ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ވާދަކުރަން ބޭނުންވާ މީހުންނަށް އެ ފުރުސަތު ދިނުމަށް އެ އިންތިހާބަށް ކުރިމަތިލުމަށް އިތުރު 10 ދުވަހުގެ މުއްދަތެއް ދިނުމަށް އިދިކޮޅު އެމްޑީޕީން އިލެކްޝަންސް ކޮމިޝަން (އީސީ) ގައި އެދިއްޖެއެވެ.

އަންނަ އޭޕްރީލް 4 ގައި އޮންނަ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލުމުގެ މުއްދަތު ހަމަވާނީ އަންނަ އާދިއްތަ ދުވަހުގެ މެންދުރު ފަހު 15:00 ގައެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލިހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވީ އިންތިހާބަށް ކުށުގެ ރިކޯޑް ސާފުކުރުމަށް މަސައްކަތްކުރާއިރު ކަރެކްޝަނަލް ސާވިސް އާއި ޖުޑީޝަލް ސާވިސްއިން ލަސްތަކެއް ވަމުންދާ ކަމަށެވެ. އެހެންވެ އިންތިހާބަށް އެ މުއައްސަސާތަކުން ތައްޔާރުވެފައި އޮތް ކަމަކަށް ލަފާނުކުރެވޭ ކަމަށް އޭނާ ވިދާޅުވިއެވެ.

"ގުޅުން ހުރި މުއައްސަސާތަކުން ހާއްސަކޮށް ކަރެކްޝަނަލް ސާވިސް އާއި ޖުޑީޝަލް ސާވިސްއިން އަޅުގަނޑުމެންނަށް އިންތިހާއަށް ލަސް އެބަވޭ. އެތަންތަން އިންތިހާބަށް ތައްޔާރުވެފައި އޮތް ކަމަކަށް ލަފައެއް ނުކުރެވޭ. އެއިން ކޮންމެ ތަނަކުންވެސް ފޯމެއް ހުށަހެޅުމަށްފަހު ތިން ދުވަސް ހަތަރު ދުވަސް، ނޫނީ ފަސް ދުވަސް އެބަވޭ." އަބްދުﷲ ވަހީދު ވިދާޅުވިއެވެ.

އޭނާ ވިދާޅުވި ގޮތުގައި ކެންޑިޑޭޓުން ފޯމު ހުށަހެޅުމަށް އިލެކްޝަން ކޮމިޝަން (އީސީ) އިން 16 ދުވަސް ދިން އިރު، ކުށުގެ ރިކޯޑް ސާފުކުރަން އެހާ ދުވަސް ނެގުމުން، އެއީ އިންތިހާއަށް އޮތް ކަންބޮޑުވުމެކެވެ. ސަބަބަކީ ކުށުގެ ރިކޯޑް ލިބުމުން އީފާސް މެދުވެރިކޮށް ކެންޑިޑެސީ ފޯމު ހުށަހެޅުމުން ބައެއް ފަހަރު މައްސަލައެއް ދިމާވެގެން ފޯމު ކެންސަލްވާތަންވެސް އަންނަ ކަމަށާއި އޮންލައިންކޮށް ފޯމު ހުށަހަޅަން ކުރު މުއްދަތެއް ދީފައި އޮތުމުން ގިނަ ކެންޑިޑޭޓުންގެ ހައްގު ނިގުޅައިގަނެވޭ ކަމަށް ވަހީދު ވަނީ ވިދާޅުވެފައެވެ.

"ވަރަށް އިޚުލާސްތެރިކަމާއެކު އިލެކްޝަނަށް ދަންނަވަން އޮތީ މި އިންތިހާބަށް ކުރިމަތިލުމަށްޓަކައި އިތުރު 10 ދުވަހުގެ މުއްދަތެއް ދިނުމަށް." އަބްދުﷲ ވަހީދު ވިދާޅުވިއެވެ.

ވަހީދު ތުހުމަތުކުރެއްވި ގޮތުގައި ޕީއެންސީގެން ހުރިހާ ކެންޑިޑޭޓުންނަށް ކަންތައްތައް ފަހިވާ ގޮތަށް އީސީން ދަނީ ކަންތައްތައް ކުރަމުންނެވެ. އެހެންކަމުން އެކަންކަން ހުއްޓާލުމަށްފަހު މިނިވަން އިންސާފުވެރި އިންތިހާބެއް ކުރިޔަށް ގެންދިޔުމަށް ޖާގަ ދެއްވުމަށް އެމްޑީޕީން އީސީއަށް ގޮވާލިއެވެ.

ވަހީދު ވިދާޅުވި ގޮތުގައި ކުރިޔަށް އޮތް ލޯކަލް ކައުންސިލް އިންތިހާބަށް ވާންޖެހޭ ހުރިހާ ތައްޔާރީއެއް އެމްޑީޕީން ދަނީ ވަމުންނެވެ. އެގޮތުން ކެންޑިޑޭޓުންގެ ފޯމުތައް ތައްޔާރުކުރުމާއި ކުށުގެ ރެކޯޑު ސާފުކުރުމުގެ ކަންތައް ދަނީ ކުރަމުންނެވެ. ނަމަވެސް ފޯމު ހުށަހެޅުމަށް އީސީން ދީފައިވާ މުއްދަތު ކުރުވުމުން، އެއިން ފޯމެއްގައި މައްސަލައެއް ދިމާވެއްޖެނަމަ އެކަން ހައްލުކޮށް އަލުން ފޯމުލުމުގެ ފުރުސަތު، އެބަގެއްލެއެވެ. އެހެންކަމުން އެއީ ކަންބޮޑުވުމެއް ކަމަށާއި އިންތިހާބަށް ނުފޫޒު ފޯރުވުމަށް ސަރުކާރުން މަސައްކަތް ކުރަމުންދާ ކަމަށްވެސް އެމްޑީޕީން ވަނީ ބުނެފައެވެ.