ބޮޑެތި ބަލިތަކުގެ ފަގީރުންނަށް ޒަކާތު ފަންޑުން އިންޝުއަރެންސް ހަމަޖައްސައިދޭން ނިންމައިފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު މީޑިއާތަކަށް ފޮނުއްވި މެސެޖެއްގައި ވިދާޅުވި އިންޝުއަރެންސް ތައާރަފްކުރަން ނިންމާފައި ވަނީ އާސަންދަ ކަވަރު ނުކުރާ ކަންކަމަށް ކަމަށެވެ.
ޝަހީމް ވިދާޅުވީ އަމިއްލަ އަށް ހޭދަކުރުމަށާއި ބައެއް ފަހަރު ފުރާނަ ސަލާމަތްކުރުމަށްޓަކައި ރާއްޖެއިން ބޭރުން ކުރަންޖެހޭ ފަރުވާގެ އިތުރުން ބޭރުން ގެންނަން ޖެހޭ ބޭސް ގެނައުމަށް ވެސް އިންޝުއަރެންސް ދިނުމަށް ނިންމާފައިވާ ކަމަށެވެ.
"މާތްﷲގެ ހެޔޮ ރަހުމަތްފުޅުން ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރާއްޖޭގައި ޒަކާތަށް ހާއްސަ އިދާރާއެއް ގާއިމްކޮށް ޒަކާތުގެ ނިޒާމް ހަރުދަނާކުރުމަށް ގިނަ މަސައްކަތްތަކެއް ވަނީ ކޮށްފަ އެވެ. މިދިޔަ އަހަރަކީ މުދަލު ޒަކާތަށް އެންމެ ގިނަ އަދަދަކަށް ފައިސާ ލިބުނު އަހަރެވެ." ޝަހީމް ވިދާޅުވި އެވެ.
