ރާއްޖެއަކީ ޗައިނާގެ އެންމެ ގާތް ގައުމަށްވުމަށް ރާއްޖެއިން ތައްޔާރަށް އޮތް ކަމަށް ރައީސުލްޖުމްހޫރިއްޔާ ޑރ. މުޙަންމަދު މުއިއްޒު ވިދާޅުވެއްޖެއެވެ.
ޗައިނާގެ ޚާރިޖީ ވަޒީރު ވާންގް ޔީ މިދިޔަ ހުކުރު ދުވަހު ރާއްޖެ ވަޑައިގެން، ރައީސް މުއިއްޒާ ބައްދަލު ކުރެއްވިފަހުން، ޗައިނާގެ ސްޓޭޓް ކައުންސިލްގެ ވެބްސައިޓުގައި ރައީސް މުއިއްޒާ ހަވާލާދީ ބުނެފައި ވަނީ ޗައިނާ އާއި ރާއްޖޭގެ ގުޅުން އިތުރަށް ވަރުގަދަ ކުރަން ރާއްޖެ ބޭނުންވާ ކަމަށެވެ.
"ޗައިނާގެ އެންމެ ގާތް ގައުމުގެ ގޮތުގައި އޮތުމަށް ރާއްޖެ އަބަދުވެސް އޮންނާނީ ތައްޔާރަށް. މި ދެ ގައުމުގެ ގުޅުމަށް ރާއްޖެއިން އިހުތިރާމުކޮށް އެކުވެރިކަން ވަރުގަދަކޮށް، ވަޒަންކުރާނެ. އިތުރު ދާއިރާތަކުން ދެ ގައުމުގެ ގުޅުން ބަދަހިކޮށް، ތަރައްގީގެ އާ ހަރުފަތްތަކެއް ގިރާކުރުމަށް މަސައްކަތް ކުރާނެ" ޗައިނާގެ ސްޓޭޓް ކައުންސިލުގެ ވެބްސައިޓުގައި ލިޔެފައި ވެއެވެ.
ވެބްސައިޓުގައި ރައީސް މުއިއްޒާ ހަވާލާދީ ބުނެފައި ވަނީ ރާއްޖެއަށް އެންމެ ގިނަ ޓޫރިސްޓުން އަންނަ ގައުމަކީ ޗައިނާ ކަމަށްވާތީ ރައީސް އުފާ ކުރައްވާ ކަމަށެވެ.
ޗައިނާގެ ފޮރިން މިނިސްޓަރާއެކު ހުކުރު ދުވަހު ބޭއްވި ބައްދަލުވުމުގައި ރައީސް މުއިއްޒު ވަނީ ޗައިނާއިން ރާއްޖޭގައި ހިންގާ ޕްރޮޖެކްޓުތައް އަވަސް ކުރުމާގުޅޭ ގޮތުންވެސް މަޝްވަރާ ކުރައްވާފައެވެ. އަދި ޗައިނާގެ ޕްރޮޖެކްޓްތައް އަވަސް ކުރައްވާނެ ކަމުގެ ޔަގީންކަން ފޮރިން މިނިސްޓަރުވެސް ވަނީ ދެއްވާފައެވެ.
