އިދިކޮޅު ބައެއް ޕާޓީތަކުން ކައުންސިލް އިންތިހާބަށް ފޯމު ހުށަހަޅާ މަންޒަރު ނުފެންނަ ކަމަށާއި އެ ޕާޓީތަކުން ކުރިމަތިލާނެ ކެނޑިޑޭޓުން ނުވާކަމަށް ވިދާޅުވެ ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހް، ކުރީގެ ރައީސް އަބްދުﷲ ޔާމީނަށް މަލާމާތުގެ ބަސްތަކެއް ނުސީދާކޮށް ރައްދު ކޮށްފިއެވެ.

ޔާމީން އުފެއްދި ޕީއެންއެފްގެ ފަރާތުން ކައުންސިލް އިންތިހާބުގައި އެއްވެސް ކެންޑިޑޭޓެއް ވާދައެއް ނުކުރެއެވެ. ޕީއެންއެފްގެ ހަރުގެ ޖަލްސާއެއްގައި ވާހަކަ ދައްކަވަމުން ޔާމީން ވިދާޅުވެފައިވަނީ ކައުންސިލް އިންތިހާބުގައި ވާދަކުރުމަށް ކުރަންޖެހޭ ކަންކަން އީ ފާސް މެދުވެރިކޮށް ކުރިއަށް ގެންދާތީ އިލެކްޝަންސް ކޮމިޝަން (އީސީ)އާ ދެކޮޅަށް މައްސަލަ ކޯޓަށް ހުށަހަޅުއްވާނެ ކަމަށެވެ.

ޕީއެންސީގެ މާފަންނު ދެކުނު ދާއިރާގެ ޖަގަހަ ހުޅުވުމުގެ ރޭ ބޭއްވި ރަސްމިއްޔާތުގައި ވާހަކަ ދައްކަވަމުން ފަލާހު ވިދާޅުވީ އީސީން ގެންދަނީ އިންތިހާބަށް ކުރިމަތިލާ ކެނޑިޑޭޓުންގެ ތަފާސްހިސާބުތައް ކޮންމެ ދުވަހަކު އާންމު ކުރަމުން ކަމަށެވެ.

"އީސީއިން ކޮންމެ ދުވަހަކު އެ ތަފާސްހިސާބުތައް އެބަ ހާމަކުރޭ. ބައެއް ޕާޓީތައް ހުރީ ސުމެއްގައި. އެކަމު ދައުލަތުން ފައިސާ ނަންގަވާ. އަނެއްބައި ބޮޑެތި ކަމަށް ބުނާ ޕާޓީތަކުން މަދު މެންބަރުން ތަކެއް ކުރިމަތިލާފައިވާތަން މިއަދު ފެންނަނީ. އެންމެ ގޯސް ގޮތަކަށް އިންތިހާބާމެދު ވާހަކަ ދައްކާ، ކޯޓަށް ދާނެކަމަށް ބުނަމުންދާ ފަރާތްތައް އެއްވެސް ކެނޑިޑޭޓެއް ނެރެފައިވާ މަންޒަރެއް ނުފެނޭ." ފަލާހް ވިދާޅުވިއެވެ.

"މި އުޅެނީ އީފާސް މެދުވެރިކޮށް ހުޅުވާލައިގެން ނުވަތަ ކަރުދާސް ފުރިހަމަ ކޮށްގެން އިސީއަށް ހުށަނޭޅޭތީ ކުރިމަތި ނުލާކަށް ނޫން. މައްސަލަޖެހޭ ހިސާބަކީ އެ ޕާޓީތަކުން ކުރިމަތިލާނެ ކެންޑިޑޭޓުން ނުވުން. ތާއީދު ނެތުން." ފަލާހު ވިދާޅުވިއެވެ.

ފަލާހް ވިދާޅުވީ އީ ފާސް މެދުވެރިކޮށް ހުށަހެޅިއަސް، ކަރުދާސް މެދުވެރިކޮށް ހުށަހެޅިއަސް، ބޮޑެތި ފްލައިވުޑް ފިލާގައި ކެންޑިޑޭޓުންގެ ނަން ލިޔެގެން ހުށަހެޅިއަސް ޕީއެންސީއިން 1300 ކެނޑިޑޭޓުން އިންތިހާބުގައި ވާދަކުރާނެ ކަމަށެވެ.