"ހެޓިލަރު ހެދިގެން" ނޫޅެވޭނެ ކަމަށާއި، ވަގުތު ޖެހުމާއެކު އެކަމެއް ނިމިގެންދާނެ ކަމަށް ވިދާޅުވެ، ވެލިދޫ ދާއިރާގެ މެމްބަރު މުހައްމަދު އައްބާސް، ރައީސް ޑރ. މުހައްމަދު މުއިއްޒަށް ސޯޝަލް މީޑިޔާގައި މެސެޖެއް ދޫކޮށްލައްވައިފިއެވެ.
މި ޕޯސްޓުގައި އައްބާސް ވިދާޅުވީ، ވިސްނުމެއް ނެތި، އަމިއްލައަށް ފޭއްސި އިލޮށިގަނޑު ފަހުން ތިމާމެންގެ ލޮލަށް ހެރިދާނެކަން ގަބޫލު ކުރަންވާނެ ކަމަށެވެ.
"ހެޓިލަރު ހެދިގެން ނޫޅެވޭނެކަމާއި ވަގުތު ޖެހޭއިރު އެކަމެއް ނިމިގެންދާނެކަން ހަދުމަ ކުރައްވަންވާނެ! ވިސްނާލުމެއް ނެތި ތިމާމެން އަމިއްލައަށް ފޭއްސާ އިލޮށިގަޑު ފަހުން ތިމާމެންގެ ލޮލަށް ހެރިދާނެކަން ޤަބޫލު ކުރައްވަންވާނެ." އައްބާސް ވިދާޅުވިއެވެ.
އައްބާސް އިތުރަށް ވިދާޅުވި ގޮތުގައި ދަތި އުދަނގޫ ދުވަސްތަކަށް ފަހު ފަސޭހަ ދުވަސްތަކެއް މާތްﷲ ދައްކަވާނެނެއެވެ. އަދި ރައްޔިތުން ކެތްތެރިކަން އިސްކުރުމަށް އެދިވަޑައިގަތެވެ.
އައްބާސް ވިދާޅުވީ ރާއްޖޭގެ ވެރިކަމުގައި މިހާރު ހުންނެވީ ރަސްކަލެއް ނޫން ކަމަށެވެ. ރާއްޖޭގައި އޮތީވެސް ރަސްކަމުގެ ނިޒާމެއް ނޫން ކަމަށެވެ. ރާއްޖޭގައި އޮތީ ތިން ބާރު ވަކިވެފައިވާ ރިޔާސީ ނިޒާމެއްގެ ދަށުން ހެދިފައިވާ ގާނޫނުއަސާސީއެއް ކަމަށެވެ.
"އެއީ ރައްޔިތުން ނިންމާ ޤަބޫލު ކުރި ނިޒާމް. އެހެން ކަމުން ރައްޔިތުން ނިންމި ނިންމުން ތަކުގެ ރިވެތި ސިފަތަށް ގެއްލުވާލާ ޤާނޫނު އަސާސީން ކަށަވަރު ކޮށްދީފައިވާ އެންމެހާ ހައްޤުތަށް ހަނިކޮށް ޤާނޫނު އަސާސީ ކޮށާ މަށާ ހުދުމުހުތާރު ވެރިކަމަކާ ދިމާލަށް މިސްރާބު ޖެހީމައި ރައްޔިތުން ކުޅިބަލަން ތިބޭކަށް ނުޖެހޭ" އައްބާސް ވިދާޅުވިއެވެ.
އޭނާ އިތުރަށް ވިދާޅުވީ، ރައީސުލްޖުމްހުރިއްޔާއަކީ ރައްޔިތުން ހޮވާފައި ހުންނަ ބޭފުޅެއް ކަމަށާއި، ރައީސަށް މުސާރަ ދީ، ދިރިއުޅޭނެ ތަނެއް ދީ، ކެއުމާއި ބޭސް ފަރުވާ ހަމަޖައްސަދީފައި ހުންނަ ރައްޔިތުންގެ ހާދިމެއް ކަމަށެވެ.
"ރައީސަކު ރައްޔިތުންގެ ހައްގަކަށް އަރައިގަންނަ ނަމަ، އެ ރައްޔިތުން އެ ރައީސަކު ޖަވާބު ދާރީ ކުރުވާނެ. ވެރިޔަކު ރައްޔިތުންނަށް ނުކުރާ އިޙްތިރާމެއް އެ ވެރިޔަކަށް ނުލިބޭނެ." އައްބާސް ވިދާޅުވިއެވެ.
