* ނޫސްވެރިން ކަންބޮޑުވި އަބުރުގެ ގާނޫނު އުވާލަން 2018 ގައި ހުށަހެޅުން، ޝާހިދަށް ލިބިވަޑައިގެންނެވި ފަޚުރެއް
އަމިއްލަ މެމްބަރަކު ރައްޔިތުންގެ މަޖިލީހަށް މިހާރު ހުށަހަޅާފައި އޮތް މީޑިޔާ ބިލު ފާސްކޮށް، ސަރުކާރުގެ ރޭވުންތައް ހުރީ މީޑިޔާ ތަކަށް އަތްބާނައި، ސަރުކާރުގެ ވެރިން ހިންގާ ޚިޔާނާތާއި ފަސާދައިގެ އަމަލު ތަކުގައި ޖެހުން ކަމަށް އެމްޑީީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މީޑިޔާ ބިލާ ގުޅޭގޮތުން ޝާހިދު މިރޭ އެކްސްގައި ވިދާޅުވީ، މިނިވަން ޑިމޮކްރަސީއެއްގައި މިނިވަން މީޑިޔާ ރެގިއުލޭޓް ކުރަންޖެހޭނީ ސެލްފު ރެގިއުލޭޓަރީ ނިޒާމެއްގެ ތެރެއިން ކަމަށެވެ. ނަމަވެސް މިހާރު ހުށަހަޅާފައި އޮތް މީޑިޔާ ބިލުގެ މުޅި މަހުފޫމްއަށް ބަލާއިރު، އެ ބިލު ފަރުމާކޮށްފައި އޮތީ ސަރުކާރުން މީޑިޔާތައް ކޮންޓްރޯލް ކުރުމަށް ކަމަށްވެސް ޝާހިދު ވިދާޅުވިއެވެ.
"މި ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހަޅާފައިވާ މީޑިއާ ކޮންޓްރޯލްކުރާ ބިލް އިސްލާޙު ކޮށްގެން މަޖިލީހުން އެބިލް ފާސްކުރުމަށް ސަރުކާރުން ރާވާ ރޭވުމަކީ، މީޑިއާގެ މިނިވަންކަން ނެތިކޮށް، މީޑިއާތަކަށް މިސަރުކާރުގެ ވެރިންގެ އަތްބާނާ، ކޮރަޕްޝަނާއި ފަސާދާގައި މަތިޖެހުމަށް ހިންގާ ހީލަތެއް." ޝާހިދު ވިދާޅުވިއެވެ.
މަޖިލީހުން ބަލައިގެންފައިވާ މީޑިޔާ ބިލު މިހާރުން މިހާރަށް ބޭރު ކުރުމަށްވެސް ޝާހިދު ވަނީ ގޮވާލައްވާފައެވެ. މި ބިލު ބޭރު ކުރުމަށް ނޫސްވެރިންނާއި މީޑިޔާ ތަކާއި އަދި ނޫސްވެރިންނާއި ގުޅުން ހުރި ޖަމްއިއްޔާ ތަކުންވެސް ވަނީ ގޮވާލާފައެވެ.
އެކްސްގައި ޝާހިދު އިތުރަށް ވިދާޅުވެފައި ވަނީ މީޑިޔާ ތަކާއި ނޫސްވެރިން ކަންބޮޑުވުން ފާޅުކުރި އަބުރާބެހޭ ބިލު އުވާލަން މަޖިލީހަށް ހުށަހެޅުއްވުމަކީ ލިބިވަޑައިގެންނެވި ފަޚުރެއް ކަމަށެވެ. އޭރު އެ ބިލު އުވާލަން ޝާހިދު ހުށަހެޅުއްވީ 2018 ވަނަ އަހަރުގެ އޮކްޓޯބަރު މަހުއެވެ. އޭރު ޝާހިދަކީ ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރެވެ. އެ ބިލު ފާސްކުރީ ރައީސް އަބްދުﷲ ޔާމީންގެ ވެރިކަމުގައެވެ.
ޝާހިދު ވިދާޅުވީ އަބަދުވެސް ގަބޫލު ކުރައްވަނީ ސަރުކާރު ޒިންމާދާރު ކުރުމުގެ ފުރުޞަތު ނޫސްވެރިންނަށް ލިބެންޖެހޭނެ ކަމަށެވެ. އެގޮތުން ރައީސް އިބްރާހީމް މުހައްމަދު ސޯލިހުގެ ވެރިކަމުގެ ފަސް އަހަރުގެ ދައުރުގައި ޚާރިޖީ ވަޒީރެއްގެ ހައިސިއްޔަތުން ހުންނެވިއިރުވެސް މީޑިޔާގެ ދިފާއުގައި ވަކާލާތު ކުރެއްވިކަން ފާހަގަ ކުރެއްވިއެވެ.
