބޭފުޅުންނަށް މިހާރު ވަނީ ދެވިފައެވެ. އަޅުގަނޑުމެން މިއަދު މި އުފައްދަނީ ތާރީޚެވެ. އަޅުގަނޑު ތިޔަބޭފުޅުންނަށް އިތުބާރު ކުރަމެވެ. އަޅުގަނޑުމެން އެންމެންނަށް ކާމިޔާބަށް އެދެމެވެ." އިސްރާއީލުގެ އަސްކަރިއްޔާގެ ޗީފް އޮފް ސްޓާފް އީޔަލް ޒާމިރު، ވިދާޅުވިއެވެ.
އިސްރާއީލުގެ ގަޑިން ހެނދުނު 6 ޖަހާކަންހާއިރު، ދުވާލުގެ އަލިކަމުގެ ތެރޭގައި، އެމެރިކާއާއި އިސްރާއީލު ގުޅިގެން ދިން ވަރުގަދަ ހަމަލާތަކެއްގައި އިސްރާއީލުގެ ހަނގުރާމަމަތީ ބޯޓުތަކުން އެ ކޮމްޕައުންޑަށް ބޮން އެޅިއެވެ. މަސްދަރުތަކުން ސީއެންއެންއަށް ބުނި ގޮތުގައި، މި ހަމަލާގައި ބޭނުންކުރީ ވަރަށް އަމާޒު ސީދާ ހަތިޔާރާއި ދުރު ރާސްތާގެ މިސައިލެވެ. ކޮމްޕައުންޑްގެ ތެރޭގައި ވެރިން ތިއްބެވި ތިން ތަނަށްވެސް އެއްވަގުތެއްގައި ހަމަލާ އެރިއެވެ. އޭގެ ގަޑިއިރުތަކެއް ފަހުން، ރައީސް ޑޮނަލްޑް ޓްރަމްޕް ވަނީ ޚާމަނާއީ އަވަހާރަވެއްޖެކަން އިއުލާނު ކުރައްވާފައެވެ.
"އަޅުގަނޑުމެންގެ ޖާސޫސީ ނިޒާމުތަކާއި ވަރަށް ކުރިއަރާފައިވާ ޓްރެކިންގ ސިސްޓަމްތަކުން އޭނާއަށް ސަލާމަތެއް ނުވެވުނެވެ. އިސްރާއީލާ ގުޅިގެން ކުރި މި މަސައްކަތުގައި، އޭނާއަށްވެސް އަދި އޭނާއާއެކު މަރުވި އެހެން ވެރިންނަށްވެސް ކުރެވޭނެ އެއްވެސް ކަމެއް ނެތެވެ." ޓްރަމްޕު ވިދާޅުވިއެވެ.
އެމެރިކާއިން އެ ސަރަހައްދަށް ބޮޑެތި އަސްކަރީ ބާރުތައް ޖަމާކޮށް، ޓްރަމްޕްގެ ހަމަލާގެ އިންޒާރުތައް އޮތް ވަގުތެއްގައި، އީރާނުގެ އެންމެ އިސް ވެރިން އިންގިލާބީ ގާޑުންގެ ކޮމާންޑަރާއި ދިފާއީ ވަޒީރު ހިމެނޭހެން ތެހެރާންގެ މެދުތެރޭގައި ޚާމަނާއީއާ އެއް ސަރަހައްދަކަށް އެއްވީ ކީއްވެގެން ކަމެއް އަދިވެސް ސާފެއް ނުވެއެވެ. އިސްރާއީލުގެ ޖާސޫސީ އިދާރާތަކުން ކަށަވަރުކުރި ގޮތުގައި، ޚާމަނާއީގެ އެންމެ އިސް މުޝީރުން ކަމަށްވާ ދިފާއީ ވަޒީރު އަޒީޒް ނާސިރުޒާދާ، މިލިޓަރީ ކައުންސިލްގެ ވެރިޔާ އެޑްމިރަލް އަލީ ޝަމްޚާނީ، ޑެޕިއުޓީ އިންޓެލިޖެންސް މިނިސްޓަރު މުހައްމަދު ޝީރާޒީ، އިންގިލާބީ ގާޑުންގެ ކޮމާންޑަރު މުހައްމަދު ޕާކްޕޫރު އަދި އެ ގައުމުގެ އެއިރޯސްޕޭސް ފޯސްގެ ކޮމާންޑަރު ސައްޔިދު މަޖީދު މޫސަވީ ފަދަ ބޭފުޅުން އެތަނުގައި ތިއްބެވިއެވެ. އަދި އެ ބޭފުޅުންގެ ބަދަލުގައި ދެން އަންނާނީ ކޮން ބައެއްކަންވެސް އަދި އޮތީ ނޭނގުމެއްގެ ތެރޭގައެވެ.
ކުރިއަށް އޮތް ތަނުގައި ވާނެ ގޮތަކާ މެދު ބޮޑެތި ނޭނގުންތަކެއް ހުރި ނަމަވެސް، މި އޮޕަރޭޝަނުން ހާމަވެގެން ދިޔައީ ފާއިތުވި މަސްތަކުގައި އީރާނުގެ އެތެރޭގައި އިސްރާއީލާއި އެމެރިކާގެ ޖާސޫސީ ނެޓްވޯކް ކިހާ ވަރުގަދަވެފައިވާ ކަމާއި، ފުރުސަތެއް ލިބުމާއެކު ދެ ގައުމުން ހަރަކާތްތެރިވީ ކިހާ އަވަހަށް ކަމެވެ.
"އިސްރާއީލުން އަބަދުވެސް ދަނީ ދުޝްމަނުންގެ ހުރިހާ ލީޑަރުންނަށް ކޮންމެވެސް ސިފައެއްގައި ފާރަލަމުންނެވެ. މިފަދަ އޮޕަރޭޝަނެއް ހިންގާއިރު، އިތުރު ޖާސޫސީ މަޢުލޫމާތު ބޭނުންވެއެވެ. އަދި ތަފާތު އެތައް ކަމެއް އެއްކޮށް ގުޅުވާލަން ޖެހެއެވެ. މިއީ ވަރަށް އުނދަގޫ ކަމެކެވެ." އިސްރާއީލުގެ އަސްކަރީ އޮފިޝަލަކު ވިދާޅުވިއެވެ:
އިސްރާއީލުގެ ޖާސޫސީ އިދާރާތައް އީރާނުގެ ތެރެއަށް ވަދެފައިވާ މިންވަރު މީގެ ކުރިންވެސް ވަނީ ދައްކާފައެވެ. އޭގެ ތެރޭގައި އަސްކަރީ އިސް ވެރިންނާއި ނިއުކްލިއާ ސައިންސްވެރިން އަވަހާރަކޮށްލުން ހިމެނެއެވެ. ނަމަވެސް ޖޫން މަހު އިސްރާއީލާއި އީރާނާ ދެމެދު ހިނގި 12 ދުވަހުގެ ހަނގުރާމައަށްފަހު، އިސްރާއީލުގެ ދިފާއީ ވަޒީރު އިއުތިރާފްވެވަޑައިގަތީ އީރާނުގެ އެންމެ މަތީ ލީޑަރަށް އަމާޒުކޮށް ހަމަލާދިނުމުގެ ފުރުސަތެއް މީގެ ކުރިން ލިބިފައިނުވާ ކަމަށެވެ.
ނަމަވެސް މިފަހަރު ކަންތައްވީ ތަފާތުކޮށެވެ.
އިސްރާއީލާއި އެމެރިކާ ގުޅިގެން މި އޮޕަރޭޝަނަށް ތައްޔާރުވަމުން އަންނާތާ ހަފުތާތަކެއް ވެއްޖެއެވެ. ކްރިސްމަސްގެ ފަހު ހަފުތާގައި މާ-އަ ލާގޯއަށް ކުރެއްވި ޒިޔާރަތެއްގައި، ބޮޑުވަޒީރު ބެންޖަމިން ނަތަންޔާހޫ ވަނީ ޓްރަމްޕަށް މަޢުލޫމާތު ދެއްވާފައެވެ. އެއީ ޖޫން މަހު އެމެރިކާއިން އީރާނުގެ ނިއުކްލިއާ މަރުކަޒުތަކަށް ދިން ހަމަލާތަކަށްފަހު، އީރާނުން އަލުން ބެލިސްޓިކް މިސައިލް ޕްރޮގްރާމާއި ނިއުކްލިއާ މަސައްކަތްތައް ކުރިއަށްގެންދަން މަސައްކަތް ކުރަމުންދާ ކަމަށެވެ. އެ ބައްދަލުވުމުގައި ޓްރަމްޕް ވިދާޅުވީ، އީރާނުގެ މިސައިލް ސައިޓްތައް ނައްތާލުމަށް އިސްރާއީލުން ކުރާ އައު މަސައްކަތްތަކަށް އޭނާ ތާއީދުކުރައްވާނެ ކަމަށެވެ.
އޭގެ މަދު ދުވަސްކޮޅެއް ފަހުން އީރާނުގެ އެތެރޭގައި ބޮޑެތި މުޒާހަރާތަކެއް ފެށުނެވެ. އެކަމާ ގުޅިގެން އީރާނު ސަރުކާރުން ހިންގި ހަރުކަށި އަމަލުތަކުގައި އެތައް ހާސް ބަޔަކު މަރުވިއެވެ. ޓްރަމްޕް ވަނީ މުޒާހަރާގެ ބައިވެރިންނަށް އެހީވާނެ ކަމަށް ވައުދުވެ، އެމެރިކާ އޮތީ ހަމަލާދޭން ތައްޔާރަށް ކަމަށް ވިދާޅުވެފައެވެ. އެމެރިކާ-އިސްރާއީލު ގުޅިފައިވާ އޮޕަރޭޝަންގެ ރޭވުންތައް އިތުރަށް ވަރުގަދަވެގެން ދިޔައީ އެ ހިސާބުންނެވެ.
އެ ވަގުތު، މިފަދަ ބޮޑު އޮޕަރޭޝަނެއް ހިންގުމަށާއި، އީރާނުން ދީފާނެ ބަދަލު ހިފުމުގެ ހަމަލާއަކުން އެ ސަރަހައްދުގައި ހުރި އެމެރިކާގެ މަސްލަހަތުތައް ހިމާޔަތްކުރުމަށް ބޭނުންވާ ވަރުގަދަ އަސްކަރީ ވަސީލަތްތަކެއް އެ ސަރަހައްދަކު ނެތެވެ. ނަމަވެސް ޖެހިގެން އައި ހަފުތާތަކުގައި އެ ތަކެތި ފޮނުވުނެވެ. ދުނިޔޭގެ އެންމެ ބޮޑު މަތިންދާބޯޓު އުފުލާ މަނަވަރު ހިމެނޭހެން ދެ މަނަވަރަކާއި، އެތައް ސަތޭކަ ޖެޓްތަކާއި، ސަބްމެރިންތައް މެދުއިރުމައްޗަށް ފޮނުވުނެވެ. މި ތައްޔާރީތައް ދުނިޔެއަށާއި އީރާނަށްވެސް ވަރަށް ސާފުކޮށް ފެނުނެވެ. އަދި މިއީ ޑިޕްލޮމެޓިކް ވާހަކަތަކުގައި އެމެރިކާއަށް ލިބުނު ބާރަކަށް ވިއެވެ.އެ ދަނޑިވަޅުގައި، އިސްރާއީލުގެ އަސްކަރީ އަދި ޖާސޫސީ އިސް އޮފިޝަލުން ދިޔައީ ތަކުރާރުކޮށް ވޮޝިންގޓަނަށް ދަތުރުކޮށް ރޭވުންތައް ރާވަމުންނެވެ. އިސްރާއީލުގެ ޑިފާންސް ފޯސްގެ ޗީފް އޮފް ސްޓާފާއި، މިލިޓަރީ އިންޓެލިޖެންސްގެ ވެރިޔާ އަދި މޮސާޑްގެ ޑިރެކްޓަރު ކުރެއްވި ޒިޔާރަތްތަކުގެ މައިގަނޑު ބޭނުމަކީ މި މިޝަނަށް ތައްޔާރުވުމެވެ.
ފެބްރުއަރީ 11 ވަނަ ދުވަހު ޓްރަމްޕާއި ނަތަންޔާހޫ ވޮޝިންގޓަނުގައި ބޭއްވި ބައްދަލުވުންވެސް ހަފުތާއެއް ކުރިއަށް ޖެއްސީ، ހަމަލާ ދިނުމުގައި ރައީސް ޓްރަމްޕް ދެމިހުންނެވިކަން ކަށަވަރު ކުރުމަށް ބޮޑުވަޒީރު ބޭނުންފުޅުވުމުންނެވެ.
އީރާނާއެކު ނިއުކްލިއާ އެއްބަސްވުމަކަށް އައުމަށް ކުރަމުންދިޔަ މަސައްކަތްތަކާ ހުރެ، ޓްރަމްޕް ބޭރުފުށުން ދެއްކެވީ އަސްކަރީ ހަމަލާއަކަށް އޭނާ އަދި ތައްޔާރު ނޫން ކަމަށެވެ. ނަތަންޔާހޫއާއެކު ބޭއްވި ބައްދަލުވުމަކީ ވަކި ގޮތެއް ނުނިމޭ ބައްދަލުވުމެއްގެ ގޮތުގައި އޭނާ ސިފަކުރެއްވިއެވެ.
"އީރާނާއެކު އެއްބަސްވުމަކަށް އާދެވޭތޯ މަޝްވަރާތައް ކުރިއަށް ގެންދިއުމަށް އަޅުގަނޑު ބާރުއެޅުން ފިޔަވައި، ވަކި ސީދާ ނިންމުމެއް ނުނިންމަމެވެ." ޓްރަމްޕު ވިދާޅުވިއެވެ.
މި ބައްދަލުވުން ކުރިއަށްދިޔައީ މީޑިއާއަށް ސިއްރުކޮށެވެ. މިއީ އާންމުކޮށް ޓްރަމްޕް ބޭރުގެ ވެރިންނާ ބައްދަލުކުރައްވާ ގޮތެއް ނޫނެވެ. އިސްރާއީލުގެ އޮފިޝަލަކު ބުނި ގޮތުގައި މި ބައްދަލުވުން ސިއްރުކުރީ، މިއީ ހަމައެކަނި މަސައްކަތުގެ ބައްދަލުވުމަކަށް ވާތީއެވެ. ނަމަވެސް، މި ބައްދަލުވުމުގެ ބޭނުމަކީ އީރާނާއެކު މަޝްވަރާކުރުމާ މެދު ދެ ބޭފުޅުންގެ މެދުގައި ހުރި ހިޔާލުތަފާތުވުންތައް ފޮރުވުމެވެ. ނަތަންޔާހޫ ވިދާޅުވަމުން ގެންދެވީ އީރާނަށް އިތުބާރު ނުކުރެވޭނެ ކަމަށެވެ. ނަމަވެސް ޓްރަމްޕް ބޭނުންވީ އައު ހަނގުރާމައެއް ފެށުމުގެ ކުރިން ޑިޕްލޮމެޓިކް ހުރިހާ ދޮރުތަކެއް ބޭނުންކުރުމަށެވެ.
ޖެހިގެން އައި ދެ ހަފުތާގެ ތެރޭގައި، އީރާނާއެކު މަޝްވަރާކުރުމަށް ޓްރަމްޕް ކަނޑައަޅުއްވާފައިވާ މަންދޫބުން ކަމަށްވާ ސްޓީވް ވިޓްކޮފް އަދި ޖެރެޑް ކުޝްނަރ ދިޔައީ އީރާނުން އެ ގައުމުގެ ނިއުކްލިއާ މަސައްކަތްތަކާ މެދު ދޫދޭނެ މިންވަރެއް ބަލަމުންނެވެ. އެމެރިކާގެ ގިނަ އޮފިޝަލުން ގަބޫލުކުރި ގޮތުގައި، ޓްރަމްޕް އެދިވަޑައިގަންނަވާ ގޮތަށް އީރާނުން ދާއިމީކޮށް ނިއުކްލިއާ މަސައްކަތްތައް ހުއްޓައެއް ނުލާނެއެވެ. އީރާނުން ބައެއް ކަންކަމުގައި ދޫދިން ނަމަވެސް، އެއީ ޓްރަމްޕަށް ފުދޭވަރުގެ ކަންކަމެއް ނޫނެވެ.
އެމެރިކާ ސަރުކާރުން އީރާނުގެ ވެރިންނަށް ހުށަހެޅީ "ސުލްހަވެރި ނިއުކްލިއާ ޕްރޮގްރާމެއް" ހިންގުމުގެ ފުރުސަތެވެ. އެގޮތުން އެމެރިކާއިން އީރާނަށް ބޭނުންވާ ނިއުކްލިއާ ފިއުލް ފޯރުކޮށްދިނުމަށް ހުށަހެޅި ނަމަވެސް އީރާނުން އެކަމަށް އިންކާރު ކުރިއެވެ. ވައިޓް ހައުސްއާއި ސީ.އައި.އޭ އިން މިކަމާ މެދު ވަކި އެއްޗެއް ބުނަން ބޭނުމެއް ނުވިއެވެ.
"އަޅުގަނޑުމެން އެބޭފުޅުންނަށް އެތައް ގޮތެއް ހުށަހެޅިން. ނަމަވެސް އޭގެ ބަދަލުގައި ފެނިގެންދިޔައީ ކުޅިވަރުތަކާއި، މަކަރުވެރިކަމާއި، ވަގުތު ބޭކާރުކުރުމުގެ އުކުޅުތައް. އެންމެ ފަހުން އަޅުގަނޑުމެންނަށް ނިންމަން ޖެހުނީ އެއީ ކަމެއް ނުވާނެ މަޝްވަރާތަކެއް ކަމަށް." އިސް އޮފިޝަލެއް ވިދާޅުވިއެވެ.
ސްވިޒަލޭންޑްގެ ޖެނީވާގައި ބުރާސްފަތި ދުވަހު ބޭއްވި އެންމެ ފަހު ބައްދަލުވުމަށްފަހު، ވިޓްކޮފް އަދި ކުޝްނަރ ޓްރަމްޕަށް ގުޅުއްވައި، ނިއުކްލިއާ ޕްރޮގްރާމް އެއްކޮށް ހުއްޓާލުމަށް އީރާނުން އެއްބަސްނުވާކަން އެންގިއެވެ. މިއާއެކު، އަސްކަރީ ފިޔަވަޅު އެޅުމަށް ރައީސް ޓްރަމްޕް ކުރިން ގެންގުޅުއްވި ވިސްނުން އިތުރަށް ވަރުގަދަވިއެވެ. ޖެހިގެން އައި ދުވަހު، އެއާ ފޯސް ވަން މަތިންދާބޯޓުގައި ޓެކްސަސްއަށް ކުރެއްވި ދަތުރުފުޅުގައި ޓްރަމްޕް ވަނީ ބައެއް ރިޕަބްލިކަން ސެނެޓަރުންނާ މަޝްވަރާ ކުރައްވާފައެވެ. އެ ވަގުތު ޖާސޫސީ އިދާރާތަކުން ވަނީ ހޮނިހިރު ދުވަހު ތެހެރާންގައި އޮންނަ ބައްދަލުވުމުގެ މަޢުލޫމާތު ހޯދާފައެވެ.
"އޭނާ ކުރައްވަން އުޅުއްވާ ކަމެއް ސީދާ ވިދާޅެއް ނުވޭ. ނަމަވެސް އީރާނު ހުއްޓުވުމަށްޓަކައި ކޮންމެހެން އަޅަންޖެހޭ ފިޔަވަޅެއް އެޅުމާ މެދު އަޅުގަނޑުމެންގެ ޚިޔާލު ހޯއްދެވި." ސެނެޓަރު ކޯނިން ވިދާޅުވިއެވެ.
ހުކުރު ދުވަހު ޓެކްސަސްގައި ވާހަކަ ދައްކަވަމުން ޓްރަމްޕް ވިދާޅުވީ، އޭނާގެ ކުރިމަތީގައި އޮތީ ވަރަށް އުނދަގޫ ނިންމުމެއް ކަމަށެވެ. އެ ވަގުތު އޭނާއަށް ހަމަލާ ދޭންވީ ތަންތަނާއި، އީރާނުން ދީފާނެ ރައްދު ހަމަލާއާއި، އޭގެ ފަހުން ވެދާނެ ގޮތްތަކުގެ މަޢުލޫމާތު ވަނީ ވަރަށް ރަނގަޅަށް އެނގިވަޑައިގެންފައެވެ. އޭނާ ވިދާޅުވީ "މިއީ ފަސޭހަ ކަމެއް ނޫން" ކަމަށެވެ.
