މޯލްޑިވްސް ހައްޖު ކޯޕަރޭޝަނުން ގެސްޓް ހައުސްގެ ވިޔަފާރީގެ ތެރެއަށް ވަނުމަކީ ރަނގަޅު ގޮތެއް ކަމަށް ދެކެވަޑައިނުގަންނަވާ ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.
މަޖިލީހުގައި މިއަދު މެމްބަރުންގެ ސުވާލު ތަކަށް ޖަވާބު ދެއްވަމުން ޒަމީރު ވިދާޅުވީ، ސަރުކާރު ޙިއްސާ އޮންނަ ކުންފުނި ތަކުން ރިސޯޓުތަކާއި ގެސްޓް ހައުސް ފަދަ ތަކެތި ހިންގުމުގެ ނަތީޖާ ގޯސްވެދާނެ ކަމަށެވެ.
"ހުރިހާ ކުންފުނިތަކުން، އެޗްޑީސީ އާއި ނޫން ކަމަށްވެއްޖެއްޔާ ހައްޖު ކޯޕަރޭޝަން އާއި ނޫނިއްޔާ ފެނަކައާ އެންމެން ގެސްޓުހައުސް އާއި ރިސޯޓު ހެދީމާ އަޅުގަނޑަށް ހީވަނީ އޭގެ ނަތީޖާ ރަނގަޅެއް ނުވާނެހެން،" ވަޒީރު ވިދާޅުވިއެވެ.
ނަމަވެސް، ސަރުކާރު ހިއްސާވާ ކުންފުނިތަކުގެ ތެރޭގައި ފަތުރުވެރިކަމަށް އިންވެސްޓު ކުރެވޭނެ ކުންފުނިތައް އެބަހުރި ކަމަށް ޒަމީރު ވިދާޅުވިއެވެ.
"އަޅުގަނޑަށް ހީވަނީ އަސްލުގައި ގެސްޓުހައުސް ހިންގަން ހައްޖު ކޯޕަރޭޝަނުން މަސައްކަތް ކުރުން އެއީ އޭގެ ޒާތުގައި ދެއްތޯ ކުންފުނީގެ ބޯޑުންނާއި ކުންފުނީގެ ހިއްސާދާރުން އެބަޖެހޭ ވިސްނައިލަން، އެއީ އާންމުކޮށް ފަންޑު ހުރެއްޖެ ކަމަށްވެއްޖެއްޔާ އޭގެ ސްޕެޝަލިސްޓުންނާ ހަވާލުކޮށްގެން އޭގެ ފައިދާ ކުންފުންޏަށް ހޯދައިފި ކަމަށް ވަންޏާ އޭގެ ނަތީޖާ ރަނގަޅު ވާނެ ކަމަށް މި ފެންނަނީ،" ޒަމީރު ވިދާޅުވި އެވެ.
ޒަމީރު މިފަދައިން ވިދާޅުވިއިރު، ހައްޖު ކޯޕަރޭޝަނުން މީގެކުރިން ބުނެފައި ވަނީ، ކ. މާފުށީ ކައުންސިލުގެ ކުންފުންޏާއެކު އުފައްދާ ސަބްސިޑަރީ ކުންފުންޏަކުން އެ ރަށުގައި ސިޓީ ހޮޓަލެއް ތަރައްގީކުރަން ނިންމާފައިވާ ކަމަށެވެ.
އެ ކުންފުނިން ބުނެފައި ވަނީ އެކަން ކުރަނީ، ބޭރު ފައިސާ ހޯދުމުގެ މަގުސަދުގައި ކަމަށެވެ. އަދި ރިއަލް އެސްޓޭޓު ވިޔަފާރިއަށް ވަންނަން ހައްޖު ކޯޕަރޭޝަނުން ނިންމީ ރިސްކު ކުޑަ ވިޔަފާރިތައް ބަލައި ދިރާސާ ކުރުމަށްފަހު އެ ކުންފުނިން ވަނީ ބުނެފައެވެ.
