ސާދަވިލޭރޭގެ ބުރު ފުރިހަމަ ހަނދުގެ ރިހި އަލިން މުޅި ތުނޑިމަތި ވަނީ ދިއްލާލާފައެވެ. ރާޅުތައް އައިސް ދޮންވެލިގަނޑުގައި ބީހިލާ އަޑާއި، ގަސްތަކުގެ ފަތްތަކުގެ މެދުގައި ކުޅެލާ ފިނި ވައިރޯޅިތަކުން މުޅި މާހައުލަށް ގެނެސްދީފައިވަނީ ހިތްގައިމު ހިމޭންކަމެކެވެ. މިޝާ އޭނާގެ ހިމަ އިނގިލިތަކުން ރެދަންތަކާ ކުޅެމުން ދިޔައީ އޭނާގެ ހިތުގެ ރަސްގެފާނު އަޒީމްގެ އިންތިޒާރުގައެވެ.
ކޮންމެ ރެއަކުވެސް މި ހިތްގައިމު ވަގުތު އޭނާ މިތަނަށް އަންނަނީ އެންމެން ނިދާ ފައިހިލަވަޅު އޮބުމުން ސިއްރު ބައްދަލުވުމަކަށެވެ.ނަމަވެސް މިރޭގެ އިންތިޒާރު އާދަޔާ ހިލާފަށް ދިގުލައިގެން ދިޔުމުން މިޝާގެ ހިތަށް ނުތަނަވަސްކަން ވަދެގަތެވެ. އަޒީމް އަންނަން ބުނި ވަގުތު ފާއިތުވެ އެތައް އިރެއް ވެއްޖެއެވެ.
ކުއްލިއަކަށް ފަހަތުން މީހަކު އައިސް މިޝާގެ ގައިގައި ބައްދާލުމުން އޭނާ ސިއްސައިގެން ދިޔައެވެ. އެއީ އަޒީމްކަން އެނގުމާއެކު މިޝާ ރުޅި އައިސްގެން ތުންކޮޅު ދަމާލިއެވެ. "އަޒީމް ވަރަށް ގޯސް، މިހާރު ކޮންއިރެއް މިތާ އިންނަތާ؟ އެއްޗެއް އައިސް މިޝް ކާލިނަމަޔޯ!" ކުޑަކުއްޖަކު ފަދައިން ޝަކުވާ ކުރަމުން މިޝާ އަނެއް ފަރާތަށް އެނބުރުނެވެ.
މިޝާގެ މި ރުޅިވެރިކަމަކީ އަޒީމް އެންމެ ދެކެން ބޭނުންވާ މަންޒަރެވެ. އޭނާ މަޑުމަޑުން މިޝާގެ ދަތްދޮޅީގައި ހިފާ އުފުލާލަމުން ބުންޏެވެ. "ސޮރީއޭ ބޭބީ، މިރޭ ލަސްވީ ވަރަށް ބޮޑު ސަޕްރައިޒެއް ތައްޔާރުކުރަން އުޅުމުން. ބޭބީ ރުޅި އައިސް ތުންކޮޅު ދަމައިގެން ހުންނައިރު ހާދަ ލޯތްބޭ."
އަޒީމް އޭނާގެ ޖީބުން ކުޑަ ފޮށްޓެއް ނަގާ ހުޅުވާލިއެވެ. އޭގެ ތެރޭގައި އިން އަލިމަހުގެ އަނގޮޓި ހަނދުވަރުގެ އަލީގައި ވިދާ ބަބުޅަމުން ދިޔައެވެ. "މިޝާ، އަހަރެން ބޭނުމީ މި ސިއްރު ބައްދަލުވުންތައް ނިންމާލާފައި، މުޅި އުމުރަށް އަހަރެންގެ ހަޔާތުގެ ބައިވެރިޔާއަށް ބޭބީ ހަދަން. އަހަންނާ ކައިވެނި ކުރާނަންތަ؟"
މި ސުވާލާއެކު މިޝާގެ ލޮލުން އުފާވެރިކަމުގެ ކަރުނަ ހިލުނެވެ. އޭނާގެ ހުރިހާ ޝަކުވާތަކެއް އެއްފަރާތްވެ، ލަދުން އިސްޖަހާލަމުން ބޯޖަހާލިއެވެ. އެއީ އެތައް ދުވަހެއްގެ އިންތިޒާރަށްފަހު އެ ދެލޯބިވެރިންގެ ހަޔާތަށް އައި އެންމެ އުފާވެރި ވަގުތެވެ. އެ ރޭ އެމީހުން ވީ ވައުދަކީ ދުވަހަކުވެސް އެކަކު އަނެކަކު ދޫކޮށްނުލާނެ ކަމުގެ މާތް ވައުދެވެ. ގުދުރަތުގެ ރީތިކަން ހެކިކޮށް އެމީހުންގެ ލޯބީގެ ބަގީޗާގައި އާ މާތަކެއް ފޮޅުވަން އަޒުމް ކަނޑައެޅިއެވެ.
ދުވަސްތައް ފާއިތުވަމުން ގޮސް، ދެ އާއިލާގެ ފުރިހަމަ ރުހުމާއި ލޯތްބާއެކު ބޮޑު ހަފްލާއެއްގައި ދެމީހުންގެ ކައިވެނި ކުރެވުނެވެ. ކުރިން ސިއްރުން ބައްދަލުކުރި އެ ތުނޑިމައްޗަކީ މިހާރު އެމީހުންގެ ދިރިއުޅުމުގެ އުފާވެރި ހަނދާންތައް އާކުރާ ތަނެވެ. އެކަކު އަނެކަކަށްޓަކައި ވީ އިހުލާސްތެރި ލޯތްބާއި، ކުރި ކެތްތެރި އިންތިޒާރުގެ ނަތީޖާއަކަށްވީ ބާއްޖަވެރި އަދި އުފާވެރި އާއިލީ ދިރިއުޅުމެކެވެ. މިއަދު އެދެމީހުންނަކީ އެކަކު އަނެކަކުގެ އިހުސާސްތައް ދެނެގަނެ، ކޮންމެ ހިތާމަޔަކާއި އުފަލެއް އެކީ ހިއްސާކުރާ ނަމޫނާ ޖޯޑެކެވެ.
