މިއަހަރު ނިމުމުގެ ކުރިން ބޯހިޔާ ކަމުގެ މުޅިންއާ އަދި ބޮޑު މަޝްރޫއެއް މި ސަރުކާރުން ފަށާނެ ކަމަށް ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
މިނިސްޓަރު ހައިދަރު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގެ މިނިސްޓަރުންނާ ސުވާލު ކުރުމުގެ ވަގުތުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.
މެންބަރު މިނިސްޓަރާ ސުވާލު ކުރެއްވީ، މިހާތަނަށް މިސަރުކާރުން ބޯހިޔާވަހިކަމުގެ އެއްވެސް މަޝްރޫއެއް ފަށާފައިވޭތޯ އާއި، އަންނަ އަހަރު ބަޖެޓް ކަނޑައެޅުމުގެ ފުރިހަމަ އިހުތިޔާރު މިސަރުކާރަށް ލިބިފައިވާއިރު އަންނަ އަހަރަށް ކަނޑައަޅާފައިވާ ބޯހިޔާވަހި ކަމުގެ މަޝްރޫއު ތަކަކީ ކޮބައިތޯއެވެ.
އެސުވާލުގެ ޖަވާބުގައި މިނިސްޓަރު ވިދާޅުވީ، މިއަހަރު ނިމުމުގެ ކުރިން ބޯހިޔާވަހިކަމުގެ މުޅިން އާ މަޝްރޫއެއް މި ސަރުކާރުން ފަށާނެ ކަމަށެވެ.
އެއީ ވަރަށް ބޮޑު މަޝްރޫއެއް ކަމަށާއި، އެ މަޝްރޫއުގެ އަމާޒަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ރިޔާސީ ދައުރު ނިމިގެންދާއިރު މުޅި ރާއްޖޭގައި 85،000 ހައުސިންޔުނިޓް ގާއިމް ކުރުން ކަަމަށްވެސް ވިދާޅުވިއެވެ.
މިނިސްޓަރު ވިދާޅުވީ މިސަރުކާރުން އެންމެ އިސްކަންދޭ ކަމަކީ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކޮށްދިނުން ކަމަށެވެ. އަދި ރައީސް މުއިއްޒުގެ ވައުދުފުޅާ އެއްގޮތަށް އެ މައްސަލަ ހައްލު ކޮށްދެއްވާނެ ކަަމަށްވެސް ވިދާޅުވިއެވެ.
