ހޯމްލޭންޑް މިނިސްޓަރ އަލީ އިހްސާންގެ އިތުބާރު ނެތް ކަމުގެ މައްސަލަ ކާމިޔާބު ނުވާނެ ކަމަށާއި، އެކަން މަޖިލިސް ތެރެއިން ފެއިލް ކޮށްލާނެ ކަމަށް ޕީއެންސީގެ ޕާލިމެންޓްރީ ގްރޫޕްގެ ލީޑަރު، އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވެއްޖެއެވެ.
ފަލާހު ވިދާޅުވީ، މިނިސްޓަރު އިހުސާންގެ އިތުބާރު ނެތް ކަމުގެ މައްސަލަ މަޖިލީހަށް ވެއްދިއިރުވެސް، އެކަން ކާމިޔާބު ނުވާނެކަން އެމްޑީޕީއަށް އެނގޭނެ ކަމަށެވެ. އޭނާ ވިދާޅުވީ، އިހުސާނުގެ މައްސަލައިގައި ޕީއެންސީގެ އެންމެ މެމްބަރެއްގެ ވޯޓުވެސް އިހުސާނާ ދެކޮޅަށް ނުދޭނެ ކަމަށެވެ.
އެމްޑީޕީން މި މައްސަލަ ވައްދާފައި ވަނީ ބާރަ މެމްބަރުންގެ ސޮޔާއެކުގައެވެ. ނަމަވެސް މަޖިލީހުގެ ސުޕާމެޖޯރިޓީ އޮތީ ޕީއެންސީގެ އަތުގައެވެ.
އެމްޑީޕީން، އިހުސާނުގެ އިތުބާރު ނެތްކަމުގެ މައްސަލަ ވެއްދީ، ހޯމްލޭންޑް މިނިސްޓްރީގެ ދަށުގައިވާ ޑިޕާޓްމެންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް)ގެ ޑޭޓާބޭސް ބޭނުން ކޮށްގެން، ޕީއެންސީއަށް މެމްބަރުން އިތުރު ކުރުމަށް ހިންގި ހަރަކާތުގައި ވަގު ފޯމު އިލެކްޝަން ކޮމިޝަނަށް ހުށަހެޅުމައި އިހުސާންގެ ދައުރު އޮތްކަމުގެ ތުހުމަތުގައެވެ.
