ކުރީގެ ސަރުކާރުން ރަށްރަށުގައި ޕޮލިސް ސްޓޭޝަން އަޅަން ހަވާލުކުރި ކުންފުނިން، ބިގް ކުންފުނީގެ ހިއްސާ ގަނެ، މޫނިމާގޭގައި އިމާރާތެއް ހަދަމުންދާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރު އިހުސާން މިހެން ވިދާޅުވީ، މީގެކުރިން އޮތް އެމްޑީޕީ ސަރުކާރުން އިންދިރާ ޕްރޮޖެކްޓުގެ ނަމުގައި ރާއްޖޭގެ އެކި ރަށްރަށުގައި ޕޮލިސް ސްޓޭޝަން ގާއިމު ކުރަން ކުރިއަށް ގެންދިޔަ ޕްރޮޖެކްޓާ ބެހޭގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި އިނގުރައިދޫ ދާއިރާގެ މެންބަރު އިބްރާހިމް ފަލާހު ކުރެއްވި ސުވާލަކަށް ޖަވާބު ދެއްްވަމުންނެވެ.

މިނިސްޓަރާ ސުވާލު ކުރައްވަމުން ފަލާހު ވިދާޅުވީ، އެ ޕްރޮޖެކްޓުގެ 15 ޕަސެންޓަށްވާ ފައިސާ ސަރުކާރުން ދޫކޮށްފައިވާއިރު، އެކަމުގެ އެއްވެސް މަސައްކަތެއް ހިނގާފައިވާ ތަން ނުފެންނަ ކަމަށެވެ.

މިނިސްޓަރު ވިދާޅުވީ، އެމްޑީޕީ ސަރުކާރުގައި ފުރަތަމަ އެ ޕްރޮޖެކްޓް އޮތީ، އިކޮނޮމިކް މިނިސްޓްރީގައި ކަމަށެވެ. ނަމަވެސް ގާތްގަނޑަކަށް ދެ އަހަރު ފަހުން، 2021 ވަނަ އަހަރާ ހިސާބުގައި އެ ޕްރޮޖެކްޓް މޯލްޑިވްސް ޕޮލިސް ސާވިސަށް ގެނެސް، 60 ރަށުގައި ޕޮލިސް ސްޓޭޝަން އެޅުމަށް 60 މިލިއަން ޑޮލަރުގެ ޕްރޮޖެކްޓެއް ހިންގަން ރޭވި ކަމަށެވެެ.

އެ ޕްރޮޖެކްޓާ ބެހޭ ލިޔެކިޔުން ތަކުން ދައްކާ ގޮތުގައި، ޕްރޮޖެކްޓަށް ފައިނޭންސް ކުރާނީ އިންޑިޔާގެ އެގްޒިން ބޭންކުންނެވެ. އަދި ޕްރޮޖެކްޓުގައި ސޮއިކޮށް މަސައްކަތް ފަށައި ވަަރަށް ބާރަށް އެ މަސައްކަތް ކުރިއަށްދާ ކަމަށް، ލިޔެކިޔުންތަކުން އެނގެން އޮތް ކަމަށްވެސް ވިދާޅުވިއެވެ. ނަމަވެސް އެކަމުގެ އެއްވެސް ކަމެއް ހިނގާފައި ނުވާ ކަމަށްވެސް މިނިސްޓަރު ވިދާޅުވިއެވެ.

އެ މަސައްކަތް ކުރިއަށް ގޮސްފައި އޮތް ގޮތަށް ބަލާއިރު، އިންދިރާ ޕްރޮޖެކްޓުގެ ފަރާތުން ރާއްޖޭގައި ޖޮއިންޓް ވެންޗާ ކުންފުޏެއް އުފެއްދި ކަމަށާއި، އެންމެ ފުރަތަމަ ކުރި ކަމަކީ، އެ ޕްރޮޖެކްޓްގެ ލޯނަށްވާ 15 ޕަސެންޓް ހޯދުމަށް ސަރުކާރުގައި އެދުން ކަމަށްވެސް ވިދާޅުވިއެވެ. ކަމާބެހޭ ލިޔެކިޔުންތަކުން ދައްްކާ ގޮތުގައި އެ ކުންފުންޏަށް އެމްޑީޕީ ސަރުކާރުން ލޯނުގެ 15 ޕަސެންޓަށްވާ 3.6 މިލިއަން ޑޮލަރު ދީފައިވާކަން އެނގެން އޮންނަ ކަމަށްވެސް ވިދާޅުވިއެވެ.

"އެހެން ނަމަވެސް އަދާ ހަމައަށް އައިއިރު، އަޅުގަނޑުމެންނަށް ފިޒިކަލީ އެ ލާރިއަށް ކުރި ކަމެއްގެ ތަފްސީލެއް ނުދޭ، އަޅުގަނޑުމެންގެ އެއް ބައްދަލުވުމުގައި އެ ލާރި ހުރި ކަމަށް ބުނެފަ އެބައޮތް، އެހެންނަމަވެސް ފިޒިކަލީ އެއްވެސް ކަމެއް ކޮށްފައެއް ނެތް، ދިވެހި ދައުލަތުގެ ފައިސާ ވަނީ އެ ކުންފުނީގައި. އަޅުގަނޑުމެން، އެ ކުންފުނިން ރާއްޖޭގައި ދެން ކޮންކަމެއްތޯ ކުރަނީ ބަލައިލިއިރު، އަޅުގަނޑުމެންނަށް ފާހަގަ ކުރެވިފައި އެބައޮތް ބިގް ނަމަކަށް ކިޔާ ކުންފުނީގެ ޝެއާ އެ ކުންފުނިން ގަނެގެން މިހާރު މޫނިމާގެ ކިޔާ ގޭގެ އިމާރާތް ވަަރަށް ބާރަށް ކުރިއަށްގޮސް ނިމެމުންދާކަން،" މިނިސްޓަރު ވިދާޅުވިއެވެ.