ޗީފް އޮފް ޑިފެންސް ފޯސްގެ މަޤާމުން ރިޓަޔަރ ކުރައްވާފައިވާ ލެފްޓިނެންޓް ޖެނެރަލް ރިޓަޔާޑް ޢަބްދުއްރަޙީމް ޢަބްދުއްލަތީފަށް ފޮރިން މިނިސްޓްރީގެ ސްޓޭޓް މިނިސްޓަރުކަން ދެއްވައިފިއެވެ.
މައުލޫމާތު ލިބިފައިވާ ގޮތުގައި ފޮރިން މިނިސްޓްރީގެ ސްޓޭޓް މިނިސްޓަރު ކަމަށް އަބްދުއްރަޙީމް އައްޔަން ކުރައްވާފައި ވަނީ ހުސްވި ހަފްތާގައެވެ. ފޮރިން މިނިސްޓްރީގެ އިސްބޭފުޅުން ބޭއްވި ބައްދަލުވުމެއްގައި އަބްދުއްރަޙީމް ބައިވެރިވެވަޑައިގެންނެވި ޓްވީޓެއްވެސް އެ މިނިސްޓްރީން ވަނީ ކޮށްފައެވެ.
އެނގިފައިވާ ގޮތުގައި ފޮރިން މިނިސްޓްރީގެ ސްޓޭޓް މިނިސްޓަރު ކަމަށް އައްޔަން ކުރައްވާފައިވާ އަބްދުއްރަޙީމްއަކީ ރާއްޖެއިން ތުރުކީ ވިލާތަށް އައްޔަން ކުރައްވާ ފުރަތަމަ ސަފީރު ކަމުގައިވެސް ސަރުކާރުން ވަނީ ހަމަޖައްސަން ނިންމަވާފައެވެ. އެހެންކަމުން އަބްދުއްރަޙީމް ތުރުކީގެ ސަފީރު ކަމަށް އައްޔަން ކުރައްވާނީ ސްޓޭޓް މިނިސްޓަރު ފެންވަރުގައެވެ. ސަރުކާރުން މީގެކުރިން ވަނީ ތުރުކީގައި އެމްބަސީއެއް ހުޅުވަން ނިންމާފައެވެ.
ސިފައިންގެ ޗީފް ކަމުން އަބްދުއްރަޙީމް ރިޓަޔަރ ކުރައްވާފައި ވަނީ ހުސްވި އޭޕްރީލް މަހުގެ 18 ވަނަ ދުވަހުއެވެ. ސިފައިންގެ ޚިދުމަތުގައި 39 އަހަރު ހޭދަކުރެއްވުމަށް ފަހު، ރިޓަޔަރ ކުރެއްވީ އުމުރުފުޅުން 60 އަހަރު ފުރުމާއި ގުޅިގެންނެވެ. އަބްދުއްރަޙީމަކީ މީގެކުރިން ސިޔާސީ އެއްވެސް މަސައްކަތެއްގައި އުޅުއްވި ބޭފުޅެއްނޫނެވެ.
