ރާއްޖޭގައި ހިންގަމުން އަންނަ މަސާޖް ޕާލާ ތަކުގެ ތެރެއިން 52 ތަން ބަންދު ކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރޭ ގަލޮޅުގެ ރައްޔިތުންނާއެކު ބޭއްވި މަޝްވަރާ ބައްދަލުވުމުގައި ރައީސް ވިދާޅުވީ، ގިނަ ރައްޔިތުންގެ ކަންބޮޑުވުން ފާޅުކޮށްފައިވާތީ މަސާޖްޕާލާ ތަކުގެ މައްސަލައަށް އިތުރު ހިތްވަރެއްލައިގެން ބަލައިފާސް ކުރުމުގެ މަސައްކަތް ކަމާގުޅުން ހުރި މުއައްސަސާތަކުން ކޮށްފައިވާ ކަމަށެވެ.
އެގޮތުން ޖުމްލަ 52 މަސާޖް ޕާލާ ބަންދު ކޮށްފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވީ ބަންދު ކުރި 52 ތަނުގެ ތެރެއިން 24 ތަން ބަންދުކުރީ މިހާރު ކުރިއަށްގެންދާ ބަލައި ފާސްކުރުމުގެ އޮޕަރޭޝަނުގެ ތެރެއިން ކަމަށެވެ. އަދި ބާކީ ހުރި 28 ތަން ބަންދުކުރީ އެ މަސާޖް ޕާލާތައް ހިންގަމުންދާ މީހުން އަމިއްލައަށް ކަމަށްވެސް ވިދާޅުވިއެވެ. އެއީ ބަލައިފާސްކުރުން ކުރިއަށް ގެންދަން ފެށުމުން އަމިއްލައަށް ބަންދުކުރި ތަންތަން ކަމަށް އެމަނިކުފާނު ވިދާޅުވިއެވެ.
މަސާޖް ޕާލާ ތަކުގެ އިތުރުން، ޤަވާއިދާ ޚިލާފަށް ރާއްޖޭގައި ހަރަކާތްތެރިވާ ބިދޭސީންގެ މައްސަލައަށް އިޝާރާތް ކުރައްވައި ރައީސް ވިދާޅުވީ، ޤަވާޢިދާ ޚިލާފަށް ރާއްޖޭގައި ބިދޭސީން ހަރަކާތްތެރިވާން އޮތް ފުރުޞަތުތައް ބަންދު ކުރެއްވުމަށް ސަރުކާރުގެ ކަމާބެހޭ ފަރާތްތަކުން ކުރައްވަމުންގެންދަވާ މަސައްކަތްތައް ވަރުގަދަ ކޮށްފައިވާ ކަމަށެވެ. އަދި ނުޤަވާޢިދުން ބިދޭސީން ހިންގަމުންދިޔަ 38 ވިޔަފާރިއެއް، 2 ހަފުތާ ތެރޭގައި ބަންދު ބަންދު ކޮށްފައިވާނެ ކަމަށްވެސް ރައީސް ވިދާޅުވިއެވެ.
