ސަރުކާރުން މިހާރު ހުޅުވާލާފައިވާ ބޯހިޔާވަހި ކަމުގެ ސިޔާސަތުގެ ދަށުން ދޫކުރާ 15000 ގޯތި ލިބޭ މީހުންނަށް އެ ގޯތިތަކުގެ ރަޖިސްޓްރީ އަވަހަށް ދޫކޮށްލެވޭނީ ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރަށް ތާއީދުކުރާ ކައުންސިލަރުން އިންތިޚާބު ކޮށްގެން ކަމުގައި ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދު (ޖަނާބު އިއްބެ) ވިދާޅުވެއްޖެއެވެ.
ރާއްޖޭގެ ޓީވީ ޗެނަލެއްގައި ވާހަކަ ދައްކަވަމުން އިއްބެ ވިދާޅުވީ، ކައުންސިލަރުންގެ ގޮތުގައި ސަރުކާރަށް ޖެއްސުންކުރާ ބަޔަކު ގެނައުމުގެ ބަދަލުގަ ހޮވަންވީ ސަރުކާރަށް ތާއީދު ކުރާ ކައުންސިލަރުންނެވެ. އޭނާ ވިދާޅުވީ އެމްޑީީޕީގެ މެމްބަރުންނާއި ދެންވެސް ހުރި އިދިކޮޅު ޕާޓީތަކުގެ މީހުންވެސް ބޭނުން ވަނީ ޕީއެންސީ މީހާ ހޮވަން ކަމަށެވެ.
"އެކީއްވެގެން، ރައީސް ބޭނުންފުޅުވޭ އެއްކަލަ ފަނަރަހާސް ގޯތިވެސް ރަޖިސްޓްރީ މި އަންނަ މަހުވެސް ދޫކޮށްލަން. އެކަން ކޮށްލެވޭނީ ރައީސުލްޖުމްހޫރިއްޔާގެ އެޖެންޑާއަށް ތާއީދުކުރާ މީހުން ހޮވައިގެން. އެހެންނޫންތޯ." އިއްބެ ވިދާޅުވިއެވެ.
އިއްބެ ވިދާޅުވީ، އެކަންކަން ފުރިހަމަ ކުރުމަށްޓަކައި މާލޭ ދާއިރާއަށް ރައީސް ވެވަޑައިގެންފައިވާ ބޮޑެތި ވައުދުތައް ފުއްދުމަށްޓަކައި ރައްޔިތުންގެ އިތުބާރު ރައީސުލްޖުމްހޫރިއްޔާއަށް އެބައޮތް ކަމަށެވެ. އަދި ރައްޔިތުން އެބަބޭނުން ވަނީ ރައްޔިތުން ކުރި އުންމީދުތައް ޙާސިލް ކުރެވޭ ބަޔަކު ކައުންސިލްތަކަށް އިންތިޚާބު ކުރަން ކަމަށްވެސް އިއްބެ ވިދާޅުވިއެވެ.
"މިސާލަކަށް ބައްލަވަމާ ހިންގަވާ، މި ފަނަރަހާސް ގޯތި ރަސްމާލެއިން މި ދޫކުރަނީ އިނގޭތޯ. އިދިކޮޅު ކައުންސިލަރުން ތަކެއް އައިސްފިއްޔާ މިއެއްޗެހި ރަޖިސްޓްރީކުރުމާ އަނެއްކަމަކާ، މިސާލަކަށް އެހެން ބަޔަކު އައިސް މި ދަންމާލައިގެން ދެން އަންނަ ދައުރަކަށް ނުވެއްޖިއްޔާ ކިހިނެއް ހަދާނީ. ކިހާބޮޑު މައްސަލައަކަށް ވާނެ." އިއްބެ ވިދާޅުވިއެވެ.
އިއްބެ ވިދާޅުވީ، ކުރިއަށް އޮތް ކައުންސިލް އިންތިޚާބު ސަރުކާރު ހިންގާ ޕީއެންސީ ބޮޑު ތަފާތަކުން ކާމިޔާބު ކުރާނެ ކަމަށެވެ. އެގޮތުން ކައުންސިލްތަކުގެ 98 ޕަސެންޓް ސަރުކާރުން ނަގާނެ ކަމަށްވެސް ވިދާޅުވިއެވެ.
