ދަތުރުފަތުރުގެ ކަންކަމަށް މިދިޔަ އަހަރުގެ ބަޖެޓުގައި ހިމަނާފައިވާ މިންވަރަށްވުރެ އިތުރަށް 42 މިލިއަން ރުފިޔާ ޚަރަދު ކޮށްފައިވާކަން މާލީ ވުޒާރާގެ ތަފާސްހިސާބު ތަކުން ދައްކައިފިއެވެ.

ފިނޭންސް މިނިސްޓްރީން މިއަދު އާންމުކުރި ތަފާސްހިސާބު ތަކުން ދައްކާ ގޮތުގައި މިދިޔަ އަހަރު ސަރުކާރުގެ ދަތުރުފަތުރަށް ބަޖެޓު ކޮށްފައި ވަނީ 249.1 މިލިއަން ރުފިޔާއެވެ. ނަމަވެސް މިދިޔަ އަހަރު ވަނީ 291.1 މިލިއަން ރުފިޔާ ދަތުރުތަކަށް ޚަރަދު ކޮށްފައެވެ. މިއީ ބަޖެޓުގައި އޮތްވަރަށްވުރެ 42 މިލިއަން ރުފިޔާ އިތުރު އަދަދެކެވެ.

މިދިޔަ އަހަރުގެ ދަތުރުތަކަށް 42 މިލިއަން ރުފިޔާ އިތުރަށް ޚަރަދު ކޮށްފައިވާއިރު، ރައީސުލްޖުމްހޫރިއްޔާ ރާއްޖޭން ބޭރަށް މީގެކުރިން ކުރައްވާ ދަތުރުތަކުގެ ތަފްސީލް ރައީސް އޮފީހުން އާންމު ކުރަން ފެއްޓެވިއެވެ. ނަމަވެސް އެކަން ވަނީ ފަހުން ހުއްޓާލާފައެވެ. އެހެންވެ ދަތުރުތަކަށް އެންމެގިނައިން ޚަރަދު ވެފައި ވަނީ ކޮން ފަރާތްތަކެއްގެ ދަތުރުތަކެއް ކަމެއް މުޅިން ސާފެއްނުވެއެވެ.

ހުސްވި އަހަރު ރައީސުލްޖުމްހޫރިއްޔާވެސް އަދި ނައިބު ރައީސްވެސް ރާއްޖެއިން ބޭރަށް ގިނަ ދަތުރުފުޅުތައް ކުރެއްވިއެވެ. އަދި ޚާރިޖީ ވަޒީރާއި އެނޫންވެސް ބަޔެއް ބޭފުޅުން ވަނީ ރާއްޖޭން ބޭރަށް ގިނަ ދަތުރުފުޅުތައް ރަސްމީކޮށް ކުރައްވާފައެވެ.