ހުޅުމާލެ ދެވަނަ ފިޔަވަހީގެ ހިޔާ ފްލެޓުގެ ފަސް ވަނަ ޓަވަރުގައި ރޭ ހިނގި އަލިފާނުގެ ހާދިސާއާއި ގުޅިގެން ހާލުގައި ޖެހުނު 37 މީހަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ.
އެންޑީއެމްއޭއިން ބުނީ މި ހާދިސާގެ ސަބަބުން އިމާރާތުގެ މައި ފާހާނާ ހޮޅިއަށް ބޮޑެތި ގެއްލުންތަކެއް ލިބިފައިވާ ކަމަށެވެ. މި ގެއްލުންތަކާ ގުޅިގެން އެ ޓަވަރުގެ ބައެއް އެޕާޓްމަންޓު ތަކުގެ ފާހާނާ ބޭނުން ނުކުރެވޭ ދަރަޖައަށް ގޮސްފައިވާ ކަމަށް އިންސިޑެންޓް ކޮމާންޑަރު ވަނީ މައުލޫމާތު ދީފައެވެ.
އެޗްޑީސީން ބުނީ މިހާދިސާއާއި ގުޅިގެން ނަރުދަމާއަށް ލިބުނު ގެއްލުންތައް މަރާމާތު ކުރުމުގެ މަސައްކަތް ކުރަމުންދާ ކަމަށެވެ.
އެންޑީއެމްއޭއިން ބުނީ ހިޔާ ޓަވަރު ފަހެއްގައި ހިނގި އަލިފާނުގެ ހާދިސާއާ ގުޅިގެން އެ ޓަވަރުގެ ހަތް އެޕާޓްމަންޓެއްގެ 37 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ.
މި ހާދިސާއާ ގުޅިގެން ލިބުނު ގެއްލުންތައް ދެނެގަނެ، މަރާމާތުގެ މަސައްކަތްތައް އަވަސް ކުރުމަށް މަސައްކަތް ކުރަމުންނާއި، މިމަސައްކަތުގައި އެންޑީއެމްއޭ، އެމްއެންޑީއެފް، ފުލުހުން، އެޗްޑީސީ، އެމްޑަބްލިއުއެސްސީ އަދި ސްޓެލްކޯއިން ބައިވެރިވެފައިވާކަމަށްވެސް ބުންޏެވެ.
ހިޔާ ޓަވަރު ފަހެއްގައި އަލިފާނުގެ ހާދިސާ ހިނގާފައިވަނީ ރޭ ހަތެއް ޖަހާކަން ހާއިރެވެ. އެމްއެންޑީއެފް ހުޅުމާލެ ފަޔާ ސްޓޭޝަނުން ވަނީ ވަގުތުން ހަރަކާތްތެރިވެ އަލިފާން ކޮންޓްރޯލް ކޮށްފައެވެ. މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވެއެވެ.
