އެކިއެކި ގައުމުތަކަަށް ރާއްޖޭން ދައްކަންޖެހޭ ދަރަނީގެ ތެރެއިން 1.5 ބިލިއަން ޑޮލަރުގެ ދަރަނި ރީފައިނޭންސް ކުރުމަށް މަޝްވަރާ ކުރަމުން އަންނަ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
މިނިސްޓަރު ޒަމީރު މިހެން ވިދާޅުވީ، އަންނަ 2025 ވަނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓާ ބެހޭގޮތުން ރައްޔިތުންގެ މަޖިލީހުގެ ބަޖެޓް ކޮމިޓީގައި މިއަދު ވާހަކަ ދައްކަވަމުންނެވެ.
ކުރިއަށް އޮތް ތަނުގައި ދައުލަތުގެ ދަރަނި އަދާކުރުމުގައި ހުރި ކަންބޮޑުވުންތަކާއި ބެހޭގޮތުން އެމްއެމްއޭގެ ގަވަރުނަރު ކޮމިޓީގައި ދެެއްކެވި ވާހަކަތަކާއި ގުޅިގެން މިނިސްޓަރު ވިދާޅުވީ، ރާއްޖޭގެ ދަރަނީގެ ބޮޑު ޕަސެންޓެއް ދައްކަން ޖެހެނީ ވަކިވަކި ގައުމު ތަކަށް ކަމަށެވެ.
އެެހެން ގައުމުތަކާ ޚިލާފަށް ރާއްޖޭގެ ދަރަންޏަކީ ބައިލެޓަރަލް ދަރަނި ކަމަށާއި، އެހެން ކަމުން ބައިލެޓަރަލް ރިލޭޝަންސްގެ ސަބަބުން ބައިލެޓަރަލް ޕާޓްނާސްގެ ގޮތުން ދަރަނި ދެއްކުމަށް ލުއި ލިބޭނެ ކަމަށްވެސް ޒަމީރު ވިދާޅުވިއެވެ.
ޒަމީރު ވިދާޅުވީ، 1.5 ބިލިއަން ޑޮލަރުގެ ދަރަނި ރީފައިނޭންސް ކުރުމުގެ މަޝްވަރާތައް ފަރާތަކާއެކު މިހާރުވެސް ކުރިއަށްދާ ކަމަށެވެ. އެ މަޝްވަރާ ތަކުން ހެޔޮ ނަތީޖާއެއް ނެރެވޭނެ ކަމަށް އުއްމީދު ކުރައްވާ ކަމަށްވެސް ވިދާޅުވިއެވެ. ނަމަވެސް އެއީ ކޮން ފަރާތެއްކަމެއް މިނިސްޓަރު ވިދާޅެއް ނުވެއެވެ.
