އެމެރިކާގެ ޓެކްސަސް ސްޓޭޓަށް ކުރި ވިއްސާރައިގައި ފެންބޮޑުވެ ގިނަ ބަޔަކު މަރުވުމާ ގުޅިގެން އެ ގައުމުގެ ރައީސް، ޑޮނަލްޑް ޓްރަމްޕަށް ރައީސް ޑރ. މުހައްމަދު މުއިއްޒު ތައުޒިޔާ ފޮނުއްވައިފި އެވެ.

ރައީސް، ޓްރަމްޕަށް ފޮނުއްވި މެސެޖުގައި ވިދާޅުވީ ފެންބޮވި ހާދިސާގައި މަރުވި މީހުންގެ އާއިލާތަކަށާއި ހާލުގައި ޖެހުނު އެންމެހާ ފަރާތްތަކަށް ދިވެހި ސަރުކާރާއި ރައްޔިތުންގެ ނަމުގައި ތައުޒިޔާ ދަންނަވާ ކަމަށެވެ. ހާލުގައި ޖެހިފައިވާ މީހުންނަށް އެހީފޯރުކޮށްދިނުމަށާއި މީހުން ސަލާމަތް ކުރުމަށް އެމެރިކާގެ ކަމާބެހޭ ފަރާތްތަކުން ކުރަމުންދާ މަސައްކަތްތަކަށް ކާމިޔާބަށް އެދިވަޑައިގަންނަވާކަމަށްވެސް ރައީސް ވިދާޅުވިއެވެ.

ސެންޓްރަލް ޓެކްސަސްގެ އެކި ހިސާބުތަކަށް ކުރި ވިއްސާރައިގައި ފެންބޮޑުވެ، އެ ސަރަހައްދުގެ ކޯރެއްވެސް ވަނީ ބަންޑުންވެފަ އެވެ. މިހާދިސާގައި 59 މީހުން މަރުވެފައިވާ ކަމަށް ރެކޯޑް ކުރެވިފައިވާ ކަމަށް އެސަރަހައްދުގެ ކަމާ ގުޅުންހުރި އިދާރާތަކުން ވަނީ ބޭރުގެ މީޑިއާތަކަށް މައުލޫމާތު ދީފަ އެވެ. މީގެ ތެރޭގައި 21 ކުޑަކުދިން ހިމެނޭ ކަމަށްވެސް ވެއެވެ.