މާލެ ސިޓީގެ މޭޔަރު އާދަމް އާޒިމު، ރައްޔިތުންނަށް ހިދުމަތް ކުރެއްވުމަށްވުރެ ޕާޓީގެ މަސްލަހަތު އިސްކުރައްވާ ކަމަށް، ރައީސް އޮފީހުގެ މިނިސްޓަރު އަލީ އާރިފު ތުހުމަތު ކުރައްވައިފި އެވެ.
އަލީ އާރިފު މިހެން ވިދާޅުވީ، ކުރިއަށް އޮތް ލޯކަލް ކައުންސިލް އިންތިހާބަށް ތައްޔާރުވުމުގެ ގޮތުން، ޕީއެންސީން މާފަންނު މެދު ދާއިރާގައި ބޭއްވި ދޮރުން ދޮރަށް ހަރަކާތުގައި ރައީސް ޑރ. މުހައްމަދު މުއިއްޒުގެ އަރިހުގައި ބައިވެރިވެ ވަޑައިގެން، ދެއްވި އިންޓަވިއުއެއްގަ އެވެ.
މިނިސްޓަރު ވިދާޅުވި ގޮތުގައި، ރައީސް ޑރ. މުއިއްޒު މާލެ ސިޓީގެ މޭޔަރު ކަމުގައި ހުންނެވިއިރު، ސިޓީގެ މައްސަލަތައް ހައްލު ކުރުމަށް ފުރިހަމަ ތަސައްވުރެއް އެކުލަވައިލެއްވި ކަމަށެވެ. ނަމަވެސް، މިހާރުގެ މޭޔަރަށް އެ ތަސައްވުރު ތަންފީޒު ނުކުރެއްވެނީ، ކްރެޑިޓް ލިބިވަ ދައިނުގެންފާނެ ކަމަށް ހީފުުޅު ވެ، ކަންކަމުގައި ސަރުކާރަށް އެއްބާރުލުން ނުދެއްވާތީ ކަމަށް ވިދާޅުވި އެވެ.
ލޯކަލް ކައުންސިލް އިންތިހާބުގައި، ޕީއެންސީ ފަރާތުން މާލެ ސިޓީގެ މޭޔަރު ކަމަށް ވާދަ ކުރައްވާ ކެންޑިޑޭޓަކީ މޫސާ އަލީ ޖަލީލެވެ. ރައީސް ގެ ތަސައްވުުރު ތަންފީޒު ކުރެވޭނެ ހީވާގި ބޭފުުޅަކީ ޖަލީލު ކަމަށް، ސަބަބެއްގެ ގޮތުން ޖަލީލުގެ ހިތްވަރާއި ސާބިތު ކަމާއި ހީވާގި ކަން ފާހަގަ ކުރައްވައި، އަލީ އާރިފު ވިދާޅުވި އެވެ.
ރާއްޖެ އަކީ ޔުނިޓަރީ ދައުލަތަކަށްވާތީ، ކައުންސިލްތަކުގެ ދައުރަކީ ވެރިކަމުގައި އޮންނަ ޕާޓީގެ މެނިފެސްޓޯ ތަންފީޒު ކޮށް، ސަރުކާރާ ގުޅިގެން ރައްޔިތުންނަށް ހިދުމަތް ދިނުުމެވެ. ކައުންސިލްތައް ފެއިލްވެ ކަންކަން ތަންފީޒު ނުވެއްޖެ ނަމަ، ރައީސުލްޖުމްހޫރިއްޔާ ޒިންމާ ނަންގަވަންޖެހޭ ކަމަށް ވެސް ވިދާޅުވެ، ޕީއެންސީން ސިޓީ ކައުންސިލް ކާމިޔާބު ކުރަން ނިކުމެ ތިބީ ހަމަ އެ ސަބަބަށްޓަކައި ކަމަށް ވިދާޅުވި އެވެ.
